3
Yesuusa Musepp aadhiza
1 Yeyi gishos, Xooss xeessa shagintteez geeshsha ishuntho, nu ammanos Goda gi xeegiz hawaarennee qeese halaqa Yesuusa bo7oytta. 2 Muse Xooss Kara ubbayid ammanintteezay garkk Yesuusakka fana shuumeez Xoossayis ammanintteezaya. 3 Keeth keexxizay keethaypp aadhii bonchchinttizay garkk Yesuusa Musepp aadhiz bonchcho ekkodayis beeziza. 4 Pettii pettii keethis keexxeez asii yeza, zin ubba haniseezay Xoosse. 5 Muse Xoossii Kara ubbayid ammanintteez aylle maaqqii, Xoossii tiinapp godibazayis markka maaqqeeza. 6 Zini Kiristtoosa Xoossis na7a garkk ammanintteezaya. Nuunii ekkoda gi yashsha bayth ceeqqor naagiza ufayisa miinthii naagiko nu E kara.
Xooss woyas yez shemppo
7 Yeyi gishos, Geeshsha Ayyanay gizay garkk,
«Yhayino yi Xoossay giza si7iko
8 liizho biitta yi tana paaceez gallas,
yi aditay worzhateezay garkk,
yi wozina minthippate.
9 Ezayid yi aditay tana paacceeza;
oyttam laythi ta oosa be7eeza.
10 Yeyi gishos, ta ye yeletitha seereeza,
‹Unttii ubba wode fa wozinayir balinttiza;
ta oga erekkaya› ta yeegeeza.
11 Yeyi gishos,
‹Ta shemppo aqa ubbarakka gelaamii› yeegii,
taanii ta seerayid caaqqeeza, yeegeeza» yeegiza.Maz. 95:7-11
12 Ta ishuntho, yinttipp o ganccekka, de7o Xoossaypp yinttan shaakkiza iitannee ammanoowa wozina yezaamay garkk naaginttoytta. 13 Yinttipp oonakka nagara balithin, fa wozina minthaamay garkk «Yhayino» yeeginttii xeeginttodar gallas gallas wolir zorinttoytta. 14 Nu tiina ammana nuunii wurssithii hellodayis miinthii naagiko, Kiristtoosar pettipp laattoda. 15 Geeshsha Maxaafayid,
«Yhayino Xoossii giza yi si7iz wode
ye wode unttii worzhetithar haneezay garkk,
yi wozina miinthipate»
yeegeeza.Maz. 95:7-8
16 Xooss gizibaz si7ii worzheteezitay oonanttara? Muse Gibxxepp kaalithii kesseez ubbita baasannee?Tay. 14:1-35 17 Xoossii oyttam laythi oona seereenee? Nagara ootheezitannee u ahay liizho biitta wodhdhii atteez asita baasannee? 18 Ma Xoossii, «Ta shemppo aqa u gelaamii» yeegii caaqeezay, ees kiitinttaam ixxeez asaysapp attin ooso? 19 Yikkee, unttii ye shemppo aqa gelekka atteezay ammanekka gishos maaqqeezana nu bo7oda.