1 ኑ እሹንꬆ፥ ኑ ጎዳ የሱስ ክርስቶሳ ይእꬅ ባጋኔ ኑ ኤዛ ሄሎዳይስ ሺቆባጋ ኑ ይንታን ዎስዛ። ኢሳ. 2:10 2 ትንቢተር ዎይ ቃላ ስኤዛይ ጋርክ ዎይ ኑፐ ኤኬዝ ኪታ ኡዲ፥ «ጎዳይ ጋላሳይ ሄሌዛ» ዬጊ ይ ዎዝናይ ዳጋምፐኔ ꬋብፐ። 3 ይንታን ኦንካ አባ ኦገራካ ባልꬅፐ። ቲናቲ አሳይ ጾሳ ካዶ አይከካዝን ዉጨ አꬃይ ዡጫትꬃይ ቆንጨካኔ ꬋቦስ ቤዝዛ አꬃይ የኤካዝን፥ ጎዳይ ጋላሳይ ሄላሚ። 4 Ꮊ ዉጨ አꬃይ ጎድ ጊንቲ ጎይንትዛ ኡባይፕ ኣꬂ ፓና ꬎቅ ኡዶዳ። ሀራ አቶዝን ያሻ ባይꬅ፥ ጾስ ካራ ገሊ በቲ፥ «ታኒ ጾሰ» ጎዳ። ዳነ. 11:36፤ ኢዝቀ. 28:2

5 ታኒ ይንታር የዛር ይንትስ ኦዴዛና አካኮሳኔ? 6 Ꮊ ዉጨ አꬃይ ፋ ጋላሳር የኦዳይፕ አትን Ꮊት የአማይ ጋርክ አቢ ኤዛ ካይዛኮ ይ ኤርዛ።

7 አሳይስ በንተካዛር ዉጨ አꬃይ ዎልቃይ Ꮊተካ ጌማር ኦꬅዛ፥ ማቆዝን Ꮊት ኤዛ ካይዛይ የዛ። ኤዛ ካይዛይ ኦገላፕ ሀልኦድ ሄሎዳይስ ኤ በንታሚ። 8 የይፕ ጉየ፥ ዉጨ አꬃይ በንቶዳ፥ ዝን ጎዳ የሱሳ ፋ ዶናይፕ ከዝዝ ፔናይራኔ ፋ ይእꬃይ ዴታይር ኤዛ ꬋብሶዳ።ኢሳ. 11:4 9 ዉጨ አꬃይ ጻላሄ ዎልቃር ይኢ ባልꬅዛ ማልታኔ ማላባዝታ ኡዶዳ። ማቶ. 24:24 10 የይ ጋርከካ፥ ꬋቦስ የዝ አስታ ዱማ ዱማ ዶሽዛ ኢታ ኦሶር ባልꬆዳ። ኡንትካ ꬋብዛይ አሽዛ ቱማና ዶሲ ኤካም እጼዝ ግሾሲ። 11 የይ ግሾስ፥ ኡንቲ ዎርዶ አማኖዳይ ጋርክ ጾሲ ኢታ ባልꬆ ዎልቃ ኡንታል አፋ ዳኮዳ። 12 የይካ፥ ቱማ አማናም ግ፥ ናጋራ ኦሶር ኡፋይትዛ ኡባይ ፕርድንቶዳይ ጋርከሲ።

13 ጎዳይ ዶስዛ ኑ እሹንꬆ፥ ኑኒ ጾሳ ይ ግሾስ ኡባ ዎደ ጋላቶዳይስ ቤዝዛ። ጋላትዛይካ ይ አቶዳይ ጋርክ ጌሻ አያና ዎልቃር ይንታን ጌሼዛኔ ይንትካ ቱማ አማኒ አቶዳይ ጋርክ ኤ ይንታን ባይራꬂ ዶሬዛ። 14 ጾሲ፥ ኑ ይንትስ ኦዴዝ ዎንግላይ ባጋር ይንታን ጼጌዛይ፥ ይ ኑ ጎዳ የሱስ ክርስቶሳር ዎላ ቦንችንቶዳይ ጋርከ። 15 ይኬ፥ ኑ እሹንꬆ፥ ሚንጊ ኤቆይታ። ኑኒ ይንታን ዶናር ዎይ ዳብዳበር ታማርሴዝ ትምርታ ሚንꬂ አይኮይታ።

16 ኤ ኑ ጎዳ የሱስ ክርስቶሳኔ ኑና ቃꬊ ኑስ ፋ ኣꬎ ኬሄትꬃር መꬍና ምንꬃꬆኔ ሎኦ ኡፋይስ ጾስ አዳይ ኑስ እንጌዛ። 17 ይ ኡባ ዎደ ሎኦ ባዝ ኦꬆዳይስኔ ኦድንቶዳይስ ኤ ምንꬃꬆዳይ ጋርከኔ ማዶዳይ ጋርክ ኑ ጎዳ ጾሳ ኑ አዳ ዎሶዳ።