10
ማቾ አንጆዳይስ ቤዞያ
(ማቶ. 19:1-2፤ ሉቃ. 16:18)
1 የሱሳ የይፕ ደንዲ፥ ይሁዳ ቢታ Ꮊንጊ ዮርዳኖሳ ቦርካ ፒንጌዛ። ጋመ አሳይ ማቂ ኤዝኮ ሺቅን፥ ካሴሳይ ጋርክ ያ አሳ ታማርሴዛ።
2 ፈርሳወ አሳፕ ፋጮዳይስ ኮዪ የሱሳ፥ «ፐቲ አስ ፋ ማቻቶ አንጆድ ጋርክ ሙሰ ህጋይ ኪትኔ?» ዬጊ ኤዛ ኦይጬዛ።
3 ኤ ማሂ፥ «ሙሰ ይንታን ካሰ ዋጊ ኪቴኔ?» ዬጌዛ።
4 ኡንቲ፥ «ሙሰ፥ ‹ፐቲ አሲ ፋ ማቻትስ አንጆ ዋርቃተ እንጊ ዳኮ› ጌዛ» ዬጌዛ። ታይ. 24:1
5 የሱሳ ማሂ፥ ኡንታን «ይ ዎዝናይ ሚንꬂ ማቄዝ ግሾስ ሙሰ Ꮊ አዛዛ ይንትስ ጻፌዛ። 6 ዝን ጾሳይ ቲና መꬍታር ꬊራꬃራ ማቻር ኡዲ፥ መꬌዛ።መ. 1:27፤ 5:1 7 የይ ግሾስ፥ ፐቲ አሲ ፋ አደኔ ፋ እንዶ አሺ፥ ፋ ማቻትር ዎላ ማድንትዛ። መ. 2:24 8 ኡ ናምእታይ ፐቲ አሾ ማቅዛ፤ Ꮊይፕ፥ ኡ ፐቲ አሾ ማቆዳይፕ አትን ናምኤ ማቆያ። 9 የይ ግሾስ፥ ጾሳይ ዎላል ዋጼዛና አሲ ሻክፐ» ዬጌዛ።
10 ኡ ካራ ማቄዝ ዎደ ኤ ታማርታይ Ꮊ ኦዳይ ባጋ የሱሳ ናምእንꬆ ኦይጬዛ። 11 የሱሳ ኡንትኮ፥ «ፋ ማቻቶ አንጂ ሀራ ኤክዝ ኦንካ ላምዛ። ማቶ. 5:32፤ 1ቆሮ. 7:10-11 12 ማ ማቻታካ ፋ አዝናይፕ ከዚ ሀራ ኣዝን ገልኮ ላምዛ» ዬጌዛ።
የሱሳ ዱደ ናእታ አንጄዛ
(ማቶ. 19:13-15፤ ሉቃ. 18:15-17)
13 የሱሳ ዱደ ናእታ ቦቾድ ጋርክ፥ ፐቲ ፐቲ አሳይ ናእታ ኤዝኮ ክእዛ፥ ዝን ኤ ታማርታይ የ አስታ ካጬዛ። 14 የሱሳ የያ ብኢ፥ ፋ ታማርታ ጋይሌዛ፤ ኡንትኮ፥ «ዱደ ናእታይ ታኮ ይእዛና ካይፓተ፤ ጾስ ካተትꬃይ Ꮊይትታይ ጋርከዝታይሲ። 15 ታ ይንትስ ቱሮ ኦድዛ፤ ጾስ ካተትꬃ ዱደ ናአ ጋርክ ኤኮዋ አስ ኦንካ የ ካተትꬃ ኡባራካ ገላሚ» ዬጌዛ። ማቶ. 18:3 16 የይፕ ጉየ ዱደ ናእታ እድንጊ፥ ፋ ኩሸ ኡንታል አፋ ጋዲ አንጄዛ።
