9
ስሌዝ አꬃይ ፓጾ
(ማር. 2:1-12፤ ሉቃ. 5:17-26)
1 የይፕ ጉየ፥ የሱሳ ዎጎሎ ጋንጨ ገሊ፥ አባ ፒንጊ ፋ ካታማ Ꮊንጌዛ። 2 አሳይ ፐቲ ስላ አꬃ አርሳር ቶኪ የሱሳኮ ከኤዛ። የሱሳ ኡ አማና ብኢ፥ ስላ አꬃ፥ «ታ ናአዮ፥ ያሽትፐ! ነ ናጋራይ አቶ ግንትንቴዛ» ዬጌዛ።
3 የ ሳታይድ፥ አይሁድታይ ህገ አስታማርታይፕ ፐታይ ፐታይ፥ «Ꮊይ ጾስ ጫዥዛ» ዬጊ ኡ ፋ ዎዝናር ቆፔዛ።
4 የሱሳ ኡ ቆፋ ኤሪ፥ «ኢታ ባዝ ይ ዎዝናር አብስ ቆፔ? ዬጌዛ 5 ዝን፥ ‹ነ ናጋራይ አቶ ግንትንቴዛ› ግዛይፐነ ‹ደንዲ ቅቶባ› ግዛይፕ ኣይ ኣꬌ? 6 ዝን ቢታል አፋ ናጋራ አቶ ጎዳይስ አስ ናአይስ ማዉተ የዛና ታ ይንታን ኤርሶዳ» ዬጊ፥ ስላ አꬃይኮ፥ «ደንዲ ነ አርሳ ቶኪ፥ ነ ካራ Ꮊንጎባ» ዬጌዛ።
7 ስላ አꬃይ ደንዲ ፋ ካራ ቅቴዛ። 8 ዎያይ የያ ብኢ ማላባዝ ጌዛ። የይ ጋርክ ማዉተ አስስ እንጌዝ ጾሳ ጋላቴዛ።
ማቶሳ ጼግንትꬅ
(ማር. 2:13-17፤ ሉቃ. 5:27-32)
9 የሱሳ የይፕ ደንዲ Ꮊንግታር ማቶሳ ግዝ አꬃይ ቃራጸ ጋችስዝ አቆ በቴዝን ብኢ፥ «ታና ካሎባ» ዬጌዛ።
ኤዝካ ደንዲ ካሌዛ።
10 የሱሳ ማቶሳ ካራ ሙንታል አፋ በቴዝን፥ ቃራጸ ጋችዝ ጋመ አስታይኔ ናጋራ ኦꬅዝ አሳይ ይኢ ኤዛራኔ ኤ ታማርታይር ዎላ ማዳይስ በቴዛ። ሉቃ. 15:1-2 11 ፐቲ ፐቲ ፈርሳወ አሳይ የያ ብኢ፥ የሱሳ ታማርታ፥ «ይ አስታማራይ ቃራጸ ጋችሽዝታይራኔ ናጋራ ኦꬅዝታይር አብስ ሜ?» ዬጌዛ።
12 የሱሳ የያ ስኢ፥ «አክመ ኮሽዛይ ሀርግንቴዝታይስፕ አትን ፓꬅታይስ ባያ። 13 ዝን ይ Ꮊንጊ፥ ‹ታኒ ይ ያርሻ ባዝን ማሮትꬅ ኮይዛ› ጉሳይ ዋጉስዛኮ ኤሮይታ። አብስ ጊኮ፥ ታ ናጋራ ኦꬅዝታ ጼጎዳይስ የኤዛፕ አትን ጽልታ ጼጎዳይስ የኤካያ» ዬጌዛ። ማቶ. 12:7፤ ሆሳ. 6:6
የሱሳ ጾማ ባጋ ኦይጭንቴዛ
(ማር. 2:18-22፤ ሉቃ. 5:33-39)
14 የ ዎደ ዋንሳ ታማርታይ የሱሳኮ ሺቂ፥ «ኑራኔ ፈርሳወ አሳይ ጾምዛ፥ ዝን ነ ታማርታይ አብስ ጾሞሳ?» ዬጊ ኦይጬዛ።
15 የሱሳ ማሂ ኡንትኮ፥ «ማቾ ኤክዛይ ኡንታር የዝን ላዛንꬅታይ አዛኖዳይስ ዳንዳእኔ? ማቾ ኤክዛይ ኡ አቻፕ ኤክንቶድ ዎደ የኦዳ፥ ኡ የ ዎደ ጾሞዳ።
16 «ኦሮꬅ ማኦፕ ፔꬃ ጭማ ማኦል አፋ ስክዛ ኦንካ ባያ። የይ ጋርክ ኦꬂኮ ኦሮꬃይ ጭማና ፐርእዛ። ፐርእꬃይካ ጉጂ ዳልግዛ። 17 ኦሮꬅ ዎይነ ጭማ ኦጎሮ ጋንጨ ዳኪ ጋድዛ ኦንካ ባያ። የይ ጋርክ ኦꬂኮ ኦሮꬅ ዎይናይ ጭማ ኦጎራ ꬉስዛ ዎይናይካ ላልንትዛ፤ ኦጎራይካ ናምአንꬆ አዶዋ ባዝ ማቅዛ። ዝን ኦሮꬅ ዎይነ ኦሮꬅ ኦጎሮ ጋንጨ ኦልንቶዳይስ ቤዝዛ። የይ ጋርክ ኦስንትኮ ናምእታይካ ኢተካዛር ናግንትዛ» ዬጌዛ።
Ꮊይቄዝ ናአቶኔ የሱሳ አፍላ ቦቼዝ አስቶ
