1 وڮال الله تعالى لأبرام: امشي من ارضك وقبيلتك ودار أهلك، وڮيس لارض اللي لاهي انعتلك. 2 ولاهي انعدل منك شعب عظيم، ولاهي انباركك، ولاهي انكبر اسمك، واتعود بركة لناس كاملة. 3 واللي يباركك يعود امبارك، واللي يلعنك يعود ملعون. ولاهي تتبارك القبايل كاملين اللي فلارض بسببك.

4 وڮام أبرام وعدل ذا اللي ڮالّو الله تعالى. وامشات امعاه ساراي اعيالو ولوط ول خوه من حاران. وفذا الوقت كان عندو أبرام 75 سنة. 5 وڮبظو امعاهم ادبشهم واعبيدهم اللي كانو فحاران، وامشاو واعدين ارض كنعان. وإلين وصلو ارض كنعان، 6 عاد أبرام يمشي من ابليدة شور ابليدة يجول فكنعان يلين اوصل لبليدة اللي فيها صدراية اكبيرة اسمها موري اللي خارج مدينة شكيم اللي ساكنين فيها الكنعانيين فذاك الوقت. 7 واظهر الله تعالى لأبرام، وڮالّو: لاهي نعطي هاذي لارض لنسلك. وڮام أبرام وابنا فم مذبح، ويڮدم فيه اذبايح لله تعالى اللي اظهرلو. 8 وعاڮب ذاك امشا من هاذي لبليدة واعد كدية فجيهة الشرق من لبليدة اللي اظهرلو الله تعالى فيها. وابنا خيمتو امبين بيت إيل اللي فالغرب ومدينة عاي اللي فالشرق. وابنا فم مذبح لله تعالى وصلى فيه. 9 ومن فم ڮيم ماشي واعد النقب اللي فالجنوب.

10 وإلين خلڮت جفاف فارض كنعان، ڮام أبرام وامشا واعد مصر يسكن فيها شي من الوقت بيهلي الجفاف كانت امتينة فلارض. 11 وإلين ڮرب من مصر ڮال لساراي اعيالو: آنا نعرف اعلنك امرة زينة، 12 وإلين يشوفوك المصريين لاهي يڮولو عنك اعيالي، ويكتلوني، ويمشو بيك امعاهم. 13 ڮوليلهم اصا عنك اختي ونسلكو من المشاكل ونجبرو العافية بسببك انتي. 14 وإلين ادخل أبرام مصر شافو أهل مصر اعلن اعيالو امرة زينة. 15 وشافوها املي عمال فرعون وخبرو فرعون بجمالها ، وامشاو بيها شور قصرو. 16 ولا ابخل شي من شي متعدل لأبرام بسبب ساراي، واعطاه لغنم ولبڮر ولحمير ولعبيد ولخدم والبل.

17 يغير ما ابطا فرعون يلين ابلاه الله تعالى هو وأهلو بامراض خطيرة بسبب اعلنو اكبظ ساراي زوجة أبرام وحاول يتعرص امعاها. 18 وڮام فرعون ومشّا لأبرام يجيه وڮالّو: انتا ذا اللي عدلتلي شنهو؟ اعلاش ما اتڮولي اعلنها اعيالك؟ 19 اعلاش اتڮولي اعلنها ختك اياك نڮبظها ونتخيم امعاها؟ ظرك اصا اسمع، اڮبظ اعيالك وامرڮ بيها. 20 وڮام فرعون ووصا اعليه ارواڮيج يصيفطوه هو واعيالو وكل أملاكو.