Oroth Caaqo Maatoosa 5

Yesuusa ambal afa taamarsseez timirtte

1 Gaame woya shiiqeezana Yesuusa bi7ii amball afa kezii betteeza. E tamaaritay eziko shiiqin, 2 yhay garkk yeegii taamarsseeza:

Tuma ufayss

(Luq. 6:2-23)

3 «Ayyanar manqqitay anjjintteezita,*

salo kaatetithay unttisii.

4 Yeekkizitay anjjintteezita,

u minthatho demmada.

5 Haayitay anjjintteezita,

u sa7a laattoda.

6 Geeshshetith nayinttizitaynnee saaminttizitay anjjintteezita,

u mizhoda.

7 Maarizitay anjjintteezita,

u maarotithi demmada.

8 Wozina geeshshitay anjjintteezita,

u Xoossa be7ada.

9 Iginthizitay anjjintteezita,

u Xooss na7ita ginttinttii xeeginttoda.

10 Geesh bazis gi,

bayi7inttizitay anjjintteezita,

salo kaatetithay unttissii.

11 «Asay yinttan ta gishos gi cazhii bayi7ii yinttal afa iita baz ubba worddor odiko yi anjjintteezita. 12 Yi salo yhanigii ekkod woyitay damma maaqqeez gishos ufayttoytta, habba goytta. Yinttapp tiina yez nabita yhay garkk bayi7eeza.»

Alamayis maxinennee poo7o maaqqith

13 «Yi biittas maxine; maxine fa maxinettitha ashshiko, fa mal7ottitha wayizii mahii demmadee? Bale olin asar yedhinttodaypp attin abiskka maaddooya.

14 «Yi biittas poo7o; derell afa yez katamtta geemodayis danda7ooya. 15 Xomppe ayithii kara yez as ubbayis poo7oday garkk dhoqqa aqo gaddizapp attin ota gancce gaddizay baaya. 16 Yey garkk asay yi lo77o oosa bi7ii, salo yez yi ada bonchchoday garkk yi poo7ay as tiina poo7o.

Muse higge

17 «Taanii Muse higgannee nabitay qaala shaarodayis ye7eeza yinttis aazppe. Ta, polodayis ye7eezapp attin shaarodayis ye7ekkaya. 18 Ta yinttis turo odiza; salonnee sa7a aadhod hellodayis higge ubbay polinttodaypp attin higgaypp pettii qaala woy pidaale xuuqakka aadhaamii. 19 Yey gishos, yha kiititaypp xiqqiza pettii kiita menthiza oonkka ma yhankkita yey garkk oothod garkk tamaarssizay oonkka salo kaatetititha ubbapp laafa maaqqoda. Zin yha kiita polizitaynnee yhankkitakka polod garkk tamaarssizay salo kaatetitha aath maaqqoda. 20 Ta yinttis odiza; yi xillotithay Ferisaawitay xillotithayppennee higge asitamaaritay xillotithaypp aadhekka attiko, salo kaatetith yi yesha gelaamii.

Shemppo wodho bagga

21 «Yi mayzitayis, ‹Wodhippatte; shemppo wodhiz oonkka pirddinttoda› ginttintteezana yi si7eeza. 22 Zin ta yinttis odiza; fa ishayir kacinttiz ubbay pirddinttoda. Fa isha curqay giz oonkka daynna tiina pirddas shiiqoda. Fa ishayiko, ‹Tullay› giz oonkka gaanname tama pirddinttoda.

23 «Yey gishos, neenii ne yarisha yarshshodar ne isha shifisheez baz neesi qoofinttiko, 24 ne yarisha ya aqayid ashshii qitoba; tiinatii yhanigii ne ishayir giigoba; yeezii maaqqii, ne yarisha Xoossis yarshshoba.

25 «Nena mootizayira pirdde keeth yhanigttar ogell afa ezar dabbotoba. Yey atto giiko E nena daynna tiina kanggoda. Daynnay nena accizayis aathii immada; E nena woyine oloda. 26 Ta turo odiza; miishaypp pettii santife attekazin ciggii haasod hellodayis achch keethapp ne kezaamii.

Laammodayis beezooya

27 « ‹Laammippate› ginttintteezana yi si7eeza. 28 Zin ta yinttis odiza, maachchi bi7ii, amotteez ubbay fa wozina gancce izir laammeeza. 29 Ne ushachchi aafay nena nagara beeziza maaqqiko, kessii oloba. Ne ashay kunthizin gaanname tama gancce wodhdhodaypp ne asetithayppe pettay dhabiko neess lo77o. 30 Ne ushachch kushay nena nagara oothisiza maaqqiko, izo gachchii oloba. Ne gallay kunthizin gaanname tama gancce wodhdhodaypp ne asetithayppe pettay dhabiko, neess lo77o.

