Phawuloosa Efisoone Asayis Xaafeez Kiita
Gelo
Phawuloosa Efisoone yez asayis xaafeez kiitay ubbaypp aathii be7eezay, «Wode heliko Xoossii polodayis qoppeez qofay, salonnee sa7a yez medhetith ubbay Kiristtoosapp oommo maaqqoday garkkesii» yeegiz qofa (1:10). Yeyil afa gujjii Yesuus Kiristtoosar yez pettipettithayid, as zereth ubbay petto maaqqoday garkk yha gita qofa oosol peeshshoday garkk Xooss woyita qoppisiza.
Efisoone kiitay tiina kifilayid xaafeez kaara qofa maaqqeez pettipettith bagga xaafodayis aykkeezana dalggisii, Xoossay Aday fa asa wayizii dooreezako, unttikka E na7a, Yesuus Kiristtoosar fa nagarapp maarotith denggeeza wayizii wallo kezeezakonnee, Xoossa gita ufayss qaalay Geeshsha Ayyana baggar tuma maaqqeezay wayizii erintteezako odiza. Nam7intho kifilayid ma xaafeezay yha kiita nabbabiza asay fa pettipettith yessayid Kiristtoosar unttis yez pettipettithay tuma maaqqoday garkk u wayizii yezodayis beezizako qofisiza.
Asay Kiristtoosar yez pettipetteth wayizii yezodayis beezizako duma duma aazisor qoncceeza. Woosa keetha asetithis aaziso maaqqin Kiristtoosa ye asetithayis kustte. Woosa keethi gimbbe keethar aazisinttin Kiristtoosa ye keetha muumer tookkii aykkiz kirkiro garkk maaqqiz waanna shuchch. Woosa keetha machchir aazisinttiza wode Kiristtoosa azinar aazisintteeza. Xaafay Kiristtoosa baggar qoncceez Xoossa aadho kehetithapp gaame soobii odittar, ganccay ciimmottiza nashsha nashshiza. E ubba baz, Kiristtoosa siiqo, e yarshshintto, E inggeez nagara atotitha, E aadho keehetithinnee e geeshshitith baggar benttiza.
Efisoone kiitay aykkeez qofita
Sarotho 1:1-2
Kiristtoosannee woosa keeth 1:3—3:21
Kiristtoosar yez oroth de7o 4:1—6:20
Kustte qofa 6:21-24
1
Sarotho
1 Xooss shener Kiristtoosa Yesuusa hawaare maaqqeez Phawuloosapp, Efisoone yez geeshshitayisinnee Kiristtoosa Yesuusa ammanizitayis xaafintteez kiita.Haw. O. 18:19-21; 19:1
2 Xooss nu Adayppennee Goda Yesuus Kiristtoosapp aadho keehatithinnee sarotithii yinttis maaqqo.
Ayyana anjjo
3 Salo yez ayyana anjjo ubbayir Kiristtoosa baggar nuna anjjeez, nu Goda Yesuus Kiristtoosa Aday, Xoossay galatintto. 4 Nuunii e tiina geshetithar boro baazita maaqqoday garkk Xoossii alame medhinttodaypp tiina Kiristtoosa baggar fa siiqor nuna dooreeza. 5 Xoossii fa shenayid fa doseezay garkk Yesuus Kiristtoosa baggar nuna fa na7ita udodayis tiinatii qoppii gaddeeza. 6 Xoossii fa siiqiza Na7ay baggar nuus cere inggeez bonchchintteez aadho keehatithay galatinttoday garkk yeya udeeza.
7 Xoossa aadho keehatith duretithay garkk Kiristtoosa suuthar wozinttii nagaras atotith nu denggeeza. 8 Fa aadho keehatitha ecetitharannee eratithar gaanthii nuus inggeeza.Qol. 1:14 9 Xoossay fa qoppii gaddeezay garkk Kiristtoosa baggar e shene xuura nu eroday garkk ootheeza. 10 Wode hellodar Xoossii polodayis qoppeez qofay, salonnee sa7a yez medhetith ubba Kiristtoosapp oommo udodayisii.
11 Ubba baz fa shene garkk oothiza Xoossay, tiinatii fa qoppii gaddeezay garkk Kiristtoosa baggar nuunii E irisitta laattoday garkk nuna dooreeza. 12 Yeyi haneezay, Kiristtoosal ufayss gaddii naagor tiina maaqqeez nuunii Xooss boncha galatar qonccisoday garkkesii. 13 Yinttikka yi atotith Wonggile, yeykka tuma qaala si7eez wode Kiristtoosana ammaneeza. Xoossay yinttis inggod geez Geeshsha Ayyana maatame yinttal gaddeeza. 14 Yeykka Xooss bonchchay galatinttoday garkk Xoossay fa asa wozod gatho Geeshsha Ayyana nu laattod gadayis nuus saath udii inggeeza.
Phawuloosa woosa
15 Yeyi gishos, Goda Yesuusall yinttis yez ammanannee geeshshitayis yez yi siiqa ta si7ii 16 ta woosayir yinttan qoppittar yi gishos Xoossa galatizana ashshekkaya. 17 Nu Goda Yesuus Kiristtoosa Xoossa, boncho Ada yi aathii eroday garkk ecetithinnee qonccith ayyana yinttis immaday garkk ta woosiza. 18 Xoossay yinttan xeegeez ufayssaynnee geeshshitay laattiza bonchcho laatay ab garkk gaameezako yi erodayiss Xoossay yi wozina aafa dooyod garkk taanii Xoossa woosiza.
19 Ma eza ammaniza nuur oothiza e wolqqay ab garkk aadho dammazako yi eroday garkk ta woosiza. 20 Kiristtoosana yhayiqopp denthii, salo fa ushachch baggar bettitheez kiristtoosar ootheez gita wolqqa. 21 E sunthay, aqisizitayppenne mawuter yezitaypp, mooddizitayppennee goditaypp, aath maaqqii yha alamayil aadda baazin tiinapp ye7od alamayidakka hara sunth ubbitaypp aadho boncho sunth inggeeza.Maz. 110:1 22 Xoossay ubba baz Kiristtoosa toke oommo haariseeza; ma woosa keethis ubba bazar kustte maaqqod garkk eza shuumeeza. 23 Woosa keethay Kiristtoosas asetithii. Izakka Kiristtoosa ubbabazar kunthiz Ees iza E kunthato.Maz. 8:6; Qol. 1:22-23; 1:18