Phawuloosa Galaatiya Asayis Xaafeez Kiita
Gelo
Yesuusa ashshizaya maaqqeezana odiza Wonggile qaalay duma duma aqo sabbakinttin, Ayihude baa asitay ammanttar ammanttar yhammadar «Kiristtaane maaqqodayis Muse higge polodayis koshshinenee koshshoosa?» yeegii woli oyiceeza. Ye wode Phawuloosa, «Kiristtaanee maaqqoayis Muse higge polodayis koshshooya; Yesuusar orothi de7o denggodayis koshshizay ammano. Asay Xooss tiina xillodayis danda7izay ammano aaddara» yeegii taamarsseeza. Zin Xiqqa Iisiya gancce, Galata awurajja yez woosa keetha yez asay gancce, «Asii Xooss tiina xillodayis Yesuusana ammano aadda baazin Muse higgakka polodayis koshshiza» yeegii Phawuloosa timirttana ixxiza asitay yeza.
Phawuloosa Galata maxaafe xaafeezay, ye buuta timirttayir balintteez asa tuma ammanayikonnee ammanor yessiko mahodayisii. Phawuloosa Yesuusa hawaare maaqqizana tillisii odo aykkeeza. Eza hawaare udii xeegeezay as baazin Xooss maaqqeezanannee E kiitintteezay Ayihude baa asayis maaqqeezana paaddii odeeza. Yeyir ayisithii asay Xooss tiina xillodayis danda7izay ammanor aadda maaqqizana odiza. Wurssithii shemppitay ammanor yessay Yesuusa ammanor benttiz siiqopp keziza maaqqizana odiza.
Galaatiya kiitay akkeez qofita
Gelo 1:1-10
Phawuloosa hawaaretith mawute 1:11—2:21
Xooss aadho keehetith Wonggile 3:1—4:31
Wallotithinnee ammanor yessi 5:1—6:10
Kustte qofa 6:11-18
1
1 Asapp woy as baggar baazin Yesuus Kiristtoosapp eza yhayiqopp dentheez Xooss Adaypp hawaare maaqqad garkk kiittintteez ta Phawuloosa, 2 taar yez ammaniza ishitay ubbitaypp, Galatiya gade yeza woosa keethitayis kiittintteez kiita.
3 Xooss nu Adaypp nu Goda Yesuus Kiristtoosapp yinttis aadho keehatithinnee sarotithii maaqqo.
4 Yha iita alamaypp nuna ashshodayis, nu Xoossayinnee nu Aday shener Kiristtoosa nu nagara gishos fana aathii inggeeza. 5 Xoossayis Medhinapp medhina hellodayis bonchcho maaqqo. Amin7e.
Tuma Wonggilay petto
6 Kiristtoosa aadho keehatithar yinttan xeegeez Xoossa ashii, hara Wonggilayiko yi ellisii wayizii maaqqeezako taas malabaz maaqqeeza. 7 Yinttan balithitarannee Kiristtoosa Wonggile wobbisodayis koyiz pettii pettii asitay yezapp attin tuma Wonggilay petto. 8 Zin nuna maaqqin woy salo kiitanchcho maaqqin nuun yinttis tiina odeez Wonggilaypp dummatiza hara Wonggile yinttis odeezibaz maaqqiko, E cazhintteeza maaqqo. 9 Yhaypp tiina taanii geezay garkk yhattekka mahii giza. Yi ekkeez Wonggilaypp dummattiza Wonggile oonkka yinttis odiko ye athay cazhinteeza maaqqo.
10 Yeezin, tana asii nashichod garkk koyinenee? Xoossii nashichod garkke? Ta as ufayssodaysonee? Ta as ufayssodayis koyiz baz maaqqiko, Kiristtoosa aylle maaqqaamizin.
Phawuloosa hawaretethis xeegintteeza
11 Ta ishuntho, ta yinttis odeez Wonggilay asapp hanekkaza yi erod garkk ta koyiza. 12 Taass yha wongila Yesuus Kiristtoosa dooyeezapp attin asapp ekkekkaya woy asii tana tamaarssekkaya.
13 Ta tiina Ayihuditay ammanayid yez wode wayizii yezeezako, yi si7eeza. Ta Xoossa woosa keeth bayi7odayisnnee dhabisodayis butiteeza.Haw. O. 8:3; 22:4-5; 26:9-11 14 Ayihuditay ammana naagor taanii, ta wodayid yez gaame Ayihude dabbitaypp aadhiza. Nu aditay wogayiskka ubbapp aathii micinttiza.Haw. O. 22:3
15 Zin ta haga yelinttodaypp tiina Xoossay tana dooreeza; fa aadho keehatithara tana xeegeeza.Haw. O. 9:3-6; 22:6-10; 26:13-18 16 Ayihude baa asayis wonggile odod garkke Xoossay fa Na7a taass qonccisodayis koyeez wode ta oorakka zorinttekkaya. 17 Woy taapp tiina hawaare maaqqeezitayir woli hellodayis Yerusalaame yhanigekkaya. Zin ta tiinatii Arabe biitta yhanigeeza; yeypp maaqqii Damasqqo katama ye7eeza. 18 Haaydzii laythapp guye, Keefa ginttiz phixiroosa hellodayis Yerusalaame yhanigii ezar wola taphpho ichchin qamma betteeza.Haw. O. 9:26-30 19 Zin Goday isha Yayqqoobapp attin yhankko hawaarita ta be7ekkaya.
20 Ta yinttis xaafizay worddo baazana Xooss tiina yinttis odiza.
21 Yeypp guye, taanii Soora biittannee Kilqqa biitta yhanigeeza. 22 Yihuda gancce yez woosa keeth asay tana bi7ii erekkaya. 23 Zin unttii, «Kase nuna bayi7ithiz athay, yhatti E dhabisodayis koyiz ammanay bagga sabbakiza» yeegizana si7eeza. 24 Si7eez ubbay ta baggas Xoossa galatteeza.