2
Tuma ashikketith
1 Kiristtoosar yinttis minotithii yeziko; ma e siiqayirakka yi minthathintteezbaz maaqqiko, Geeshsha Ayyanar yinttis pettetithi yeziko; yi wolis keehikonnee qadhinttiko. 2 Yikkee, yi pettii qofar, siiqor, pettii wozinarannee ayyanar petto maaqqii tana folo ufayssoytta. 3 Yinttan dosor woy ceeqinttar pettibazikka oothippate. Zin yi pettay pettaypp ta aadhiza yeegii qoppekkazar yinttan ziqqi udoytta. 4 Yi pettay pettay, hara as maaddiza baz koyoyttapp attin yinttan maaddiza baz aadda koyppate.
5 Kiristtoos Yesuusar yez qofay yinttar yezodayis beeziza.
6 Ezis ubba wode Xoossatith hanotithii yeza.
Maaqqopp attin, eza Xoossar petto udiz Xoossatith hanota,
wolqqar ekkodayis koyekkaya.
7 Maaqqozin, E faass yeza bonchcha ubba ashshii,
ayllegarkk maaqqii as aazii bentteeza;
asgarkk yelintteeza.
8 E fana laafitheeza;
yhayqqod gatho,
hara attozin mazqqalel afa
yhayqqod hellodayis kiitintteeza.
9 Yey gisho, Xoossay eza aathii dhoqqi dhoqqi udeeza;
ma sunth ubbapekka aadhiz dhoqqe sunthi inggeeza.
10 Salonnee sa7all,
sa7app oommor yez ubbitay,
Yesuusa sunthay bonchchayis bunqqitoda.Isa. 45:23
11 As ubbay fa iranthayir,
Yesuus Kiristtoosa Goda yeegii markkattii,
Xooss Adayis bonchcho inggeeza.
Yha alamayis poo7o maaqqith
12 Ta ishuntho, taanii yinttar yeza wode ubbayid yi kiitintteezay garkk, yhatti taanii yi lanqqaypp haakikokka, tiinaasaypp aathii, kiitinttodayis beeziza. Xoossayis yashsharannee kukkurssar yi atotitha beeziza ooso oothoytta. 13 Xoossay, yi hanod garkk E koyiz baz yi koyoday garkkennee oothoday garkk ubba wode yi gancce oothiza.
14 Aba ooso oothittarakka zigirekkazarannee palamekkazar oothoytta. 15 Zhucannee nagara oothiz as gancce borinttoozita, borsso baazitannee Geeshsh Xoossa na7ita maaqqoytta. Yi u gancce salo xoolintto garkk poo7oda.Nam7i. 32:5 16 Yeykka hanizay de7o inggiz qaala miinth aykkithara. Ye wode ta daaburssay ta oosay cere attekka gishos Kiristtoosa yi7iza gallas ta yinttal ceeqinttoda.
17 Hano zin yi Xoossis ammanor inggiz yarshshayilannee oosayil afa taakka gujinttii yarishinttizako tana ufayssiza. Yinttikka taar ufayttoda. 18 Yey garkk yinttikka ufayttii tanakka yinttar ufayssodayis beeziza.
Ximaatoosarannee Ephphaafiraditusa
19 Taanii yi yess bagga si7ii ufayttodayis Ximaatoosa yinttiko ellisii dakkoday Goda Yesuusa shene maaqqodana ta ammaniza. 20 Yinttis wozinapp qoppiz egarkke as hara oonkka taas baaya. 21 Yhankkitay fana adiza baz kozhizapp attin Yesuus Kiristtoosa koyiz baz oothooya. 22 E taara wolla maaqqii na7a fa ades oothizay garkk Wonggile ooso ootheezannee ammaninttiza as maaqqeezana yi eriza. 23 Yey gisho, tabazii ab hanodazako bi7ii ellisii eza yinttiko dakkoda gi ta qoppiza. 24 Taanii, ta ubbas ukker yinttiko yhammadana Godayil ammaninttiza.
25 Ubbarakka, taanii, ta isha Ephafiroditusa, taar wolla ta bagga maaqqii ootheezana, wotaaddare maaqqizannee, tana maaddodayis yi azazeezana, yinttiko kiittodayis qoppeeza. 26 E yinttan ubbita be7adayis iita laamotiza. Ma E harggintteezana yi si7eez gishos fa wozinar loyithii un77intteeza. 27 E tuma hargginttii yhayqqii wurii atteeza. Zin Xoossay ezis qadhintteeza. E aaddas baazin azanay azzanol afa guzhinttaam garkk, taaskka qadhintteeza.
28 Yikkee, yi eza mahii bi7ii ufayttod garkk taaskka ta wozina xuussay irxxod garkk taanii eza ellisii yinttiko dakkodayis amottiza. 29 Goda ammaniza asgarkk eza kunthi ufayssar mokkoytta. Ma e garkk as ubbitakka bonchchoytta. 30 Yi ta lanqqe maaqqii oothodayis danda7oowa maadee maaddii Kiristtoosa oosay gishos fa shemppos miccinttakkazar yhayqqii wurii atteeza.