1 وإلين عاد أبرام عندو 99 سنة اتجلالّو الله تعالى وڮالّو: آنا هو مولانا القادر، امشي ڮدامي بطريڮ امسڮمة. 2 لاهي انعدل عهدي امعاك وانكثر نسلك حته. 3 وڮام أبرام واسجد ڮدام مولانا. واتكلم امعاه مولانا وڮالّو: 4 اراعيني لاهي انعدل عهدي امعاك ولاهي اتعود بو ياسر من لأُمم. 5 ومن ظرك ما اتلا ينڮالك أبرام اللي معاناه البو لمعظم ، يغير لاهي ينڮالك النبي إبراهيم اللي معناها بو ياسر من لأُمم. بيلي لاهي انعدلك منك ياسر من الشعوب. 6 ولاهي اتعود آراڮاج فايديتو ياسرة، ولاهي يتفرع من نسلك ياسر من الشعوب، ولاهي يوخظو من نسلك ملوك. 7 ويعود عهدي إلى الأبد امبيني وبينك وبين نسلك عاڮبك جيل اورا جيل. وانعودلك إله ولنسلك من بعدك 8 ونعطيك انتا ولذريتك من بعدك ارض كنعان كاملة، اللي اسكنتها متغرب، لكم الدهر كاملو وانعود إلههم. 9 وڮال مولانا للنبي إبراهيم: احفظ عهدي انتا وذريتك من عاڮبك مادامو حيين. 10 هاذا هو لعهد اللي امبيني وبينك وامبين ذريتك من بعدك اللي يالتكم تحفظوه: يُزيّنو الذكور كاملين اللي عندكم . 11 اتزينو كل اذكوركم كاملين واتعود علامة لعهد اللي امبيني وامبينكم. 12 اتمو زينو اذكوركم كاملين من بو 8 أيام اسوا من ذريتك وللا من ذرية حد مشري من فظتك ماهو من نسلك. 13 يالة يُزيّن كل اطفيل اخلاڮة فدارك وللا مشري بالفظة، واتعود علامة عهدي إلى الأبد فلحمكم . 14 واذكر اللي فيكم ما اُزيّن ينصاع من دار أهلو بيهلي خالف عهدي.

15 وڮال مولانا للنبي إبراهيم: وساراي اعيالك لا تيت اتڮولها ساراي من ظرك، يغير لاهي يعود اسمها سارة اللي معناها لأميرة. 16 ولاهي انباركها، ولاهي نعطيك اطفيل منها، ولاهي انباركها وانعدلها أم لياسر من الشعوب. ومنها لاهي يوخظ ملوك. 17 واسجد النبي إبراهيم واظحك وڮال امبينو امع راصو: اثرو يصح يخلڮ اطفيل لراجل بو 100 سنة ؟ واثرو يصح تبرا سارة وهي أم 90 سنة ؟ 18 وڮال النبي إبراهيم لمولانا: وإسماعيل ياريتو يُحظَر من بركتك . 19 وڮالّو مولانا: اللي لاهي تبرا هي سارة اعيالك، ولاهي يخلڮلك منها اطفيل، واتسميه إسحاق. لاهي انعدل عهدي إلى الأبد امعاه وامع ذريتو من بعدو. 20 أما اصا إسماعيل فأستجبت لطلبتك لو. لاهي انباركو حته، ولاهي يعود فايدتو ياسرة، ولاهي انكثر نسلو، ولاهي يعود بو للثاني عشر رئيس. ويعود شعب اكبير. 21 يغير عهدي لاهي يعود امع إسحاق اللي لاهي يجي من سارة كيف هاذا الوقت من السنة الجاية.

22 وإلين اوفا مولانا من لكلام امع النبي إبراهيم امشا عنو. 23 وفذاك النهار اڮبظ النبي إبراهيم ولو إسماعيل والذكور كاملين اللي خلڮو فدارو والذكور كاملين اللي اشرا، وزينهم، وعدل ذا اللي ڮالّو مولانا. 24 وكان النبي إبراهيم عندو 99 سنة وقت ازيانتو. 25 وإسماعيل ولو وقت ازيانتو عندو 13 سنة. 26 وتمت ازيانة النبي إبراهيم وإسماعيل 27 والذكور كاملين اللي خلڮو فدارو واذكور كاملين اللي اشرا فنفس اليوم.