Machcho anjjo bagga

(Mat. 19:9; Mar. 10:11-12; Luq. 16:18)

31 «Fa machchato dakkiz oonkka anjjo warqqatte inggo» ginttintteeza. 32 Zin ta yinttis odiza; fa machchato lagitekkazin bili7iz oonkka iza laammod garkk oothiza. Yey garkkekka, anjjintteez asito ekkiza ubbay laammiza.

Caaqo bagga

33 «Yi mayzitayko, ‹Worddor caaqqippate; yi Xooss tiina caaqqezana poloytta› ginttintteeza yi si7eeza. 34 Zin ta yinttis odiza; ubbarakka caaqqippate. Xoossay bettiza zufaane maaqqeez gishos salor caaqqippate. 35 E tokay yedhdhiz aqo maaqqeez gishos sa7arakka caaqqippate. Gita kaat katama maaqqeez gishos Yerusalaamerakka caaqqippate. 36 Yi binanaypp pettakka boothi woy karthi udodayis danda7oowa gishos yinttii yi ubbarakka caaqqipppate. 37 Yey gishos, yi qaalay, ‹Ee› woy ‹Wa77a› maaqqo. Yeypp atteezay iitapp yi7iza.

Kushe kessodays beezooya

38 « ‹Aafe gishos aafe; achch gishos achch› ginttintteeza yi si7eeza. 39 Zin ta yinttis odiza; yinttal afa iita baz oothiz athakka ixxippate. Oonkka ne ushachch shanggala baqqiko ne haddiris shanggalakka beezoba. 40 Pettii asii ne shaamizhito ekkodayis nena dayinal mootiko, ne kootato gujjii inggoba. 41 Oonkka asii nena wolqqar fabaz toossii pettii kilo mitire bagga oge faari yhanigod garkk nena ciphphichiko, ezar nam77ii dakko oge yhanigoba. 42 Woossiza ooskka inggoba; neeppe garxxodayis koyiz oonakka kayppe.»

Ne morkkita qadhdhoba

(Luq. 6:27-28, 32-36)

43 « ‹Nena qadhdhizana qadhdhoba; nena ixxizana ixxoba› ginttintteezana yi si7eeza. 44 Zin ta yinttis odiza; yi morkkita qadhdhoytta; yinttan qohizitayis woossoytta. 45 Yey garkk yi oothiko, salo yez yi adayis yi na7ita maaqqoda. E iititayisinnee lo77itayis awa kessiza; xillitayisinnee nagaranchchitayis fa ira bukisiza. 46 Yinttan qadhdhiza as aadda yi qadhiko, yinttis aba woytto yenee? Hara attozin, qaraxe gachchisizitaykka yinno oothoosa? 47 Yinttii, yi ishitay aadda sarothiko, yhankkitaypp abi hara aadhizibaz ootheenee? Hara attozin, Xooss ammanoowa asaykka yeya oothoosa? 48 Yikkee, salo yez yi aday folo maaqqeeza ygarkk yinttikka folo maaqqoytta.»

*5:3 Ayanar manqqitay guusay Xoossal afa kattizitannee ammaninttiza asa guusii.

5:4 Isa. 61:2

5:5 Maz. 37:11

5:6 Isa. 55:1

5:8 Maz. 24:3

5:10 1 Phix. 3:14

5:11 1 Phix. 4:14

5:12 2 Zeena. 36:16; Haw. O. 7:52

5:13 Mar. 9:50; Luq. 14:34-35

5:14 Wan. 8:12; 9:5

5:15 Mar. 4:21; Luq. 8:16; 11:33

5:16 1 Phix. 2:12

5:18 Luq. 16:17

5:21 Kes. 20:13; Nam7i. 5:17

5:27 Kes. 20:14; Nam7i. 5:18

5:29 Mat. 18:9; Mar. 9:47

5:30 Mat. 18:8; Mar. 9:43

5:31 Mat. 19:7; Mar. 10:4

5:32 Mat. 19:9; Mar. 10:11-12; Luq. 16:18; 1 Qor. 7:10-11

5:33 Lewii. 19:12; Tay. 30:2; Nam7i. 23:21

5:34 Mat. 23:22

5:35 Isa. 66:1; Maz. 48:2

5:38 Kes. 21:24; Lewii. 24:20; Nam7i. 19:19

5:48 Lewii. 19:2; Nam7i. 18:13