1 Yikkee, yi Kiristtoosar yhayiqopp dendeezaygarkk, Xoossaypp ushachch bagga betteez Kiristtoosa yez aqo, salo yezabazita koyoytta.Maz. 110:1 2 Salo yezitayil afa yi qofa gaddoyttapp attin sa7a yezbazibazitayil afa gaddippate. 3 Yhayiqor shaginttizay garkk yi yha alame iita hanopp shaakintteeza. Yi de7ay Kiristtoosar wolla Xooss gancce qosintteeza. 4 Yinttis de7o maaqqeez Kiristtoosa qoncciz wode ye wode yinttikka ezar bonchchor qonccoda.

5 Yey gishos, yinttal yez yha sa7a asho qofita wodhoytta. Yeyititaykka lagite, tunatithii, lagites tenttito, eeqas goynno garkke maaqqeez amotithii. 6 Yeypp denddeezayid Xooss kachchay azazinttowa asayil afa ye7oda. 7 Yinttikka tiina ye iita ogayir yedhdhitar yhayttita ootheeza.

8 Yhatti maaqqiko yi yeyitita oothippate. Yeyititaykk kachchii, yilo, genennee borsso nashsha yinttipp haasoytta. 9 Ceega hanotitha e oosayir yinttipp qaareez gishos wolis wordditipatte.Efi. 4:22 10 Medhizaya aaziz, eretithar laamintteez oroth hanotitha ma77oytta.Medhe. 1:26; Efi. 4:24 11 Yha oroth medhetithayir, Girike as woy Ayihude as, dookalintteezay woy dookalinttekkazay, tamaareez as woy tamaarekka as*Iskute as: Guusay wozina mino as woy wozina iita as guussii. aylle woy godi baaya. Kiristtoosa ubba; E ubbayidakka yeza.

12 Yeyi gishos, Xoossii maraxeez as garkk geshetithar dosintteezita maaqqii, maarotith, qadhe, ashikketith, haayotith keehatithinnee danda7a ma77oytta.Efi. 4:2 13 Woli danda7oytta. Oonkka fa laggaypp qohintteez baz yeeziko ees atto goytta. Goday yinttis atto geezay garkk yinttikka wolis atto atto goytta.Efi. 4:32 14 Ye ubbayil afar ubba baz wolalli shiishii acciz siiqo ma77oytta. 15 Xoossii yinttan pettii as udii xeegeezay, sarotethis maaqqeez gishos Kiristtoosa sarotithay yi wozina haaro. Galatar kumeezita maaqqoytta.

16 Kiristtoosa qaalay yi wozinayid kumii yezo. Ecetith ubbar woli tamaarssoyttannee zoroytta. Mazmuurer, sabarannee ayyana yethar Xoossa wozinapp galatittar yexxoytta.Efi. 5:19-20 17 Xooss Ada Yesuusa baggar galatittar yi odinttiza woy oothizabaz ubba Goda Yesuusa sunthayir oothoytta.

18 Machchitayyo, Goday tiina beeziza baz maaqqeez gishos yi azinitayis azazinttoytta.Efi. 5:22; 1 Phix. 3:1

19 Azinitayyo, yi machchita dosoytta; unttis iitipatte.Efi. 5:25; 1 Phix. 3:7

20 Na7itayyo, yinttan yeleezitayis ubba bazar azazinttoytta; yeyi Goda ufayssizabazii.Efi. 6:1

21 Yeleezitayo, yi na7itay ufayss gachchaamay garkk unttan yilosippate.Efi. 6:4

22 Ayllitayyo, sa7all afa yinttis god maaqqeezitayis ubba bazar azazinttoytta. Goda bonchchittar luule wozinapp kiitinttii unttan ufayssoyttapp attin asii bo7o gi oothippate.Efi. 6:5-8 23 Yi oothiza ooso ubba asis baazin Godayis oothizaygarkk wozinapp oothoytta. 24 Godaypp salo biitta woyito udii naggodana eroytta; yi Goda Kiristtoosas oothiza. 25 Xoossii as aafe zoqo bi7ii pirddoowa gishos oonkka iita ooso oothiko fa iita oosay gishos mahith ekkoda.Efi. 6:5-8