Phawuloosa Ximaatoosas Xaafeez Nam7antho Kiita
Galo
Phawuloosa Ximaatoosas xaafeez nam7antho kiitay, Phawuloosar wolla ootheezannee Phawuloosa kale maaddiza yelaga Ximaatoosana zoreez zora aykkeeza. Ye zorayis aafe qofay, «Garizhor miinggoday garkke» yeegiza. Ximaatoosa zorennee minthatho qaala ekkeezay, Yesuus Kiristtoosa bagga tuma markkattoday garkk Wonggile qaalannee kase Caaqo timirtta miinthii aykkoday garkke metonnee ixxo gaanggikokka tamaarssorannee Wonggile sabbakor miinggoday garkkesii.
Ximaatoosa cere boozetith palamapp haakkoday garkk duma mino zore ees inggintteeza. Yey garkk oday as dhabisizapp attin akkokka maaddooya.
Ye ubbayid Ximaatoosa akaakkodayis beezizay, Phawuloosa hannanne e yessa yeykka, e ammano, e garzho, e siiqo, e miinthetithannee eza helleez meta aaziso udii kaalloday garkke. Phawuloosa fa laaso haasii yhayiqos giigintteez wode yha kiita xaafeeza.
2 Ximaatoosa kiitay aykkeez qofita
Gelo 1:1-2
Ximaatoosas inggintteez zore 1:3—2:13
Wurssith wode bagga 2:14—4:5
Phawuloosa hanii yez yessay 4:6-18
Kustte qofa 4:19-22
1
1 Xooss shener, Yesuus Kiristtoosapp bentteez de7o ufayssapp dendeezayid Yesuus Kiristtoosas hawaare maaqqeez Phawuloosapp, 2 ta dosiza na7a Ximaatoosas;
Xooss Adayppenne nu Goda Kiristtoosa Yesuusappe aadho keehetithii, maarotithinnee sarotithi maaqqo.Haw. O. 16:1
Ximaatoosas inggintteez zore
3 Taanii, ta woosayid qammannee gallas nena qoppiza. Taanii woossiza wode ta aditay garkk ta lo77o kahar eesi oothiza Xoossa ne gishos galatiza. 4 Taanii ne afutha qoppiza; nena bi7ii ufayttizana gaame laamotiza.
5 Ma nees yez tuma ammana ta eriza. Ye ammanay binii ne wogga indat Loydirannee ne indat Ewuniqes yez ammanay garkke.Haw. O. 16:1 6 Yeyi gishos, taanii ta kushayid neell afa gaddeez wode Xoossii nees inggeez imota neenii mahii eethoday garkk ta nena qofisiza. 7 Abis giiko, Xoossii nuus wolqqa, siiqonnee nu ubba haariza Geeshsha Ayyana inggeezapp attin yashsha ayyana inggekkaya.
8 Yikkee, nu Godayis markkattodayis yeelatippe; ma e gishos accintteez ta baggarakka yeelatippe. Zini Xoossii nees inggiza wolqqar Wonggile gishos taar meto ekkoba. 9 Xoossii fa shenerannee fa aadho keehetithayir nuna dummasii, fa geeshsha woya udodayis nuna dooreezapp attin nuunii ootheez ooso gishos baaya. Yha aadho keehatitha Kiristtoosa Yesuusa baggar alame medhinttodaypp tiin nuus inggeeza. 10 Yhatti yha aadho keehetithay nuna ashshiza Kiristtoos Yesuusa yi7ithayir bentteeza. E yhayiqo wolqqa dhabisii, Wonggile baggar yhayqqoowa de7o nuus qoncciseeza.
11 Taanii Wonggile sabaake, hawaarennee asitamaare maaqqod garkk Xoossii taas mawute inggeeza.1 Xim. 2:7 12 Taanii yey gishos yha meta ekkiza; zin ta ammaneezay oonazako eriza gishos yeellataamii. Taas inggintteez hadara Yesuusa maaqqii ye7od gallasay hellodayis E naagodayis danda7izana ta eriza.
13 Taanii nena taamarsseez tuma qaala aaziso oosa aykkii Kiristtoosa Yesuusar yez ammanayirannee siiqayir yezoba. 14 Nu gancce yez Geeshsha Ayyana wolqqar nees inggintteez lo77o hadara naagoba.
15 Iisa Awurajja yez ubbay taapp haakkeezana ne eriza; u gancce Figeluusarannee Hermmogeneesara yeza.
16 Anesfoora tana unddenna wode minthatheez gishos Goday e kara asayis qadhintto. Taanii achch kara yez wode E ta achchayidakka yeellatekkaya. 17 Yeyil afa E Oroome katama ye7eezan garkk tana miinthii koy denggeeza. 18 Wurssith gallas Goday ees qadhinttoday garkk taanii Goda woosiza. Efesoona katama yez wode E tana ab garkk maaddeezako ne loythii eriza.