2
De7o shuchchinnee doorintteez woya
1 Yikkee iitatithi ubba, doosha ubba, cubbotithi qinaatennee zigirssi ubba yinttipp haasoytta. 2-3 Goday keeha maaqqeezana yi ereezay garkk yhatti yelintteez xiqqa na7itay garkk yi atotithar diccodayis gene baa qaala maathi ubba wode amottoytta.Maz. 34:8
4 Asar borinttii Xoossar doorintteez bonchcho maaqqeez shuchch, Goda Yesuusako shiiqoytta. 5 Yi de7o shuchita maaqqii, Yesuus Kiristtoosa baggar Xooss ufayssiza ayyana yarshsho yarshshiza geesh qeesita maaqqoday garkk Ayyana keethi maaqqii keexxinttoytta. 6 Geeshsha Maxaafayid,
«Yeezako, taanii Xiyone katama keetha muumer tookkii aykkiz kirkiro garkk,
doorintteez, bonchcho shuchch gaddoda;
eza ammaniza oonkka yesha yeellataamii»
yeegiza.Isa. 28:16 7 Yha shuchchay yinttis ammanizitayis boncho, zin ammanowazitayis,
«Gimbbizitay leqqii ixxeez shuchchay
keetha muumer tookkii aykkiz kirkiro garkk,
ubbaypp aadhiz shuchch maaqqeeza.»Maz. 118:22
8 Maakka,
«Yha shuchchay as dhubbiza shuchchinnee as pokisiz zaalla»
yeegiza. Unttii yeyis qaadintteez gishos Xooss qaala kiitinttaam ixxii dhubintteeza.Isa. 8:14-15
9 Zini Xoossii dhumapp malalisiza fa poo7ayko yinttan xeegeezay, yi e lo77otitha haritayis ododayis doorintteez kochch, kaat qeese, geeshi yeletithinnee Xooss duma woya.Kes. 19:5-6; Isa. 43:20-21; Nam7i. 4:20; 7:6; 14:2; Tito 2:14; Isa. 9:2 10 Yi tiina Xooss woya baaya, zin yhatti yi e woya. Yi tiina maarotithi denggekkazita, zin yhatti maarotithi denggeeza.Hosa. 2:23
Xooss aylle garkk yess
11 Ta ishuntho, yi yha sa7a imathinnee bete as maaqqeezay garkk yi shemppo oliza asho amopp haakkod garkk taanii yinttan woosiza. 12 Ammanoowa asay yinttan iita oothiz as garkk zigiriko Xoossii nuna be7adayis yi7iza gallas, unttii yi lo77o oosa bi7ii Xoossa galatoday garkk yinttis lo77o de7o yezo.
13 Goday gishos gi mawuter yez asayis haarinttoytta; ubbaypp afa maaqqeez gishos kaatayiskka moodinttoytta. 14 Unttii iita oothizita seerodayisinnee lo77o oothizita sabbodayis kaataypp kiitintteez gishos gade aqizitayis haarinttoytta. 15 Yi, yi lo77o oosor eroowa boozo asay nashsha doona ayithoday Xooss shene. 16 Xooss aylle maaqqii wallo yezoyttap attin yi wallotitha iita oosos kame udippate. 17 As ubba bonchchoytta; ammaniza asa siiqoytta; Xoossis yashittooytta; kaat bonchchoytta.
Kiristtoosa waayayis aaziso
18 Aylluntho, lo77o goditayisinnee keeha goditayis aadda baazin iititayiskka bonchchor haarinttoytta. 19 Asii Xooss gishos gi beezoowa waaye ekkiko Xooss eza anjjoda. 20 Zini yi nagara oothin yinttan yhadhdhin yi danda7iko yinttis aba galata yenee? Zini lo77o baz udii waaye danda7iko Xoossii yinttan yeyis anjjoda. 21 Xoossii yinttan xeegeezay yey gishos; Kiristtoosa yinttis waayintteeza; yi eza kaalloday garkk, yinttis aaziso maaqqeeza. 22 E nagara oothekkaya; e doonayidakka cubbotith benttekkaya.Isa. 53:9 23 Unttii eza cazhizin E mahii cazhekkaya. Zini waaye ekkittar xillo pirddiza Xoossayis fa pirdda ashshii ashshenepp attin manddekkaya.Isa. 53:7 24 Nuunii nagaras yhayqqii xillotithis yezodaygarkk Kiristtoosa fa ashayid nu nagara mazqalel afa tookkeeza; yi e madothayir paxeeza.Isa. 53:5 25 Binii yi oge balii laalinttii dhabeez dur garkke, zin yhatti yi shemppo heenggizayikonnee naagizayiko maaqqeeza.Isa. 53:6