19
Olai Dalingamdi Disok Long Xaiya
1 Sup baing ngalungu bibinga bila buranga sabanga sibuna duwa long xaiya. Duwagi sabanga ba:
“Taiti Urana kiria yanoa!
Xabinga muli, ralana xaung haringinga bing iniadi,
2 namua na ina suxuyangandi maxundi xaung maringing sibundi.
Suxuya haing daxangam yayang sabanga ba
haingga ba xai lipu titiamdi mala ba dilibu kubolung sanggamdi.
Sina salaga na namua na matu lipuxing oxatanamdi sibidingdi.”
3 Baing duwagi sabanga muli ba:
“Taiti Urana yanoa!
Haingga ba bunuxuyanoa haing bungingbunginalo.”
4 Lipu haringing 24 digabu axamang walingam luwadi luwadi ding digung kiding tuxundi, dituru mari titia saing disabu mana Urana, rung kabukabu xaitamoxiamia. Baing duwagi ba:
“Maxung sibuna! Taiti Urana yanoa!”
5 Baing waxutu tela sok kabukabu xaitamoxiama ma, harua ba:
“Aiti Urana kiria yanoa,
ang lipuxing oxatam longgalo,
ang lipu gaxarea awa hawa mana,
ang lipu yayamdi, ang lipu yaya teguamdi!”
6 Baing ngalungu bibinga bila buranga sabanga sibuna, bila lang sabanga si xaung bila kaxaba taha. Duwagi ba:
“Taiti Urana yanoa!
Namua na Toxoratamona Urana Haringing Sibuna kiria wa etua mana axamang longgalo.
7 Bing tayaha sibuna, gamoradi diyaha sibuna,
saing tasina yaya sabanga na!
Namua na xaidaba Sipsip Tutubina bagula yau mauba,
saing hainga xauxauina masup.
8 Imang xai sibuna, usamang sibuna xaung sigixingang sibuna,
disina na haingga ba sau.”
(Imang xai sibuna mogu Urana lipuxing maringindi kuboluding maringindi.)
9 Baing Urana uleginama harua nanga ba, “Ubungguba: ‘Urana libu xai mana lipuadi xusungadi ba dima Sipsip Tutubina yaungang taungania!’ ” Saking harua nanga muli ba, “Haruanga li Urana haruangang maxung sibunamdi.”
10 Hata sibuna li ngagung kigu tuxundi saing ngaturu mari kinia bu ngasabu mana. Ning harua nanga ba, “Labu ulibu tai! Nga riam lipu oxatama. Nga riam lipu hatumingading haringinamdi riading oxatama, lipuadi dituxu Yesu baxanganganoa haringina. Usabu mana Urana! Namua na haringingua lipuadi dibaxanga Yesu na teladi ma rangua Urana Aningonoa.”
Lipua Rung Etua Mana Hos Usamana
11 Ngabagu long xaiya xaxaina, baing maxagia ngabagu hos usamang tela, lipua rung etua mana duxu ba Lipua Lipudi Dahatum Haringina Mana xaung Maxung Sibunam. Bungina suxuya, bungina haung, libu kubolu maringing sibuna ing ganina. 12 Maxandi bila yap luliandi, saing muxup xaitamoxiam xumana duwa toxonia. Ina yanoa Urana bung mana, saing lipu tela xabia te. Ing ganina xabia namuxinoa. 13 Imang maxaya sau ba, siba wa hawa hataing hataina, saing yanoa bing Urana Xuanoa. 14 Lipu haungingam long xaiyam xumang sibuna dinaxu mana, dirung etua mana hos usamandi saing disau imang xai sibundi, dusa xaung disigixinga. 15 Waxang sabanga maxaxan tela sok matabu suxungunia bu ina dali numanumadi mana. Wa etua manadi xaung tuki haringina. Ruha bixuandi wain marang ruhangam yabania. Longga ba Urana Haringing Sibuna ating saliang sabanga wa mana. 16 Mana imanging maxaya xaung king babana bung yaya baguli:
xaitamoxi mana xaitamoxi longgalo xaung toxoratamona mana toxoratamona longgalo.
17 Baing ngabagu Urana uleginam tela li etua xaidabia, iti waxungtuanoa sabanga saing wagi na manggadi doti etua sibuna sabalunia ba, “Ama to. Agugunia ma mana Urana taungang sabanga! 18 Agugunia ma bu axang lipudi mututungadingdi—xaitamoxidi, lipu haungingam yanamidingdi, lipuadi dahaung haringina, hosidi xaung lipuadi dirung etua manadi, xaung lipu teladi, lipu oxata olanggamdi xaung lipuadi duwasa mana ding sibuding walingadinga, lipu yayamdi xaung lipu yaya teguamdi. Ama axang lipu xangxana mututungadingdi!”
19 Baing ngabagu asaxa diang sibuna xaung xaitamoxi titiamdi xaung lipuxiding haungingamdi digugunia ma ba dahaunggana lipua rung etua mana hosia xaung lipuxing haungingamdi. 20 Ning lipua rung etua mana hosia tuxu asaxa diang sibuna ba, ina gabu lipuxing suxunguxunguam maxung teguama libu axamang haringindi yania. Mana axamang haringindi libudi ba langlangua lipuadi daxap asaxa diang sabanga mogunganoa xaung disabu mana babunoa ba. Digamatauyu saing ting dingtang mari maluxu mana yap sabangua xaningxaning xaung siang buyamana salpadi. 21 Lipu teladi, ding dimati mana waxang sabanga sok matabu mana lipua rung etua mana hosia ba suxungunoa. Baing mangdi daxang laing dibaxagi buk mana mututungadingdi.