Waannisa xaafeez Tiina Kiita
Gelo
Hawaare Waannisa xaafeez tiina kiitay, nam77ii aafe qofita aykkeeza. Yeykka nabbabizitay Xoossay e na7a Yesuus Kiristtoosar pettipettithii yezoday garkk minthathodayisinnee ye pettipettitha dhabisiza worddo timirttaypp haakkoday garkk unttan qopisodayisii. Ye wode denddeez worddo timirttay, «Xoossii benttowa ayyana alame medheeza. Yha benttiz alamannee nu asetitha Xooss medhdhekka gishos iita. Ma yha benttiz alamannee nu asetithay nu ayyana qohodayisinnee tunisodayis danda7ooya» yeegii taamarssiza. Yeya guussay, tiina, Yesuusa as maaqqii ye7ekkaya. Nam7anthay, pettii as fa ayyana tunisekka yezar fa ashor nagara oothodayis danda7iza yeegiza.
Yeyi gishos, Waannisa fa kiitayid, Yesuusa as maaqqiza kaddiza oonkka Xooss na7a baaya (4:2-3). Ma Xoossapp yelintteez oonkka ubba wode nagarara yezoowa (3:6) yeegii xaafeeza.
Ye worddo asitamaaritay, «Atotithi guussay, yha sa7a yessis un77inttopp kezii wallo kess guus» yeegiza. Yeyil afa gujjii, «Iitannee lo77o shaakkii aykithi maaqqin, ma hara as siiqo maaqqin atotithar abikka helithiza baz baaya» yeegiza.
Xaafay yha timirtta ixxii, «Yesuus Kiristtoosa folo as. Yesuusa ammanizayinnee Xooss siiqizitay ubbay fa gancce pettay pettayir siiqinttodayis beeziza» yeegii odeeza.
1 Waannisa kiitay aykkeez qofita
Gelo 1:1-4
Poo7onnee dhuma 1:5—2:29
Xooss na7itannee daabuloosa na7ita 3:1-24
Tumannee worddo 4:1-6
Siiqo ooso 4:7-21
Gamiz ammano 5:1-21
1
De7o qaala
1 Tiinapp aykkii yez, de7o qaalay bagga nu yinttis xaafiza. Yha de7o qaalay nu nu hayer si7eez, nu aafer be7eez, nu kusher aykkeezaya.Wan. 1:1 2 Ye de7o inggizay qonccin, nuunii eza bi7ii, ebaz markkattiza. Ade kale yezay nuus qoncceez, medhina de7obagga yinttis ododa.Wan. 1:14 3 Nuura yinttis pettipettithii yezoday garkk nuunii be7eezanannee si7eezana yinttis ododa. Nu pettipettithay Adayranne e Na7a Yesuus Kiristtoosar wola. 4 Nu ufayssay folo maaqqoday garkk yhaya yinttis nu xaafoda.
Xooss poo7o
5 Nuunii eepp si7ii, yinttis odiza kiitay: «Xoossii poo7o; ezar dhuma yesha baaya» yeegizaya. 6 Nuus ezar pettipettithii yeza yeegttar nu dhuma yeziko, nuunnii worddotiza. Tumakka nuur baaya. 7 Zini E poo7o yezay garkk, nuukka poo7o yeziko, nuus woli gancce pettipettithii yeza. E Na7a, Yesuusa suuthay nagara ubbaypp nuna geeshshiza.
8 Nuunii, nuur nagara baaya giiko nu nuna dooshshiza; nuur tumatithikka baaya. 9 Zini Xoossayis nu nagara buuxiko, E nu nagara atto godayisinnee nu qoho ooso ubbaypp nuna geeshshodayis, ammanintteezayannee Geeshsha. 10 Nuunii nagara oothekka giiko Xoossana worddo kessiza; e qaalaykka nuur baaya.