1 Mok uwana atà nekwa la Uru­sa­lima, bokuba la bəza gudəŋ Betfaze la Be­ta­niya, tabəzà à gudəŋ kuvu à afik. (Uwana tazalalla la gay nasara gudəŋ Oliviye) Yesu aslə̀l azlaməna matapla aŋha səla à huma, agòɗ à atà: 2 “Dàw à gudəŋ uwaga à abà la huma aŋkul. Kadàɓəzaw à ziwŋŋu ŋuvga mawaɗəŋ à ahəŋ gà uwana dza adadza à afik ɗiki­ɗiki aw. Pə̀làw, kasawgəla à waŋ! 3 Baŋa dza agòɗ à akul: ‘Mana kaɗa­hawlaŋ mi?’, kago­ɗawwal: ‘Asa à Sufəl gami, adà­ullàlla à waŋ katskats’.”

4 Tahàd, taɓəzà à ziwŋŋu mawaɗəŋ à ahəŋ gà à gəl la gay gamagày, la gay tetəvi. Uwana tapə̀l ziwŋŋu uwatà kà, 5 azladza anik uwana la abatà, tanàv à atà gay ala: “Mana kaɗa­hawllaŋ ma? Kà aŋa ma kapəlaw bəzi ziwŋŋu uwaga ma?” 6 Tawùl ala bokuba uwana Yesu apə̀h à atà, ŋgaha azladza tasàk atà. 7 Tasə̀lla bəzi ziwŋŋu uwatà à Yesu à waŋ, taɓə̀kal lukut aŋatà à lig, ŋgaha Yesu adà à afik. 8 Azladza aŋuvaw tadàw lukut aŋatà à tetəvi à ama, azlaanik tatsàɗ baɓasl biyaga uwana la guf la abà, taslàh à tetəvi à ama kà masləkaway. 9 Azla­uwana la huma aŋa Yesu, la azla­uwana tanəfay la tsəh, tawiyà la magoɗay: “Delga kà azladza tazləɓ Zəzagəla, mapis gay à vok agay la dza uwana atsà à waŋ la sləm aŋa Sufəl.✡11.9 Mahabay 118.25-26 10 Zəzagəla apis gay à makoray aŋa baba gami David à vok, uwana adadzəka vok lagwa. Məzləɓà Zəzagəla uwana la zagəla la afik kərkər!”

11 Kiya uwaga Yesu ahàd à gudəŋ Uru­sa­lima, kà mad à gày Zəzagəla à agu, anaŋà azla­tatak gesina lela. Uwana gay mokokhu adagay, ahàd à gudəŋ Be­ta­niya la azlaməna matapla aŋha kulo gəl aŋha səla uwatà.

12 Lebəŋ gà, uwana tasà à uda la gudəŋ Be­ta­niya, may akə̀s Yesu. 13 Anəŋà gudəv la baɓasl la vok, ŋgaha ahàd kà mayàh mayyay la vok aŋha. Ama uwana ada­bəziya à tsəh aŋha kà, aɓəzà mayyay la vok aŋha aw, say baɓasl pəra, kà uwana kaslà aŋa gudəv dadàŋ aw. 14 Yesu agòɗ à gudəv: “Dza adàzuw mayyay la vok aŋak aŋa tetuwa aya aw!”

Azlaməna matapla la slaka aŋha tatsənà gay uwaga.

15 Uwana tabə̀z à Uru­sa­lima, Yesu ahàd à məŋ gày Zəzagəla à agu. Adzəkà makuɗəkàh azlaməna tsa­kalay à uda, la azlaməna masukw tatak la gày Zəzagəla la aku. Adakwà azla­table aŋa azlaməna maɓaɗla sili à ahəŋ la azla­slaka madza madzay aŋa azlaməna madaw haba­koku ala. 16 Asà kà dza baməraka tekula aŋa mad à gày Zəzagəla à agu la tatak lakəl aw. 17 Atapla tatak à azladza, agòɗ: “Aganay uwana tatsetsèr à wakità à abà, Zəzagəla agòɗ:

18 Azlaməŋga aŋa azlaməna mav tatak à Zəzagəla, la azla­ma­dza­haga aŋa wakità seriya aŋa Zəzagəla tatsənà gay uwatà. Gay gà la uwaga tayàh Yesu kà maziŋ ala. Ama guba akə̀s atà kà masla, kà uwana ləv avàl à azladza à gay gesina kà gay aŋha.

