እብራወ አሳይስ ጻፍንቴዝ ኪታ
ገሎ
Ꮊ ኪታይ ጻፍንቴዛይ፥ ዴጾ መቶ ሄልን፥ ፋ አማና አሾዳይስ ሄሌዝ አማንዛ አሳይሲ። Ꮊ ማጻፍቶ ጻፌዛይ፥ የሱስ ክርስቶሳ ዉርስꬅኔ ቱማ ጾስ ቆንጭꬅ ማቄዛና እብራወ አሳይስ ቤዝዛ። የ አማንዛ አሳይ ፋ አማናይድ ሚንጎዳይ ጋርክ ኡንታን ምንꬃꬅዛ። ኤ የያ ኡድታር ሀይዝ ቱምታ ኣꬂ ቤዝዛ።
1. የሱሳ ፋ ኤኬዝ መታይድ አዳይስ ቱማ ኪትንቴዝ መꬍና ጾስ ናአ። ኤ ጾስ ናአ ማቄዝ ግሾስ ጭማ ጫቆ ዎደ የዝ ናብታይፐ፥ ኪታንችታይፐኔ ሙሰፐ ሎእꬂ ኣꬍዛ።
2. የሱሳ ጭማ ጫቆ ቄስታይፕ ኡባር ኣꬊዝ መꬍና ቄሰ ማቄዛና ጾሲ ፋ ኦማስ ማርካቴዛ።
3. የሱሳ ባጋር አማንዛ አስ ናጋራፐ፥ ያሻፐነ Ꮊይቆፐ አትዛ። የሱሳ ቄሰ ሀላቃ ማቄዛ፥ ቲና እብራውታይ አማኖ ዎጋኔ መሄ ያርሾር ኤሾ ጋርክ በንትዝ አቶትꬃ Ꮊት ቱማ ኦꬄዛ።
ጻፋይ እስሬለ አሳይ ታርከኔ ዋረር የዝ አሳይ አማኖ ኣዝሶ ኡዲ ኤኪ (ሸም 11) Ꮊ ማጻፍቶ ናባብዛ አስታይ ፋ አማናይድ ሚንጎዳይ ጋርክ አካክስዛ። የይ ጋርከካ፥ ሸምፖ 12 ናባብዝታይ ፋ አፋ የሱሳ አፋ ጋዲ፥ ፋ አማናይድ ሚንጎዳይ ጋርከኔ አባ መቶኔ ዋየ ሄልኮካ፥ ኡንቲ ጋርዦዳይ ጋርክ ዞርዛ። ዉርስꬃ ዞራይዳኔ አካክሶ ቃላይድ ፋ ኪታ ኣꬅዛ።
እብራወ ኪታይ አይኬዝ ቆፍታ
ገሎ፦ ጾሲ ክርስቶሳር ቆንጬዛ 1:1-3
ክርስቶሳ ኪታንችታይፕ አፋ 1:4—2:18
ክርስቶሳ ሙሰፐኔ ኢያሶፕ ኣꬅ 3:1—4:13
ክርስቶሳ ቄሰትꬃይ ኡባይፕ ኣꬂ 4:14—7:28
ክርስቶሳ ቃላ ጫቃይ ኡባፕ ኣꬅ 8:1—9:22
ክርስቶሳ ያርሽንታይ ፑጫ 9:23—10:39
አማኖ ባይራትꬃ 11:1—12:29
ጾስ ኡፋይሶ 13:1-19
ዉርስꬅ ዎሳ 13:20-22
አንጆኔ ኩስተ 13:22-25
1
ናአይ ኪታንችታይፕ ኣꬂ
1 ብኒ ብንኮ ጾስ፥ ኑ አድታይስ ናብታይ ባጋር ዱማ ዱማ ኦገር ጋመ ዎደ ኦዴዛ። 2 ዝን Ꮊ ዉርስꬅ ዎደ ኡባ ባዝ ኤዛ ላትሴዝ፥ ማ አላማካ ኤ ባጋር መꬌዝ ፋ ናአይ ባጋር ኑስ ኦዴዛ። 3 ናአይ ጾስ ቦንቾ ፖጭꬅኔ ሀናይር ሙመር ጾስ ኣዚ ኩንꬅ ጾስ ጾሳትꬅ ኤኪ፥ ፋ ማዉተ ቃላይር Ꮊ አላማ ሚንꬂ አይኬዛ። አሳ ኡ ናጋራይፕ ሻግሼዛይፕ ጉየ ኡባፕ አፋ ጾስ ኡሻች ሳሎ በቴዛ።
4 ኤስ እንግንቴዝ ሱንꬃይ ኪታንችታይ ሱንꬃይፕ ኣꬅ ማቄዛይ ጋርክ ኤ ኡንታፕ ሎእꬂ ኣꬊዝ ግሾሲ። 5 ይኬ፥ ጾስ ኪታንችታይፕ ኦኮ፥
«ኔኒ ታ ናአ፤
ታ Ꮊይኖ ኔስ አደ ማቄዛ» ዬጌኔ?
