5
Azlamasiga aŋa azlatuwaŋ aŋa Zəzagəla
1 Lagonay gəpəhay kà à akul azlamasiga uwana la tataka aŋkul la abà. Gi babay kà, gi masiga bokuba akul: Mok uwana tasà ŋgərpa à Kristu kà, gənəŋàŋ, gətàp gay gəl à ahàl à abà, məkalàŋ mazləɓay aŋa Kristu uwana Zəzagəla apə̀hanula, kà uwaga à uwana ‘Kamkam’, gəgoɗ akul: 2 Fàw sləm à azladza aŋa Zəzagəla, uwana aɓə̀k à akul atà à ahàl: Ɗahàwwàŋ kiya uwana masla manəŋla azlatuwaŋ af sləm à azlatuwaŋ aŋha; fàw à atà sləm la ləv tekula, bokuba uwana asa à Zəzagəla. Kaɗahàwwàŋ la ləv səla aw, kaɗahaw sləray kà maɓəzal sili pəra aw. Ɗahàw sləray uwaga la ləv aŋkul gesina. 3 Kakoraw la ndzəɗa lakəl aŋa azladza uwana Zəzagəla aɓə̀k à akul atà à ahàl aŋkul aw, fàw à atà sləm. Ama kà nəfàw maday delga kà mapəhatàla maday delga. 4 Baŋa kaɗahawwaŋ kiya uwanay kà, la kaslà uwana məŋ Sufəl aŋa azlaməna manəŋla azlatuwaŋ adàsa à waŋ, akul, azladza uwana kaɗuwaw atà kadàɓəzawwal la ahàl aŋha masik məŋga gà, uwana aɗuwa azlatatak anik gesina, uwana akàl atsal à adi ala aw, adàdza à ahəŋ aŋa koksikoksi. 5 Gəgoɗ à akul azladza meɗega: Hòyàw yewdi aŋa azlamasiga aŋkul, kapakaw azlaməna zlapay aw, ɗahàw vok sləray kà akul à akul, uwaga kà bokuba uwana tatsetsèr à wakità Zəzagəla à abà:
ˈZəzagəla kà apəsew azlaməna zlapay, ama aɗàh delga à azladza tələmmaga.ˈ✡5.5 Haŋkəli 3.34
6 Kà uwaga à uwana gəgoɗ à akul: Wulàwla gəl à vəɗah la huma aŋa Zəzagəla, uwana akoray lakəl aŋa tatak gesina, baŋa kaɗahawwaŋ kiya uwaga kà, la mok uwana kaslà adàsa à waŋ, masla adàzigən akul. 7 Azlatatak gesina uwana azlazlazlaɗa kà aŋkul kà, ɓə̀kàw atà à ahàl aŋa Zəzagəla, kà uwana masla afa à akul sləm. 8 Dzàw à ahəŋ mazil à zil, kadzewhal aw. Masla məzam aŋkul, seteni kà, masla la uwaga auguzahay, ayàh dza kà makəsay bokuba sikalaveri uwana awiyay, ayàh tatak may. 9 Kiya uwaga kavàwwal tetəvi aw, dàw à huma à gay la mav ləv aŋkul à Zəzagəla. Sə̀làw, kà azladeda aŋkul uwana la tetəvi aŋa Zəzagəla la tsəh la gudəŋ la vok gesina tasa ŋgərpa babay bokuba aŋkul. 10 Baŋa kasaw ŋgərpa kà aŋa kaslà ŋuv kiya uwaga, Zəzagəla uwana aɗahaha delga koksikoksi, masla, la gəl aŋha adàɗahaha akul à ahəŋ, adàvà à akul ndzəɗa kà akul aŋa masakiya à tetəvi la tsəh ala aw. Azalà akul, aŋa maday à mazləɓay aŋha à abà, uwana adəv à gay aw, la ahàl aŋa Kristu. 11 Masla la uwana la maslay aŋa tsəràh à awtày. Amen.
Gay makəɗ gəl à ahəŋ
12 Silas azlakà gi matsetser bəzi wakità uwanay. Gəsəl kà masla dza dziriga la tetəvi aŋa Zəzagəla la ama. Gətsetsèr à akul kà gədzərəɗàh akul à uda, ŋgaha bay aya, gəgoɗ à akul la paraka ndzer, mazləɓay aŋa Zəzagəla kà bokuba uwana gəpə̀h à akul. Wàɗàw ləv ala la azlatatak uwaga la abà gesina. 13 Maham à ahəŋ məna gay Zəzagəla la abanay la Babila, uwana Zəzagəla atsatsàmànì atà, bokuba uwana atsatsàmànì akul babay, ‘Ayyi’, tagoɗ à akul. Mark uwana Kona gulo, avà à akul ‘Ayyi’ aŋha babay suwaŋ. 14 Ɗahàw vok ‘Ayyi’, kà akul à akul, la mawoy vok la abà.
Zəzagəla avà à akul lapiya, à akul gesina, uwana akul la ahàl aŋa Kristu.