3
Yesu kà aɗuwa Musa
1 Azladeda, la kità Zəzagəla babay atsatsàmànì akul kà akul aŋa magay tsəhay aŋha. Baməraka la uwaga kà, fàw vok aŋkul à Yesu à afik, masla la uwana Zəzagəla aslə̀l à waŋ kà masla aŋa magay məŋ madzahaga aŋa madiŋal gəl à vok gami, uwaga masla la uwana, masla masəlla anu vok la Zəzagəla, uwanay la uwana məziŋ la dazuwaya. 2 Yesu kà dza delga la slaka Zəzagəla, uwana akə̀sànì kà maɗehəŋ sləray uwanay, bokuba Musa uwana agà delga la sləray aŋha la abà uwana aɗahàŋ, kà aŋa azladza huɗ gày aŋa Zəzagəla babay. 3 Tazləɓ dza uwana aŋàl gày ɗaɗuwa à gay gày la gəl aŋha. Lakəl aŋa Yesu la Musa babay kà kiya uwanay. Masləkaway uwana məsləkaw Yesu kà, aɗuwa aŋa Musa. 4 Ndzer, azlagày gesina kà, dza la uwana aŋalàh atà, ama dza uwana aɗahà tatak gesina kà Zəzagəla. 5 Haɗay, Musa kà aŋa masla sləray aŋa Zəzagəla uwana aɗahàhàŋ lela la huɗ gày aŋha gesina kà, sləray aŋha kà apahla à azladza azlatatak uwana Zəzagəla adàpəhay la huma la gay. 6 Ama aŋa Kristu kà, ndzer masla Kona aŋha, uwana anəŋla huɗ gày aŋa Baba, bokuba magoɗay, masla kà lela la tsəhay sləray aŋatà uwana la abà, aɗehəŋ babay. Anu tsəhay aŋha, anu babay kà anu azlaməna huɗ gày aŋha, à baŋa məda à huma à gay la mawaɗ vok à uda, məfa madzugway gami à azlatatak uwaga à afik la marabay, tsəràh à makəɗ gəl à ahəŋ
Zəzagəla adav maduw ləv à tsəhay aŋha
7 Gay gà la uwaga Masasəɗok Zəzagəla agòɗ:
ˈ‘Lakana baŋa katsənaw kuda aŋa Zəzagəla kà,
8 Tsə̀ɓàwwal sləm. Kadzadzaŋaw gəl ala, bokuba uwana uwarà azlababa aŋkul madzidziga taɗahàhàŋ aw, la kaslà uwatà, atà la fəta la abà, tadzà à ahəŋ la abà mavay dzik ufaɗ. Atà kà, tapəsèw Zəzagəla, ŋgaha tagùr masla.
9 Tanəŋà azlatatak dzəɓa aŋha səla aw gà uwana aɗahàhàŋ, dagay mavay dzik ufaɗ bay, tagùrla.
10 Gay gà la uwaga, ləv azàŋ à gi lakəl aŋa azladza uwaga. Gəl adakaɗ à atà à vok, tatsə̀n tetəvi gulo dadàŋ.
11 Kà uwaga à uwana gəfàh akur à ahəŋ, la magoɗ à azladza uwaga kà: Tetuw kadàdiya à slaka maduw ləv gulo à abà aw!’ˈ,✡3.11 Mahabay 95.7-11
Zəzagəla agòɗ. 12 Azladeda gulo, ɗahàw haŋkəli kà dza la tataka aŋkul kà aŋa magay la ləv mawisiga, ŋgaha kokuɗa madiŋal gəl à Zəzagəla à vok aya, kà masla aŋa masakiya à masla uwana la tsəh ala la sifa aw. 13 Ama tsatsəhàhàw vok ala kà akul à akul koksikoksi, kà seteni aŋa mavavar akul à mawisiga à abà aw, ŋgaha kà akul aŋa magay azlaməna mapəseway babay aya aw. Dàw à huma à gay la maɗehəŋ kiya uwanay koksikoksi, kà uwana lakana kà, Zəzagəla asal maɓaɗma à anu à ama aya. 14 Baŋa anu məda à huma à gay la makəs azlatatak uwana mədiŋal gəl à vok, dagay la madzəka tsəràh à makəɗ gəl à ahəŋ kà, kiya uwaga haɗay, mədàgay azladza aŋa Kristu.
15 Aganay à uwana tatsetsèr à wakità Zəzagəla à abà:
ˈBaŋa katsənaw kuda aŋa Zəzagəla lakana kà, kadzadzaŋaw gəl ala, bokuba uwana kadadzadzaŋawwaŋla uwarà.ˈ✡3.15 Mahabay 95.7-8
16 Azlauwa azladza uwana tatsənà kuda aŋha, ŋgaha tapəsèw uwa? Ndzer, azladza gesina uwana dagay uwarà Musa aguwà à atà à huma kà masəlla atà à uda la gudəŋ Misəra. 17 Kà madegolay ma, uwa à uwana Zəzagəla agà magurayga mavay dzik ufaɗ uwa? Ndzer kà, atà azladza uwana taɗahà tsakana. Kà uwaga à uwana tamàts à fəta à abà. 18 Kà azlauwa? Kà azladza uwaga à uwana: ‘Gəfàha akur à ahəŋ kà la tetuwa tadàɓək asik à slaka gulo uwana à abà gədàduw ləv aw’, agòɗ. Ndzer uwaga kà, kà azlauwana takweskà gay aŋha. 19 La kiya uwanay kà, azladeda gulo, mənəŋaŋ kà taɓə̀k asik à slaka maduw ləv à abà aw kà, kà uwana tadìŋ gəl à Zəzagəla à vok aw.