1 ولا انسا مولانا النبي نوح وكل حيوانات لخلا والحيوانات اللي يُربّاو اللي امعاه فالسفينة، ومشّا الريح اعلى لارض وبدات لارض اتمص الما. 2 وكانت عين الما لكبيرة اللي عميقة فالتراب انڮفلت وابواب السما انڮفلو، ووڮفت اسحاب الجاية من السما. 3 واتراجعت المياه عن لارض اشوي اشوي. وعاڮب 150 يوم، 4 فاليوم 17 من الشهر السابع، وڮفت السفينة اعلى اكدا أراراط. 5 وظلت المياه تنتڮص يلين الشهر العاشر. وفاليوم لأول من الشهر العاشر ظهرو روس لكدا.

6 وعاڮب 40 يوم افتح النبي نوح الكوة اللي عدل فالسفينة. 7 ومشّا اغراب واتم طاير فوڮ لارض يلين بدات المياه تيبس عن لارض. 8 وعاڮب ذاك مشّا النبي نوح احمامة اياك يشوف إلى عادت المياه يبست عن لارض. 9 ولا اجبرت لحمامة ابليدة تنزل فيها بيهلي المياه مزالت امغطية لارض كاملة. ورجعت لحمامة شور النبي نوح فالسفينة. ومد ايدو واحكمها ودخلها شورو فالسفينة. 10 وحانا اسبعة أيام اخرين ومشّا لحمامة من السفينة مرة اخرا. 11 ورجعت شورو امع اغروب الشمس رافدة فخشمها ورڮة من صدراية الزيتون اجديدة. وافهم النبي نوح اعلن المياه مصتها لارض. 12 وحانا اسبعة أيام اخرين وبعدين مشّا لحمامة ولا رجعتلو هاذي المرة.

13 وفاليوم لأول من الشهر لأول من سنة 601 من حياة النبي نوح، فهاذا الوقت كانت المياه بدات تيبس عن لارض. وارفع النبي نوح مغطاية السفينة وشاف اعلن لارض تيبس حته. 14 وفاليوم 27 من الشهر الثاني يبست لارض تماما. 15 وكلم مولانا النبي نوح وڮالّو: 16 اوخظ من السفينة انتا واعيالك وأولادك واعليات أولادك. 17 ووخظ كل نوع من المخلوقات الحيين اللي امعاك، من الطيور والحيوانات والزواحف اياك يتوالدو فلارض ويكثارو. 18 وخاظ النبي نوح وأولادو واعيالو واعليات أولادو 19 والحيوانات والزواحف والطيور والمخلوقات اللي يتحركو اعلى لارض خاظو كاملين من السفينة بأنواعهم.

20 وابنا النبي نوح مذبح لله تعالى واڮبظ واحد من كل الحيوانات لحلال والطيور لحلال واذبحهم وڮدمهم لله تعالى كيفت قربان محروڮ اعلى المذبح. 21 واڮبلهم الله تعالى وارضا وڮال الله تعالى امبينو امع راصو: ماني لاهي نلعن لارض مرة اخرا بسبب لإنسان امع اعلن ميول ڮلبو شرير من صغرو. ولاني لاهي نكتل كل مخلوق حي مرة اخرا كيف ما عدلت. 22 ومادامت لارض موجودة لاهي يعودو فيها مواسم لحريثة والحصاد، البرد والحمان والصيف والشتا والنهار والليل. ولاهي يتم هاذا هو حالها إلى الأبد.