1 La vərdi anik, Yesu ahàd à gày madəv kuɗa à agu aya. La gày uwatà la aku kà, dza la ahəŋ uwana ahàl aŋha mamətsayga. 2 Azladza la ahəŋ la gày madəv kuɗa la aku, tanərə̀z Yesu à baŋa awur dza ala la vuɗ maduw ləv, kà atà maɓəzal à tsəh la gay la abà, kà uwana akə̀s mapəhay lakəl aŋa vuɗ maduw ləv aw. 3 Yesu agòɗ à dza uwana ahàl aŋha mamətsayga: “Sà à afik, sà à waŋ à huma azladza gesina!” 4 Ŋgaha anàv azladza uwana tatsə̀kal yewdi à gay: “Mana wakità seriya gami apəh à anu ma? Tetəvi la ahəŋ kà maɗàh delga la vuɗ maduw ləv takay? Awma maɗàh mawi­siga takay?” Asà à atà mawulla gay à uda aw. Takwès. 5 Yesu atsəkà à atà yewdi à gay la mazinal à gəl. Ama apàk ləv məŋga kà madzugway mawi­siga aŋatà. Kiya uwaga agòɗ à dza uwatà: “Biyà ahàl ala!” La kirim yewdi awùr ala. 6 Batsàrà, uwana azla Farisəya tanə̀ŋ uwaga kà, tasà à uda la gày Zəzagəla la aku, tahàd, tahamà gay à vok la azladza maham à ahəŋ gà uwana tatsə̀n vok gay la Herod kà aŋa magəɗ uwana à afik azlayla makəɗla Yesu.

7 Yesu la azlaməna matapla aŋha tazà vok. Tahàd à gay dərəv aŋa Galili, maham à ahəŋ dza aŋuvaw tanəfà atà. Azladza tasàhà à waŋ la makoray Galili, la Yahu­diya, 8 la Uru­sa­lima dagay la gay dzika makoray aŋa Idumiya tsəràh à gay dzika aŋa dərəv uda aŋa mukwà Urdun, la azladza uwana tadzà à ahəŋ nekwa la gudəŋ Tir la Sədon. Magol maham à ahəŋ dza tasàhà à waŋ à slaka Yesu kà uwana tatsənàŋ lakəl aŋa tatak uwana aɗa­hàhàŋ. 9 Yesu agòɗ à azlaməna matapla la slaka aŋha: “Yàhàw à gi bəzi kəslah iyaw, kà maham à ahəŋ dza aŋa maŋisl gi aw.” 10 Yesu awurà azladza ala aŋuvaw, gay gà la uwaga azladza uwana tasà ŋgərpa la azla­ɗu­vats anik anik tavàhà vok kà madəɓani masla. 11 La mok uwana azladza uwana la azla­ma­sasəɗok mawi­siga tanəŋà masla, tatàɗal à huma la mawiyay, tagòɗal: “Kak, Kona aŋa Zəzagəla!” 12 Ama Yesu asləhà atà məl à gəl la ndzəɗa, kà mapəhla masla ala aw.

13 Yesu ahàd à dadəgwal à afik, ŋgaha azàl azladza uwana asàl, kà tatsà à waŋ à slaka aŋha. 14 Yesu akàsànì azladza kulo gəl aŋha səla, ŋgaha azàla atà ala azlaməna matapla la slaka aŋha, agòɗ à atà: “Gəkà­sànì akul kà madz à ahəŋ la slaka gulo, ŋgaha gədàslal akul kà mapàh gay Zəzagəla. 15 Gəvà à akul maslay kà makuɗəkàh azla­ma­sasəɗok mawi­siga.” 16 Aganay azladza kulo gəl aŋha səla uwana akàsànì atà: Səmon uwana Yesu avàl sləm Piyer; 17 Yakuba la deda aŋha Yuhana, azlabəza aŋa Zebede. (Yesu avà à atà sləm Bowa­ner­gəs, asal magoɗay: masləh məl aŋa habaga, kà uwana tasaf à mapak ləv aw) 18 La Andəre; Filip; Barte­lemi; Mata; Tomas; Yakuba, bəzi aŋa Alfe; Tade; Səmon zil Kananan 19 ŋgaha Yudas Iska­riyot, uwana adàda kà məzam à Yesu à gəl.

20 Yesu ahàd à mtəga aŋa dza anik. Maham à ahəŋ dza tahamà gay à vok aya, kà uwaga à uwana Yesu la azlaməna matapla la slaka aŋha taɓəzà tetəvi kà mazuw tatak may aw. 21 Mok uwana azlaməna huɗ gày aŋha tatsə̀n uwaga, tahàd kà masəla à mtəga, kà uwana azladza tagòɗ kà: “Gəl ada­kaɗal à vok!”

22 Azla­ma­dza­haga aŋa wakità seriya tasà à ahəŋ la Uru­sa­lima tagòɗ: “Masla la Bel­zəbul, sufəl aŋa zagəla zagəla!”, asal magoɗay sufəl aŋa azla­ma­saɗok mawi­siga. Azlaanik tagòɗ: “Sufəl aŋa azla­ma­sasəɗok mawi­siga avàl maslay kà makuɗək azla­ma­sasəɗok mawi­siga.” 23 Yesu azàl azladza à slaka aŋha, agòɗ à atà: “Kakay sufəl aŋa masasəɗok mawi­siga aslala vok aŋa makuɗək seteni à uda aya ma? Akəsà vok aw. 24 Baŋa azladza la makoray tekula tatsak ala kà, makoray sufəl uwatà kà aslala vok madz à ahəŋ aw. 25 Baŋa azladza la huɗ gày tatsak ala kà, huɗ gày uwatà aslala vok madz à ahəŋ aw. 26 Baŋa seteni ap guvəl à vok aŋha à adi kà, makoray aŋha ada­vahla, aslala vok aŋa madz à ahəŋ aw, ama makoray uwaga adàdəv à gay. 27 Dza aslala vok aŋa mad à gày aŋa masla ndzəɗa kà mazəɓ tatak aŋha aw, say atsərkwiŋ dadàŋ, ŋgaha aslala vok kà mahəl tatak aŋha gesina. 28 Gəpəh à akul la dziriga: Tsakana gesina la gay mawi­siga gesina uwana azladza tapəhay, Zəzagəla adà­ma­tsataŋ ala. 29 Ama dza uwana apəh mawi­siga lakəl aŋa Masasəɗok Zəzagəla kà, tsakana uwaga adà­ma­tsila ɗiki­ɗiki aw, ama tsakana uwaga adàdza à ahəŋ aŋa koksi­koksi.” 30 Yesu apə̀h kiya uwaga kà, kà uwana azlaanik tagòɗ kà: “Masla la masasəɗok mawi­siga”, tagòɗ.

31 Iyà la azla­deda aŋa Yesu tasà à waŋ, taslə̀l dza kà mazal à atà la uda. 32 Azladza aŋuvaw tadzàhà madzay la makəla aŋa Yesu, tagòɗal: “Iyà la azla­deda aŋak la uda, tazala ka!” 33 Yesu awùl à atà ala: “Uwa iyà gulo la azla­deda gulo uwa?” 34 Ŋgaha Yesu anərə̀z azladza uwana la makəla aŋha lakəl, agòɗ à atà: “Aganay azlaiyà la azla­deda gulo la abanay. 35 Kà uwana kəla uwa­be­yuwi uwana aɗàh mawoyəŋ aŋa Zəzagəla la uwana azla­deda gulo la azlaiyà gulo.”