12
Hainga Xaung Gulup Sabanga
1 Baing axamang xan tela sibuna sok long xaiya. Haing tela sina bila sau xaidaba. Sobaga wa hawa mana kindi saing hatung 12 duwa toxonia bila muxubinoa. 2 Gamona saing bo ba hayauba. Binabu xaba sabanga mua namua na xunumia salak sabanga.
3 Baing axamang xan tela sibuna muli sok long xaiya. Gulup sabuxang sabanga sibuna,* gulup sabuxang sabanga sibuna—Mana Inglis xuana duxu asaxa ba dragon. Asaxa ba diang sibuna saing sabanga sibuna mana lipudi. Mana Urana Xuang Mugamugangama bunging xumana bing babu mana Urana bixuandi. La li bing haruanga babuna mana Satan. ina toxong 7 xaung salaming 10. Muxup xaitamoxiam tela wa mana toxong taining tainina. 4 Uxanoa xai hatung gugunianga tela mana hataing tuwa sabalunia digugunia saing bibixadi mari titia. Gulupka ba li hainga bo ba hayau ba maxania, bu ngarungaru garanoa bungina ri ma. 5 Hainga hayau gara lup tela bagula wa etua mana numanuma longgalo haringing sibuna, bila tuxu tuki haringina.† Ubagu Olaidi (Buk Song) 2:9. Hata sibuna li disasaxaki mahaing rangua Urana saing dita kabukabung xaitamoxiamia. 6 Hainga luki mala long xoliania, mana long tela Urana xauxau mana bu sanga ba duwasa mana laing xaidap 1,260 disup to.
7 Maluxu mana bungina baguba, haunginga sabanga sok long xaiya. Maikel gabu Urana uleginamgadi wa etua manadi ba dahaunggana guluba. Guluba gabu uleginam diandi dahaunggana xauna. 8 Ning guluba haringingan te bu dali, binabu Urana yungadi duwa long xaiya muli te. 9 Maikel gabu Urana uleginamgadi wa etua manadi ba diting gulup sabanga sibuna ba mari titia—ina gabu uleginam diandi. Gulupka ba bing moxa mugauam duxu ba xaungadi yanamidinga kimbo Satan. Ina lipua langlangua lipu titiam longgalo.
10 Baing ngalungu waxutu tela wagi sabanga long xaiya ba:
“Hatata Urana kiria xap lipuxindi muli, haringinganoa sok sabasabia saing Yonggaxinoa ma lo,
saing Lipuxing Mogunganama wa etua mana lipudi xaung yaya sabanga.
Namua na uleginamdi diting lipua su haruangua na lipudi mari,
lipua su haruanga na riara lipu hatuminga haringinamdi,
lipua su haruanga nadi Urana maxania xaidap yambong.
11 Riaradi didali lipua ba
mana Sipsip Tutubina sibung oxatanoa
xaung mana haruanganoa dibaxanga.
Ding dahatum xumana buk te mana walingadinga
binabu dimaxuwa mana matiadinga te.
12 Binabu ang lipu long xaiyam longgalo ayaha sibuna!
Ne laku mana titi xaung tek, mauxanganoa bagula xapkang,
namua na Satan ri mala mang!
Atin disala sabanga sibuna,
namua na ina xabia ba xaidabindi xumana buk te.”
13 Bungina guluba bagu xabia diting mari titia, xu haingga hayau gara luba ba. 14 Ne disina matikomkom sabanga banggitonging luwa na haingga ba, bu sanga ba oti mala longga Urana xauxau na long xoliania ba, bu duwasa mana niani tela xaung niani luwa rangua niani hataina. Guluba sanga ba ila hanggalangia la ba te.
15 Baing moxa ba (guluba baing) matuxuya langa sangua suxungunoa bila lang sabanga tela mala sangang longga hainga wa mana, bu langa xap mala bu hanggalangia. 16 Ning titia hauli hainga saing xaxa suxungunoa saing ngaru langga ba guluba matuxuya sangua suxungunoa! 17 Baing guluba atin disala buk mana hainga, binabu ila bu haunggana lipuadi duwa bila hainga garang teladi.‡ lipuadi duwa bila hainga garang teladi—Haruanga babuna li harua mana lipu hatuminga haringinamdi, bila 12:17 subinganoa harua ba. Ding lipuadi disu mana Urana hanaunaungandi xaung dahatum haringina mana Yesu haruangang maxunama ina baxanga. 18 Baing guluba li mua tek rubinia.
*12:3 gulup sabuxang sabanga sibuna—Mana Inglis xuana duxu asaxa ba dragon. Asaxa ba diang sibuna saing sabanga sibuna mana lipudi. Mana Urana Xuang Mugamugangama bunging xumana bing babu mana Urana bixuandi. La li bing haruanga babuna mana Satan.
†12:5 Ubagu Olaidi (Buk Song) 2:9.
‡12:17 lipuadi duwa bila hainga garang teladi—Haruanga babuna li harua mana lipu hatuminga haringinamdi, bila 12:17 subinganoa harua ba.