1 وجاو الملايكة لأثنين لمدينة سدوم امع اغروب الشمس. وذا الوقت كان لوط ڮاعد احذا بوابة سدوم. وإلين شافهم ڮام واڮف واعدهم يستقبلهم ، واسجد بوجهو اعلى التراب إحترام لهم. 2 وڮال: يا شيوخي استراحو وباتو فدار عبدكم اياك اتقضو ليلتكم وتغسلو كرعيكم، وامع الصباح اتواصلو اطريڮكم. وڮالولو: ابدي لاهي انقضو ليلتنا لڮدام. 3 يغير لوط الح اعليهم يلين ڮبلو يمشو امعاه ويباتو فدارو. وعشاهم واخبزلهم امبورو وكالو.

4 وسابڮ يرڮدو اجتمع اعليهم اكهولة وفڮاريج مدينة سدوم ڮدام الدار. 5 وعيطو لوط وڮالولو: وين هوما الرجالة اللي بايتين عندك الليلة ؟ وخظهم شورنا اياك انلوطوهم. 6 وخاظ شورهم لوط واڮفل الباب اوراه 7 وڮال: لا اتعدلو المعصية يا خوتي. 8 اراعي عندي منتين اعزيبات. لاهي انوخظهم لكم اياك اتعدلو امعاهم اللي تبغو. أما اصا ذو الرجالة لا اتعدلولهم شي ما ينفع بيهلي ضيوف عندي. 9 وڮالولو: اكحز ابعيد عنّا ! وڮالو املي: ذا آرڮاج اللي جا يسكن عندنا عاد هامو يتحكم فينا. ظرك اصا لاهي انعدلولك شي أطم منهم هوما. واتڮدمو واعدين لوط لاهي يدڮدڮو الباب. 10 فذا الرجالة اللي هوما خطار لوط مدو ايديهم وحكموه ودخلوه وسط الدار، وڮفلو الباب. 11 وخبطو بلعما ارواڮيج اللي كانو واڮفين ڮدام الباب، اصغيرهم واكبيرهم، يلين عاد قالبهم يجبرو بل امنين الباب.

12 وڮالّو الرجالة لأثنين للوط : مندرا يكان عندك أقارب فلمدينة: انساب وللا أولاد وللا امنات وللا أي آراڮاج اوخر اڮريب منك؟ وخظهم من هاذي لمدينة 13 بيهلي نحنا هامنا اندمرو هاذي لبليدة بيهلي كثرة الشكوى من شرها عند الله تعالى، وارسلنا اياك اندمروها. 14 وامشا لوط يعلم الرجالة اللي كانو لاهي يتخيمو امع امناتو وڮالّهم: ڮومو الفوڮ واوخظو من هاذي لبليدة بيهلي الله تعالى لاهي يدمر هاذي لمدينة. ولا جد اعليهم اكلامو.

15 وإلين عاد الفجر الحو الملايكة لأثنين اعلى لوط وڮالولو: ڮوم الفوڮ واڮبظ اعيالك وامناتك اللي امعاك اياك ما تهلك بسبب اثام أهل لمدينة. 16 يغير يلين ابطا لوط حكمو الرجالة بايديه وايدين اعيالو وامناتو وامشاو بيهم شور ڮدام لمدينة بيهلي الله تعالى اشفق اعليهم. 17 وإلين وخظوهم ابعيد ڮال واحد من الملايكة للوط: سلك روحك ولا اتخرص اوراك ولا توڮف فذي لبليدة كاملة. اهرب اعلى جيهة لكدا اياك تسلك. 18 وڮال لوط: لا اتواسيلي ذاك يا شيخي، 19 انتا اعرفتلي شي واهتميت بيَّ وسلكتني من الموت. يغير آنا ما انڮد نلجا فلكدا خايف من يخلڮلي شي وانموت. 20 اراعي مدينة اڮريب انڮد نهرب شورها. وهي مدينة اصغيرة وخليني نلجا شورها. امالها مدينة اصغيرة حته؟ وانڮد نسلك فيها بروحي؟ 21 وڮالّو الملاك: آنا اڮبلت طلبك ولاني لاهي اندمر ذي لمدينة الصغيرة. 22 اهرب شورها بالعجلة بيهلي ما انڮد انعدل شي لسدوم سابڮ توصل انتا لهاذي لمدينة الصغيرة. ولهاذا السبب اُسمات هاذي لمدينة باسم صوغر اللي معناها الصغيرة.

23 وإلين ظهرت الشمس اعلى لارض، الحڮ لوط صوغر. 24 وفذا امطر الله تعالى اعلى سدوم وعمورة كبريت ونار من السما. 25 واحرڮ الله تعالى ذيك لارض واللي ساكنين فيها والوديان اللي حذاها وكل ارضهم كاملة اللي محروثة. 26 واتلفتت اعيال لوط اللي كانت اوراه بيها اڮبيظ لقبة واتحولت شور اعمود من الملح .

27 وامشا النبي إبراهيم امع الصباح شور لبليدة اللي وڮف فيها ڮدام الله تعالى. 28 وخرص اعلى جيهة سدوم وعمورة واعلى لارض اللي امجاورتهم وشاف الدخان طالع اعلى شكل اعمود. 29 وعاڮب ما دمر مولانا هاذي لبليدة، ما انسا وعدو للنبي إبراهيم ووخظ لوط سابڮ يدمر لمدينة اللي كان ساكن فيها.

30 وعاڮب ما دمر مولانا سدوم وعمورة، امشا لوط وامناتو من صوغر، واسكنو فلكدا بيهلي كان خايف من السكن فصوغر. والجا هو وامناتو فامغارة فالكدية. 31 وڮالت منتو لكبيرة لختها الصغيرة : نحنا بونا يستكهل ولارض ما اتلاو فيها رجالة يتخيمو امعانا كيف الناس كاملة. 32 اتعالي اصا نسڮوه شي من الخمر ونتكو امعاه اياك ما تنڮطع ذرية بونا. 33 واسڮاو الخمر لبوهم فذيك الليلة، وڮامت المنت لكبيرة واتكات امعاه . ولا حس لوط بتكيها امعاه ولا اڮيامها. 34 وفانهار اللي اوراه ڮالت المنت لكبيرة لختها الصغيرة: آنا اتكيت امع بويَ البارح . وهاي نسڮوه الخمر هاذي الليلة املي وتدخلي شورو انتي وتتكي امعاه، ونجبرو من بونا ذرية. 35 واسڮاو بوهم الخمر فذي الليلة الثانية وڮامت المنت الصغيرة واتكات امعاه. ولا حس لوط بتكيها امعاه وللا اڮيامها. 36 وبهاذا السبب حملو امنات لوط من بوهم. 37 وابرات المنت لكبيرة اعلى اطفيل سماتو مؤاب اللي معناه من بويَ، وهو بو قبيلة المؤابيين إلى اليوم. 38 والمنت الصغيرة ابرات املي اعلى اطفيل وسماتو بن عمي اللي معناه ول أهلي، وهو بو قبيلة بني عمون إلى اليوم.