2
Nəfàw madz à ahəŋ aŋa Yesu
1 Tsa kahamaw gay à vok la Yesu, kà akul la ndzəɗa, tsa awoya akul kà, akul la ndzəɗa. Tsa kahamaw gay à vok la Masasəɗok Zəzagəla la abà kà, wòyàw vok kà akul à akul, ŋgaha vok ahamà akul kà akul à akul babay. 2 Tsa baŋa kiya uwanay kà, wòyàw vok kà akul à akul, gàw la madzugway tekula, hamàw gay à vok, ŋgaha gàw la paŋaw tekula, baŋa kaɗahawwaŋ kiya uwaga, gədàɗeɗ gay ləv. 3 Kadzugwaw kà à gəl aŋkul pəra aw, kaɗahaw zlapay aw, wùlàwla gəl à vəɗah, nə̀ŋàwwàŋ azladza anik kà bokuba taɗuwa akul. 4 Kəla uwabeyuwi aɗaha delga à azladza anik, awkà kanərəzaw gəl aŋkul pəra aw. 5 Dzàw à ahəŋ bokuba uwana Yesu Kristu adzà à ahəŋ.
6 Haɗay kà, masla kà tekula la Zəzagəla, ama maŋor akəs, kà masla aŋa magagazləla gəl aŋha la Zəzagəla aw.
7 Asàk à uwaga gesina, apakà mayà la tatak gesina la abà, apakà dza. Uwana adapaka dza kà,
8 awùlla gəl à vəɗah, akə̀s mapəhay aŋa Zəzagəla, akə̀s mamətsay zlazlaɗaga, amətsay à ahàf à adi.
9 Gay gà la uwaga, Zəzagəla afà à slaka mazləɓay gà à abà, avàl sləm uwana aɗuwa azlasləm anik gesina.
10 Kà azlatatak uwana la zagəla, la azlauwana la vəɗah, la azlauwana la tsəh iyaw gesina, la mok uwana tadàtsən sləm aŋa Yesu, gesina aŋatà tadàsa à waŋ, tadàkədeɗal à ahəŋ.
11 Ŋgaha gesina aŋatà tadàpəhay la dazuwaya, kà Yesu Kristu kà Sufəl lakəl aŋa tatak gesina. Kiya uwaga tadàzləɓ Zəzagəla Baba.✡2.11 Yesayya 45.23
Uɗàw bokuba azlatsetsiliŋ la gudəŋ la vok
12 Azlaməna gay ləv gulo, kə̀sàw gay Zəzagəla. Uwarà, mok uwana məgà la slaka gà, kakəsaw gay aŋha. Lagwa kə̀sàw gay aŋha ɗaɗuwa à gay, uwana gi la slaka aŋkul. Uwaga asal magoɗay, kà Zəzagəla adahəl akul, ɗahàw sləray la masəkulay, la dziriga. 13 Kà uwana Zəzagəla adadzəka maɗàh sləray la akul la abà, kà akul aŋa mawoy azlatatak uwana akəs à masla à gəl, ŋgaha kà akul aŋa maɗàh atà.
14 Kəla sləray gesina uwana kaɗahawwaŋ kà, kaŋoŋuzaw, kagazlaw aw. 15 Kà akul aŋa magay sətaka, lela, ŋgaha akul aŋa magay azlabəza aŋa Zəzagəla kokuɗa tatak mawisiga la akul la abà. Akul la tataka aŋa azlaməna fida la abà, la azlamawisiga, gàw la tataka aŋatà bokuba azlauɗaka uwana tauɗay.✡2.15 5Musa 32.5 16 Baŋa kaɗahawwaŋ kiya uwaga kà, akul kapəhaw atà gay uwana av sifa. Ŋgaha la mavakay uwana Yesu Kristu adàsa à ahəŋ kà, gəɗàdeɗ gay ləv la huma aŋha kà akul, kà uwana apəhla sləray dzaŋdzaŋga uwana ala, gəɗahàŋ kà apaka deyday aw.
17 Ləv uwana kavàw à Yesu, kà kalkal bokuba makəɗ tatak uwana kakəɗaw à Zəzagəla: Zlahaw tadàkəɗ gi, ŋgaha aŋiz gulo adàhama à makəɗ tatak delga aŋkul uwaga à abà. Baŋa apaka kiya uwaga kà, gədàgay la marabay, mədàɗeɗ gay ləv la slaka gà. 18 Gàw la marabay ŋgaha məràb anina babay.
Timotawus atà la Epafərodit
19 Baŋa ‘Ayyà’, Sufəl Yesu agoɗ kà, gədàsləl Timotawus à awtày à slaka aŋkul, ŋgaha masla adàdzərəɗgəla bokuba uwana adzərəɗakulla bay. 20 Dza la ahəŋ la slaka gulo, uwana adzugway bokuba aŋulo aw, say masla pəra. Masla kà, adzugway kà akul pəra. 21 Azladza anik kà, tadzugway kà à gəl aŋatà pəra, awkà tadzugw lakəl aŋa azlatatak aŋa Yesu Kristu aw. 22 Timotawus kà masla kà, kasəlaw maday aŋha kà delga. Anu, anu səla kà məɗah sləray la slaka gà kà aŋa gay marabəŋ, masla azlaka gi à azlasləray à abà, bokuba uwana bəzi azlaka Baba aŋha à sləray à abà. 23 Gəfa kəla gəl à ahəŋ, kà seriya gulo adàdəv à gay, kà gədàsləlla à awtày à slaka aŋkul katskats. 24 Gi babay kà, baŋa asa à Zəzagəla kà, gədàda à awtày à slaka aŋkul zewk.
25 Deda gulo Epafərodit, masləlay aŋkul, uwana kaslə̀làw à gi à waŋ, kà mazlak gi la azlatatak uwana gənəkuɗa aŋha, məɗàh sləray la slaka gà, məpa guvəl la tsəh ala, gədzugw lagonay kà delga, kà gi aŋa mawul à akul à awtày aya. 26 Kà uwana atùw akul à tsəh kà manəŋ akul. Gəl adakaɗal à vok, kà uwana asəl kà, katsənàwwàŋ kà agà la ɗuvats. 27 Haɗay kà, ɗuvats akə̀ɗ kuɗa kuɗa, awkà naka amətsay. Vok ahamà à Zəzagəla kà aŋha, ama kà masla pəra aw, ama kà gi babay, à uwana awuràŋ ala kà gi aŋa mazaw la gəl aw. 28 Kà uwaga à uwana asa à gi kaykay kà gəwulla à slaka aŋkul, kà akul aŋa manəŋ masla la marabay, ŋgaha ləv gulo aŋa mataslla. 29 Baŋa adàda à awtày kà, kə̀sàw masla la ahàl səla, kà uwana masla kà, deda aŋkul la tetəvi aŋa Sufəl gami la tsəh. Sləkàwàw tsəhay dza uwaga. 30 Kà uwana aləg kà ŋuv ŋuv, awkà naka amətsay à sləray aŋa Kristu à abà. Atùw sifa aŋha aw kà, kà masla aŋa mahən uwana ala atəm à ahəŋ la slaka aŋkul la abà kà aŋulo.