ዱረትꬅኔ ጾስ ካተትꬅ
(ማቶ. 19:16-30፤ ሉቃ. 18:18-30)
17 የሱሳ Ꮊንጎዳይስ ከዞዳራ ፐቲ አꬃይ ላሲ ይኢ፥ ኤ ቲናይድ ቡንቂትድነ፥ «ኬሃ አስታማራዮ፥ መꬍናስ ደኦ ላቶዳይስ ታ አብ ኦꬆ?» ዬጊ ኦይጬዛ።
18 የሱሳ፥ «አብስ ታና ኬሃዮ ግ ጼጌ? ጾስ ኣዳፕ አትን ሀራ ኬሃ ኦንካ ባያ። 19 ጾሳ ኪታይ፥ ዎꬍፐ፤ ላምፐ፤ ካስትፐ፤ ዎርዶ ማርካትፐ፤ ዶሽፐ፤ ነ አደኔ ነ እንዶ ቦንቾባ ዬግዛና ነ ኤርዛ» ዬጌዛ። ከስ 20:12-16፤ ታይ. 5:16-20
20 አꬃይ፥ «አስታማራዮ፥ ታ Ꮊይትታ ኡባ ናአትꬃፕ አይኪ Ꮊኖ ሄሎዳይስ ናግዛ» ዬጌዛ።
21 የሱሳ አꬃ ዳኪ ብኢ ቃꬌዛ፤ «ኔስ ፐትባዚ ፓጭዛ፤ Ꮊንጊ ኔስ የዛ ባዝ ኡባ ባይዚ፥ የ ሚሻ ማንቅታይስ እንጎባ፤ ነ ሳሎ ዱርቶዳ። ዬዚ ማቂ ታና ካሎባ» ዬጌዛ። 22 ዝን አꬃይ የያ ስኢ፥ ኤ ቱቄዝ ዱረ ማቄዝ ግሾስ ፋ ስና ቱኬዛ፥ ኡፋይተካዛር አሺ ቅቴዛ።
23 የሱሳ ፋ ታማርታ ዩዪ ብኢ፥ «ዱረ አስ ጾሳ ካተትꬂ ገሎዳይ ዋይዚ መቶደሻ!» ዬጌዛ።
24 ኤ ታማርታይ ኤ ትምርታ ስኢ ማላባዝ ጌዛ። ዝን የሱሳ ማካ ኡንትኮ፥ «ናእቶ፥ ጾሳ ካተትꬂ ገሎዳይ ዋይዚ መቶደሻ! 25 ዱረ አስ ጾስ ካተትꬂ ገሎዳይፕ፥ ግማለ ናርፐ ሉኮር ኣꬎዳይ ሻዉክዛ» ዬጌዛ።
26 ኤ ታማርታይ Ꮊይ ማላባዝ ግ፥ «የዝን፥ ኦኒ አቶዴ?» ዬጊ፥ ፐታይ ፐታ ኦይጬዛ።
27 የሱሳ ኡንታን ዳኪ ብኢ፥ «Ꮊይ ጾስስ ዳንዳእንትዛፕ አትን አስስ ዳንዳእንቶያ፤ ጾስስ ኡባ ባዝ ዳንዳእንትዛ» ዬጌዛ።
28 ጵጽሮሳ የሱሳኮ፥ «ዬዛኮ፤ ኑኒ ኑባዝ ኡባ አሺ፥ ነና ካሌዛ» ዬጌዛ።
