1 وعاڮب هاذي لحداث انعم الله تعالى اعلى سارة واعطاها ذا اللي وعدها بيه. 2 وحملت سارة وابرات اعلى اطفيل لإبراهيم فنفس الوقت اللي ڮط ڮالّو مولانا. وكان النبي إبراهيم فذا الوقت مستكهل حته. 3 وڮام النبي إبراهيم وسما اطفيلو اللي اجبر من سارة إسحاق. 4 وڮام زيّنو فاليوم الثامن كيف ما اطلب مولانا. 5 ووقت اخلاڮة إسحاق كان النبي إبراهيم عندو من لعمر 100 سنة. 6 وڮالت سارة: آنا ظحكني مولانا. وكل الناس اللي تسمع ذي اللي اخلڮ يظحكو هوما املي. 7 وڮالت سارة املي: من كان يڮد يڮول للنبي إبراهيم اعلن سارة لاهي اترظع أولاد؟ واراعيني آنا ابريتلو اعلى اطفيل فاستكهيلو.

8 واكبر إسحاق وانفطم وعدل النبي إبراهيم وقت فطيم إسحاق ندوية اكبيرة. 9 وفواحد من انهارات شافت سارة اعلن إسماعيل ول هاجر المصرية يجوق فإسحاق. 10 وڮالت سارة للنبي إبراهيم: صوع هاذي الخادم هي وولها بيهلي ول هاذي الخادم ماني ڮابلتو يورث امع ولي إسحاق. 11 ولا ازيان هاذا عند النبي إبراهيم اعلى أساس ولو إسماعيل. 12 وڮال مولانا للنبي إبراهيم : لا تنفڮع من امردة الطفيل وأمه. واسمع لكلام سارة وعدل ذا اللي ڮاتلك بيهلي من إسحاق اتعود لك ذرية. 13 ولاهي نجعل من ول الخادم املي أمة اكبيرة بيهلي هو من ذريتك. 14 وانهار من غد ڮام النبي إبراهيم امع الصباح واڮبظ شي من امبورو وڮربة ماء واعطاهم لهاجر ودارهم اعلى اكتافها وصاعها هي امع اطفيلها. وڮيمت ماشة وذهبت فخلوات بئر السبع. 15 وإلين افرق اعليها ماء لڮربة، طرحت الطفيل تحت وحدة من الصدرايات. 16 وڮعدت امڮابل 100 متر ڮدامو بيهلي ڮالت: ما نبغي نحظر الموت اطفيلي . وڮعدت تزڮي وعادت تبكي. 17 واسمع مولانا بكي الطفيل، وفذا عيط ملاك مولانا لهاجر من السما وڮالها: انتي اشفاڮعك يا هاجر؟ لا تخافي بيهلي مولانا اسمع بكي الطفيل من لبليدة اللي فيها. 18 ڮومي ورفديه وضميه شورك. بيهلي لاهي انعدلو أمة اكبيرة. 19 وافتح مولانا عينين هاجر ونعتلها حاسي من الماء. وامشات واملات لڮربة واسڮات الطفيل. 20 وكان مولانا امع الطفيل. وإلين اكبر إسماعيل، اسكن فخلوات فاران وعاد اخباري فارماية السهم. 21 وعرستو أمو امع امرة مصرية.

22 وفذا الوقت ڮال أبيمالك وقائد جيشو فيكول للنبي إبراهيم: نحنا لاحظنا اعلن مولانا امعاك فكل شي اتعدلو ، 23 واندورك ظرك تحلفلي اعلى مولانا اعلنك مانك لاهي تغدر بيَّ ولا تغدر بنسلي ولا أولادي، واحلفلي اعلنك لاهي تعرف شي لشعبي اللي اتغربت بينهم كيفما آنا احسنت اعليك. 24 وڮال النبي إبراهيم: راني حالفلك .

25 وعاتب النبي إبراهيم أبيمالك اعلى أساس الحاسي اللي ڮبظوها اعبيد أبيمالك بالقوة. 26 وڮال أبيمالك: آنا ما نعرف من اڮبظ هاذا الحاسي، وانتا املي ما ڮلتلي من اڮبظها. وأول مرة نسمع بذا هو اليوم. 27 وفذا اعطا النبي إبراهيم لأبيمالك اغنم وابڮر واڮطع كلهم امع لوخر عهد. 28 وعزل النبي إبراهيم اسبع انعاج من غنمو اعلى زر. 29 وڮالّو أبيمالك: شنهي الغاية من اعزيل هاذو اسبع انعاج وحدهم؟ 30 وڮالّو النبي إبراهيم: هاذو اسبع انعاج انڮدمها بين ايديك تشهد اعلني آنا هو اللي احفرت هاذي الحاسي. 31 ولهاذا السبب سما هاذي لبليدة بئر السبع اللي معناها حاسي الحلفة. بيهلي أبيمالك والنبي إبراهيم كل واحد منهم احلف فم. 32 وبهاذي الطريقة ڮطعو لأثنين عهد امبيناتهم فبئر السبع. ومن فم ڮام أبيمالك وفيكول قائد جيشو ورجعو شور ارض الفلشطيميين. 33 واغرس النبي إبراهيم نوع من الصدر كيف الڮنات فبئر السبع وصلى فم لله تعالى للإله اللي كان موجود سابڮ كل شي. 34 واسكن النبي إبراهيم فارض الفلشطيميين ياسر من الزمن.