3
Ənggǝra Yesu Ndiya Musa
1 Agabangau, nahyi wazha ama nji cicau, nahyi njira Hyal ngga, hya hǝ ɗǝnga ar kǝra Yesu ndǝra naja ngǝ ndǝ sǝsau, ǝnga pubu kǝra ndiya ǝnga dǝgalǝu, nǝ mbǝrsa kǝra mǝnu lǝ sakida ar kǝri. 2 Tsaˈa miya ɗǝfu nga ja anǝ ndǝra caɗǝbiya nyi, ǝnggǝr kǝra Musa mǝl thlǝr nyi tsaˈa miya ɗǝfu wu pama nji gǝ Hyal. 3 A thlǝwar nji Yesu a ndiya Musa ǝnga kadakadarkur, ǝnggǝr kǝra ndǝr hǝr ki a ndiya ki ǝnga kadakadarkur. 4 Arya kalar ki ndǝ ngǝ hǝriya nyi, ama ndǝra hǝriya kalar sau, ca ngǝ Hyal. 5 Musa ndǝr mǝl thlǝr tsaˈa miya ɗǝfu ngau, ndǝr mǝl thlǝr ar viya mafa wu ki Hyal, a lǝr ja sakida ar kǝra sǝra wu nda ɗa a ndumwa. 6 Ama Kǝrsiti ndǝ jijiri nga ja, ndǝra vǝr mǝl thlǝr ǝnggǝr Zǝr ar kǝra ki Hyal. Namǝn ngǝ ki Hyal, ma mǝn sǝn dumwa ǝnga fǝ ɗǝfu ba nggya ǝnga fǝr kǝr wu sǝra a vǝr shili.
Kughi Ar Kǝra Gǝra Hǝnggǝri
7 Agabangau, ǝnggǝr kǝra Mambǝl Cici na,
“Əshina, ma hyi nggari ɗaha ja,
8 hya sara ɗa ǝnga ɗǝfu ɓaɓal mai
ǝnggǝr kǝra hyi mǝliya ar pǝcir hyaˈa hangǝkal,
ar pǝcir dzǝ a gwar tagǝ mashi.
9 A guna ngǝ ǝjir hyi dzǝbiya ǝnga gǝlabiya ɗa,
ǝnga ndǝ lari sǝra yi mǝliya nǝ fa foɗǝ kumunyi.
10 Ca ngǝ ɗa huɗa yi ndzǝndzǝ ǝnga naja ta zaman,
ba yi na, ‘Cumu nga ndu shinɗa yi wu ɗǝfuwa nda,
nanda aˈyi wu sǝni lagu ɗaˈyar mai.’
11 Wu huɗǝ ndzǝndzǝ ɗa, yi sǝmku fǝla;
‘Nandǝ wu sa gwu ɓǝlsar ɗa mai.’ ”
12 Hya nggya ǝnga tsamǝ, wazha ama, ara nja sara thlǝwa bikau ǝnga gǝra hǝnggǝri wu ɗǝfuwa hyi kǝra wu mǝliya hyu shini yi anǝ Hyal Ndǝra ǝnga Pi. 13 Ar pǝci kǝra nju ngga ǝnga “Əshina” hya tǝɗar himiya kǝrhyi, ara kalar ndu pama hyi a sara ɗa ǝnga ɗǝfu ɓaɓal lagur ngguta vi nǝ bikau. 14 Namǝn njir daɓǝr kǝr ǝnga Kǝrsiti ngau, ma mǝnu taˈyi wu mbǝrsa kǝra mǝn uya tanggǝrma ǝnga dǝnama baˈa ndar kuɗiyar duniya. 15 Ənggǝr kǝra nji na,
“Əshina ma hyi nggari ɗaha ja,
hya sara ɗa ǝnga ɗǝfu ɓaɓal mai
ǝnggǝr kǝra hyi mǝliya ar pǝcir hyaˈa hangǝkal.”
16 Wa ˈyar ngǝ nggar ndǝr Hyal ǝnga kǝ ndǝ ɓǝra hyaˈana nyi hangǝkal ta? Aˈyi njira Musa hǝbiya sara wu Masaru wa? 17 Ənga wa ˈyar ngǝ huɗa Hyal ndzǝ nǝ fa foɗǝ kumunyi ya? Aˈyi ǝnga njira mǝliya bikǝ, ba ndǝ dlǝdla ba ndǝ tǝnakǝr a gwar tagǝ mashi ta wa? 18 Ənga wa ngǝ Hyal sǝm fǝla abǝr nanda aˈyi wu gwu sǝhǝɗa nyi maya? Aˈyi ǝnga njira nggǝl ara ɓǝla ndǝr nyi wa? 19 Agabangau, a lari mǝn abǝr arya gǝra mbǝrsar nda, nga ndǝ tini gwu sǝhǝɗa nyi.