29 የሱሳ «ታ ይንትስ ቱሮ ኦድዛ፤ ታ ግሾኔ ዎንግለ ግሾስ ፋ ካራ ዎይ እሽታ ዎይ ምሽታ ዎይ አደ ዎይ እንዶ ዎይ ማቾ ዎይ ናእታ ዎይ ጋደ አሼዛይ ኦንካ፥ 30 Ꮊት Ꮊ ዎዳይድ ባይእꬃር ፋ ካራ፥ እሽታ፥ ምሽታ፥ እንድታ፥ ናእታ፥ ጋደ፥ ጼት ኩሸ ኤኮዳ። ቲናስ የኦድ አላመ መꬍና ደኦ ኤኮዳ። 31 ዝን ጋምታይ ቲናቴዝታይ ጉይቶዳ፥ ማካ ጋምታይ ጉይቴዝታይ ቲናቶዳ» ዬጌዛ። ማቶ. 20:16፤ ሉቃ. 13:30
የሱሳ ፋ Ꮊይቃኔ ፋ ደንዳይ ባጋ ሃይꬓንꬆ ኦዴዛ
(ማቶ. 20:17-19፤ ሉቃ. 18:31-34)
32 የሱሳራኔ ኤ ታማርታይር የሩሳላመ Ꮊማዳር፥ የሱሳ ፋ ታማርታይፕ ቲን ቲን የꬍዛ። ኡ የያ ማላባዝ ጌዛ። ኤዛ ካልዝታይካ ያሽቴዛ። ናምእንꬆ፥ ታጶ ናምኢ ታማርታ ጋጻ ከሲ፥ ፋና ሄሎድ ባዛ ዱማ ኡንትስ Ꮊይ ጋርክ ዬጊ ኦዴዛ። 33 «ዬዛኮ፥ ኑኒ የሩሳላመ Ꮊት ዎላ ኬሳል የዛ። የይዳ አስ ናአ፥ ቄሰ ሀላቅታይስኔ ህገ አስታማርታይስ ኣꬂ እንግንቶዳ። ኡ ኤዛል አፋ Ꮊይቆ ፕርዳ ፕርዶዳ፤ ማ አይሁደ ባ ዎያስ ኤዛ ኣꬂ እማዳ። 34 የ አይሁደ ባ ዎያይ ኤዛ ቶቾዳ፥ ኤዛል አፋ ጩቶዳ፥ ልሶር ጋራፎዳኔ ዎꬎዳ። ኤ ሀይꬒ ጋላሳፕ ጉየ፥ Ꮊይቆፕ ደንዶዳ» ዬጌዛ።
ያይቆባራኔ ዋንሳ ዎሳ
(ማቶ. 20:20-28)
35 ዛብዶሳ ናእታይ ያይቆባራኔ ዋንሳር የሱሳኮ ይኢ፥ «አስታማራዮ፥ ኑኒ ነና ዎስዛ ኡባ ባዝ ኑስ ኦꬆዳይ ጋርክ ኮይዛ» ዬጌዛ።
36 ኤ ኡንትኮ፥ «ታኒ ይንትስ አብ ኦꬆ?» ዬጌዛ።
37 ኡንቲ፥ «ኔኒ ነ ቦንቾ ካተትꬃ በትዛ ጋላስ ኑፕ ፐታ ኡሻች ባጋር ማ ፐታ ሀድርስ ባጋር በትꬆየ» ዬጌዛ።
38 ዝን የሱሳ ኡንትኮ፥ «ይ አብ ዎስዛኮ ኤሮያ፥ ታ ኡዦዳይስ የዝ ጹአ ኡዦዳይስ ዳንዳእኔ? ማ ታ ጻማቅንቶዳይስ የዝ ጽንቃታ ጻማቅንቶዳይስ ዳንዳእኔ?» ዬጌዛ። ሉቃ. 12:50
39 ኡ ማሂ፥ «ኤ ኑ ዳንዳእዛ» ዬጌዛ።
የሱሳ ማካ፥ «ቱማ ታ ኡዦዳይስ የዝ ጹአ ይ ኡዦዳ፥ ታ ጻማቅንቶዳይስ የዝ ጽንቃታ ይ ጻማቅንቶዳ። 40 ዝን ታፕ ኡሻች ባጋራኔ ሀድርስ ባጋር በቶድታ ዶሮ ታ ዎልቃ ባያ፥ ዝን የ አቃይ ጾሳይ እማዳይስ ጊግሲ ጋዴዝታይሲ» ዬጌዛ።