(ማር. 5:21-43፤ ሉቃ. 8:40-56)
18 የሱሳ የያ ኦዶል አፋ የዝን፥ አይሁደ ሀላቅታይፕ ፐታይ ኤዝኮ ይኢ፥ ኤ ቲናይድ ጹጉኒ፥ «ታ ናአታ Ꮊት Ꮊይቄዛ፥ ዝን እዛ ፓጾድ ጋርክ ነ ይኢ ነ ኩሻ እዝል አፋ ጋዶየ» ግ ዎሴዛ። 19 የሱሳ ደንዲ ኤዛር Ꮊንጌዛ፤ ኤ ታማርታይካ ካሌዛ።
20 ኤ Ꮊማዳር ታጶ ናምኢ ላይꬅ ኩንꬅ ሱꬂ ጎግ ዋይꬅዛ ፐቲ አስታ ጉየር ሺቂ የሱሳ አፍላ ማጫራ ቦቼዛ። 21 እዛ ፋ ዎዝናር፥ «ታ ኤ አፍላ ማጫርቶ ኣዳ ቦችዛኮ ፓጾዳ» ዬጊ ቆፔዛ።
22 የሱሳ ጉየ ማቂ እዞ ብኢ፥ «ታ ናአተ፥ ያሽትፐ! ነና ነ አማናይ ፓꬅዛ» ዬጌዛ። የ አስታ እዝር ፓጺ አቴዛ።
23 የሱሳ አይሁደ ሀላቃይ ካራ ሄሎዳር ድንከ ፑግዝታኔ ዬክዝታ ብኢ፥ 24 «አን ሀልኦይታ፤ ጽቃ ናአታ ገንቴዛፕ አትን Ꮊይቀካያ» ዬጌዛ። ዝን አሳይ ኤዛል አፋ ሚጬዛ። 25 አሳ ባለ ከሴዛይፕ ጉየ ካራ ገሊ፥ ናአት ኩሻ አይክን፥ ናአታ ደንዲ ኤቄዛ። 26 የ ዋራይ የ ቢታ ኡባ ሄሌዛ።
የሱሳ ናምኢ ቶእታ ፓꬅዛ
27 የሱሳ ኤዛይር ገደ ቲና Ꮊንጎዳር ናምኢ ቶእታይ ፋ ቃላ ꬎቅ ኡዲ፥ «ዳዉተ ናአዮ፥ ኑና ማሮየ» ግ ኡክታር ኤዛ ካሌዛ።
28 የሱሳ ካራ ገሎዳር ቶእታይ ኤዛ ካል የኤዛ። የሱሳ ኡንትኮ፥ «ታኒ የያ ኦꬆዳይስ ዳንዳእዛና ይ አማንኔ?» ዬጌዛ።
ኡንትካ፥ «ኤ፥ ጎዳዮ» ዬጊ ማሄዛ።
29 የይፕ ጉየ፥ የሱሳ ኡ ኣፋና ቦቺ ኡንትኮ፥ «ይንትስ፥ ይ አማናይ ጋርክ ሀኖ» ዬጌዛ። 30 ኡ ኣፋይካ ዶይንቴዛ። የሱሳ ኡንትኮ፥ «Ꮊያ ኦስካ ኦድፓተ» ዬጊ ሚንꬂ ኦዴዛ። 31 ዝን አስታይ Ꮊንጊ የሱሳ ኦሳ የ ቢታ ኡባይል ኦዴዛ።
32 ኡንቲ የይፕ ከሳዳር አሳይ ቱና አያናይ አይኬዝ ፐቲ ሙመ አስ የሱሳኮ ከኤዛ። 33 ቱና አያናይ ከዜዛይፕ ጉየ ሙመ አꬃይ ኦድንቴዛ፥ ዎይታይካ ማላባዝ ግ፥ «Ꮊይ ጋርክ ኦሮꬅ ባዝ እስሬለ ቢታል የሻ ሀነካ ባዝ» ዬጌዛ።
34 ዝን ፈርሳውታይ፥ «ቱና አያንታይ ሀላቃይር ቱና አያንታ ከስዛ» ዬጌዛ። ማቶ. 10:25፤ 12:24፤ ማር. 3:22፤ ሉቃ. 11:15
የሱሳ ዎያይስ ቃꬍንቴዛ
35 የሱሳ አይሁድታይ ዎሳ ኬꬃ ታማርስታር፥ ሳሎ ካተትꬅ ዎንግለ ሳባክታር፥ አሳ ሀርገ ኡባይፕ ፓꬅታር ካታምታይራኔ ሄራ ኡባይር ዩዬዛ። ማቶ. 4:23፤ ማር. 1:39፤ ሉቃ. 4:44 36 ጋመ ዎያ፥ ሄንግዝ አስ ባ ዱር ጋርክ ኡንታን ብእዛ አስ ꬋብን ኡንእንቴዝታኔ ላልንቲ የዝታ ብኢ ኡንትስ ቃꬍንቴዛ።ታይ. 27:17፤ 1ካት. 22:17፤ 2ዜና. 18:16፤ ኢዝቀ. 34:5፤ ማር. 6:34 37 ፋ ታማርታይኮ፥ «ሺቆድ ቶርቼ ካꬃይ ጋመ፥ ዝን ቶርቼ ካꬃ ሺሽዛ አሳይ ጽቃ። ሉቃ. 10:2 38 የይ ግሾስ፥ ጎዳይ ቶርቼ ካꬃ ሺሾዳይስ ኦሶ አስታ ዳኮድ ጋርክ ቶርቼ ጎዳ ዎሶይታ» ዬጌዛ።