1 Mətsetser à akul lakəl aŋa gay aŋa sifa, uwana agà la ahəŋ dagay la madzəka gudəŋ à vok. Mətsənàŋ, mənəŋàŋ la yewdi gami, ŋgaha mətsə̀kal yewdi à gay, ŋgaha bay mədəɓanì la ahàl gami aya. 2 La mok uwana sifa uwaga adasa à waŋ à gudəŋ à vok, mənəŋàŋ, gay gà la uwaga məpəh à akul lakəl aŋha, ŋgaha məzà­kulla sifa uwana adəv à gay aw, nekwa la slaka Zəzagəla, Baba gami, sifa uwatà apə̀ha­nula vok la paraka. 3 Tatak uwana mənənàŋ, ŋgaha la uwana mətsənàŋ, məta­pa­kulla, kà akul aŋa magay tekula la maham gay à vok la abà, la Baba, ŋgaha la Kona aŋha Yesu Kristu. 4 Mətsetser à akul tatak uwanay kà anu aŋa mavalàh à zagəla la marabay.

5 Aganay uwana Yesu atà­pa­nula, ŋgaha uwaga la uwana məta­pa­kulla babay, Zəzagəla kà uɗaka, tetuwa mələs la ahəŋ la masla la abà aw. 6 Baŋa məgoɗay kà mədahama gay à vok la masla, ama məda à huma à gay la madz à ahəŋ la mələs la abà kà, mədaɗah fida la gay la abà, ŋgaha la sləray la abà. 7 Ama baŋa mədza à ahəŋ la uɗaka la abà, bokuba uwana Sufəl gami adza à ahəŋ la uɗaka la abà, anu la maham gay à vok la azladza anik, kiya uwaga kà, aŋiz aŋa Yesu, Kona aŋha, apalla tsakana gami gesina.

8 Baŋa: ‘Anu azlaməna tsakana aw’, məgoɗ kà, mədà­vavar gəl gami, ŋgaha kà dziriga la ahəŋ la anu la abà aya aw. 9 Ama baŋa məpəhla tsakana gami à Zəzagəla, məslala vok, məfa gəl à masla à afik. Kà uwana aɗahà sləray kà la tetəvi aŋha. Dziriga, adàmats tsakana gami ala, ŋgaha adàpalanula mawi­siga gami ala gesina. 10 Baŋa: ‘Anu azlaməna tsakana aw’, mədapaka Zəzagəla ala bokuba masla fida, gay aŋha azlak anu aya aw.