41 Ꮊንኮ ታጲ ታማርታይ የያ ስኢ ያይቆባላኔ ዋንሳል ጋይልንቴዛ። 42 የሱሳ ኡንታን ኡባ ፋኮ ጼጊ፥ «አይሁደ ባ አስታይስ ሀላቅታይ ጋደ አቅስዝታ ግንትንቲ ጼግንትዝታይ ሞድዝታይስ ፋ አስታይል አፋ ማዉተ የዛና ይ ኤርዛ። ሉቃ. 22:25-26፤ ማቶ. 23:11፤ ማር. 9:35፤ ሉቃ. 22:26 43 ዝን ይ ጋንጨ የይ ጋርክ ባያ፤ ይንቲ ይ ጋንጨ ባይራꬎዳይስ ኮይዝ ኦንካ ይንትስ አይለ ማቆዳይስ ቤዝዛ። 44 ማ ይ ጋንጨ ኡባፕ ꬎቃ ማቆዳይስ ኮይዝ ኦንካ ይ ኡባይስ አይለ ማቆዳይስ ቤዝዛ። 45 ሀራ አቶዝን፥ አስ ናአይካ፥ አስስ ኦꬆዳይስኔ ጋምታ ዎዞዳይስ ፋ ሸምፖ ኣꬂ እማዳይስ የኤዛፕ አትን አሲ ኤዝስ ኦꬆድ ጋርክ የኤካያ» ዬጌዛ።
የሱሳ ቶአ ባርጽሞሳ አፋ ፓꬄዛ
(ማቶ. 20:29-34፤ ሉቃ. 18:35-43)
46 ኡንቲ ኢያርኮ ካታማ Ꮊንጌዛ። የሱሳ ፋ ታማርታይራኔ ጋመ አስታይር ኢያርኮፕ ከሳዳር፥ ጽሞሳ ናአይ፥ ቶአይ፥ ባርጽሞሳ ግንትንትዛይ፥ ኦገ ጋጻ በቲ ዎስዛ። 47 ባርጽሞሳ፥ ኤ የ ኦጋይር ኣꬍዛይ ናዝረተ የሱሳ ማቄዛና ስኢ ፋ ቃላ ꬎቅ ኡዲ፥ «ዳዉተ ናአ የሱሳ፥ ታና ማሮየ!» ዬግታር ኡፎ አይኬዛ።
48 ጋመ አሳይ ኤዛ፥ «ሀይዞባ!» ዬጊ ቆዴዛ።
ዝን፥ ኤ ፋ ቃላ ቲናሳይፕ ኣꬂ፥ «ዳዉተ ናአዮ፥ ታና ሀያና ማሮየ!» ዬጌዛ።
49 የሱሳ ኤቂ፥ «ኤዛ Ꮊና ጼጎይታ» ዬጌዛ።
ኡንቲ ቶአይኮ፥ «አኮ ባያ፥ ደንዲ ኤቆባ፥ ነና ጼግዛ» ዬጌዛ። 50 ቶአይ ፋ አፍላ ꬎጊ ኦሊ፥ ጉፒ ደንዲ ኤቂ፥ የሱሳኮ Ꮊንጌዛ።
51 የሱሳካ፥ «ታ ኔስ አብ ኡዶድ ጋርክ ነ ኮዬ?» ዬጌዛ።
ቶአይ፥ «አስታማራዮ፥ ታ በአዳይስ ኮይዛ» ዬጌዛ።
52 የሱሳ ኤዛ፥ «ቅቶባ፥ ነ አማናይ ነና ፓꬄዛ» ዬጌዛ። እዝር ኤ ኣፋይ ብእን፥ ኦገር የሱሳ ላሳ ካሌዛ።