ዎይ ኦኮ፥
«ታኒ ኤስ አደ ማቆዳ፤
ኤካ ታስ ናአ ማቆዳ» ዬጌኔ?ማዝ. 2:7፤ 2ሳም. 7:14፤ 1ዜና. 17:13
6 ማ ጾሲ ፋ ባይራ ናአ Ꮊ አላመ ኪትታር፥
«ጾስ ኪታንችታይ ኡባይ ኤስ ጎይኖ»
ዬጌዛ።ናምእ. 32:43 7 ጾስ ኪታንችታይ ባጋ ኦድታር፥
«ጾሲ ፋ ኪታንችታ ጫርክታ፥
ፋ አይልታ ታማ ላꬅ ኡድዛ»
ዬግዛ።ማዝ. 104:4 8 ዝን ፋ ናአይ ባጋ ኦድታር፥
«ጾሶ፥ ነ ካተትꬃይ መꬍናስ የዝዛ።
ነ ካተትꬃ ነ ጽሎትꬃር አቅሶዳ። ማዝ. 45:6-7
9 ኔኒ ጽሎትꬅ ዶሴዛ፤ ኢታትꬅ እጼዛ።
ጾሳይ፥ ነ ጎዳይ፥ ነና ነ ዣምታይፕ ኣꬂ ዶሬዛ፥
ኡፋይስ ዛይተ *ኡፋይስ ዛይተ፦ ኤ ካዉትዛ ዎደ አሳይ ኡፋይሳር እልሊ ኤዛ ካዉትስዛ ቤዝዛ። ነና ትዤዛ»
ዬግዛ።ማዝ. 61:1፥ 3 10 ጾሲ ማሂ፥
«ጎዳዮ፥ ቲና ኔኒ ሳአ መꬌዛ፤
ሳልታይ ነ ኩሸ ኦስታ።
11 የይትታይ ኡባይ ꬋቦዳ፤
ዝን ኔኒ የዞዳ።
ኡንቲ ኡባይ አፍላ ጋርክ ዉሮዳ።
12 ኔኒ ኡንታን ሳልነ ጋርክ ጻጾዳ፤
ማ ኡንቲ አፍላ ጋርክ ላምንቶዳ።
ዝን ኔኒ ኡባ ዎደ ነና፤
ነ ላይꬅታይስካ ዉርስꬂ ባያ»
ዬግዛ።ማዝ. 102:25-27 13 ዝን ጾሲ ኪታንችታይፕ ኦኮ፥
«ታኒ ነ ሞርክታ ነ ቶካይ
የꬍዝ አቆ ኡዶድ ሄሎዳይስ፥
Ꮊይዳ ታፕ ኡሻች ባጋር በቶባ» ዬጌኔ?ማዝ. 110:1
14 ኪታንችታይ ኡባይ አቶትꬅ ደንጎዳይስ የዝ አስታ ማዶዳይስ ጾስ ኪቴዝ አያንታ ባሳኔ?