19 Uwana mokokhu adasa à waŋ, Yesu la azlaməna matapla la slaka aŋha, tasà à uda la gudəŋ la abà.

20 La gay bebəŋ bəŋ uwana tadùw à awtày la abatà, tanəŋà gudəv uwatà aya, adagul à afik la slilih gà gesina. 21 Awùl à Piyer à gəl, agòɗ à Yesu: “Məŋga gulo, nəŋà gudəv uwana katsàfla, kà adagul à afik tsi!” 22 Yesu awùlla à atà ala: “Haɗay, gəgoɗ à akul, baŋa kadiŋaw gəl à Zəzagəla à vok kà, 23 kaslawwal à vok aŋa magoɗay à gudəŋ uwanay: Zà vok la abanay, tsà gəl à dərəv à abà. Baŋa kadzurkaw la ləv aŋkul la tsəh aw, kadi­ŋawwal gəl à vok la ləv aŋkul la tsəh kà, uwaga adàpakakulla vok haɗay. 24 Gay gà la uwaga gəgoɗ à akul, baŋa kadəvaw kuɗa kà manav tatak anik la sləm gulo kà, dìŋàwwal gəl à vok kà kada­ɓəzawwal, ŋgaha tadàvàkulla. 25 Mok uwana katsì­zlàwla kà madəv kuɗa kà, baŋa gay la ahəŋ la ləv aŋkul la tsəh la dza anik kà, matsalaŋ mawi­siga aŋha ala ŋgaha Baba aŋkul, uwana la zagəla la afik ama­tsa­kulaŋ ala bay. (( 26 Ama baŋa kama­tsawwaŋ azladza anik ala aw kà, Baba aŋkul uwana la zagəla la afik adà­ma­tsa­kulaŋ ala bay aw.))”

27 Tawùl à Uru­sa­lima aya. Mok uwana Yesu augu­zahay la gày Zəzagəla la aku kà, azlaməŋga aŋa azlaməna mav tatak à Zəzagəla, la azla­ma­dza­haga aŋa wakità seriya aŋa Zəzagəla, la azla­ma­siga tasà à waŋ à slaka Yesu. 28 Tanàv à Yesu la gay ala: “La maslay ma uwala kaɗàh sləray uwanay la? Uwa avà à ka tetəvi kà maɗàh sləray uwanay uwa?” 29 Yesu awùlla à atà ala: “Gi bay, gənav à akul manavay tekula. Baŋa kawulawgəla, gi bay gədàpəhakulla maslay uwana gəɗàhla sləray. 30 Uwa avà tetəvi à Yuhana kà maɗàh batem uwa? Zəzagəla ay? Awma azladza takay? Wùlàwgəla!” 31 Ama takə̀s sawaray kà atà kà atà, tagòɗ: “Baŋa məgoɗ kà: Zəzagəla la uwana avàl tetəvi kà, adàgoɗ à anu: Ka mana kadi­ŋawwal gəl à vok aw zlà ma? 32 Ama baŋa məgoɗ kà, azladza tavàl tetəvi tsa kità aw kà...” (Guba akəs atà kà azladza, kà uwana azladza gesina tanəŋà Yuhana kà masla kà dza uwana Zəzagəla aslə̀l à waŋ la dziriga) 33 Kà uwaga tagòɗ à Yesu: “Məsəl aw.” Yesu agòɗ à atà: “Ayyà, gi bay, gəpəhakulla dza uwana avà à gi tetəvi aŋa maɗàh tatak uwanay suwaŋ aw.”