Yayqqooba Xaafeez Kiita
Gelo
Yhay Yayqqooba kiitay, ammaniza asii gallas gallas fa yezod yessa tamarisiza qofita aykkeeza. Yha kiitay xaafintteezay, biitta ubbayil laalintteez taphpho nam7i Ayihude kochchitayis. Yha maxaafe xaafeezay, eccetith nuunii oosol peeshshiz hiilla, ammaniza asa moko baggannee lo77o amalebagga oge maaqiz bazita misili odar geeshshii beeziza.
Yayqqooba kiitay, Manqqotith bagga, duretith bagga, paace bagga, lo77o amale bagga, qinaatebagga, ammano bagga, lo77o ooso bagga, iranthi moodo bagga, eccetith bagga, pettay pettayir kachch bagga, utira bagga, haayotith bagga, hara asal afa pirdda bagga, ceeqintto bagga, garzho bagga, woosa baggannee ammaniza asay oothodayis beeziza baz ubba paaddii xaafeeza.
Yayqqooba kiitay, kiristanetith yessay ammano oosor benttiz maaqqeezana qonccisii beeziza.
Yayqqooba kiitay aykkeez qofita
Sarotho 1:1
Ammanonnee eccetith 1:2-8
Manqqotithinnee duretith 1:9-11
Paace 1:12-18
Xoossa qaala sissinnee oosol peesho 1:19-27
Ase asapp paro koshshoowaza 2:1-13
Ammanonnee ooso 2:14-26
Iranth moodo bagga 3:1-18
Ammaniza asinnee yha alama 4:1—5:6
Duma duma bazitayis inggintteez zorita 5:7-20
1
1 Xoossa Goda Yesuus Kiristtoosa ayllay, Yayqqooba, alame ubbayil laalintteez taphpho nam77ii sheeshitayis kiitteez kiita.Mat. 13:55; Mar. 6:3; Haw. O. 15:13; Gal. 1:19
Saro, yinttis maaqqo.
Ammanonnee ecettith
2 Ta ishuntho, yinttan duma duma paace helliza wode yi lo77o baz denggeezay garkk udii kunth ufayssar ekkoytta. 3 Yi ammanay paacinttay yinttis garzho inggizana yi eriza. 4 Yi wurssith hellodayis yibatar danda7iko abikka paccekka yinttan polonnee kunth maho. 5 Yinttapp ooskka eccettithii dhabiko Xooss woosso. E yinttis inggoda. Xoossay oonakka borekazar ubbayis keehatithar inggiza Xooss. 6 Zin woossittar ammanor se7ekkazar Xoossa woosso. Se77iza oonkka carkko eni7isin eni7iza abba zulo garkke. 7-8 Nam77ii qofa yezaynne fa ogayil eqqooya oonkka Godaypp abkka demmada aazippe.
Manqqotithinnee duretis
9 Ammaniza manqqo asay, Xoossay unttan dhoqqi udod gisho ufaytto. 10 As duretithii fudhe garkk dhabiza gishos ammaniza dure asay Xoossay unttan ziqqi udikokka ufaytto.Isa. 40:6-7 11 Away fa mishar kezii maata melisiza, fudha gufisiza; e lo77otithaykka dhabiza. Yey garkkekka, dure asay fa oosor daaburittar dhaboda.
Ase helliza paace
12 Meto gamii aadheezaypp guye, Xoossay fana qaadhizitayis immad gi qaala caaqo geleez de7o zawude ekkod gishos metor garzhiza as anjjintteezaya. 13 Oonkka paacinttiza wode «Tana Xoossay paacceeza» giippe. Xoossay iitar paacinttooya; ma E oonakka paaccooya. 14 Zin pettii pettii as fa iita amotithar gooshinttittaranne dooshinttittar paacinttiza. 15 Yeyppe guye, amotith wodexxii nagara yeliza; ma nagara diccii yhayiqo yeliza.
16 Ta siiqo ishuntho, doshinttippate. 17 Lo77o imonnee kunthi anjjo ubbitay saloppennee salopp yi7iza. Yeykka kuya garkk ubba wode wutoowa woy laaminttoowa poo7itay aday Xoossaypp yi7iza. 18 Nuunii, e medhetithis bayira maaqqad garkk nuna tuma qaalar fa shener yeleeza.
Si7eezanna oosol afa peesho
19 Ta siiqo ishuntho, yhaya dogippate. As ubbay si7odayis elliso, zin odinttodayisnee kaccinttodayis ellisippe. 20 As kachchii Xoossay xillotitha ko7ooya. 21 Yey gishos, tuna hanonnee iitatith ubba dhabisii, Xoossay yi wozina gancce tukkeez yi shemppo ashshodayis danda7iza qaala haayotithar ekkoytta.
22 Zin Xooss qaala oosol peeshshoyttapp attin si7ith aaddar yinttan dooshippatte. 23 Qaala si7ii oothowa asii, E fana masttooter bi7iz asgarkke. 24 E fana bi7ii maaqqii qitiza, zin e ab aazizako ellis dogiza. 25 Zin oonkka wallo kessiza folo higge akaakar bi7ii, kaallii naagizay, si7eezana dogekka oosol peeshshiza athay, fa ooso ubbayir anjjinttoda.
26 Fa irantha naagekkazar goynniza giz athay fana dooshiza; e goynnay cere. 27 Xooss Aday tiina boro baa geesh goynnay yhaya: zhi7o na7itannee am7ita u metayid maadennee alame tunapp fana naago.