Phawuloosa Oroome Asayis Xaafeez Kiita
Gelo
Hawaare Phawuloosa kiitay Oroome asayis xaafintteezay, Phawuloosa Oroome gancce yez woosa keetha be7adayis qoppeez gishos E yhanigodar unttii giiginttii naagod garkk ododayisii. Phawuloosa qofay Oroome gancce yez ammanizitayira xiqqa wode ootheezaypp guye unttii eza maaddiko Isppeene yhammadayisii. Ammano bagga e ereezannee ammaniza asay ye timirtta oosol afa peeshshoday garkk qonccisii xaafeeza. Yha maxaafay gancce Phawuloosa kunth kiitay yha qofa aykkiza.
Phawuloosa Oroome gancce yez ammaniza asita tiinatti sarothii maaqqii, kaallii unttis woossizana odeezaypp guye fa kiitayis baaso qofa, «Wongilayid Xoossa xillotithay bentteeza; ye xillotithay tiinap wurssithi hellodayis ammanor bentteeza» gi odiza (1:17).
Yeyppi guye, ye qofa dalgisii xaafiza. Ayihudita maaqqin Ayihude baa asita maaqqin ubbitay nagaras moddintteezita maaqqeez gishos unttii Xoossar dabbotodayis koshshiza. Asay Xoossar dabbotodayis danda7izay Yesuus Kiristtoosana ammanora. Unttii Xoossar medhdhiza yha orothi pettipettith aafay, orothi yess maaqqeezana Phawuloosa dalggisii odiza. Ammaniza as Xoossar saro yeza; ma Xoossa Ayyana baggar nagarappennee yhayiqo wolqqapp kessii ekkiza. Shemppo 5-8 hellodayis Phawuloosa Xooss higgaynnee ammaniza as yessal oothiz Xooss Ayyana wolqqa qofay abizako odiza. Yeypp kaallii, Phawuloosa, «Xoossay as na7itayis qoppeez qofa gancce Ayihuditaynnee Ayihude baa asii wayizii wolla waaxinttodayis danda7ee?» yeegiz oychayis mahith immadayis butiteeza.
Ma Ayihuditay Yesuusa ekkaam ixxeezay Xooss qofa maaqqeezana odiza. Yey haneezay Yesuus Kiristtoosa baggar qoncciseez aadho keehetithay gancce as kochch ubbay ekkoday garkkee. Maaqqozin, Ayihuditay Yesuusa ekkod wode ye7odana Phawuloosa ammaniza. Wurssethal Phawuloosa ammanor wayizii yezodayis beezizako odiza. Xoossis ootho bagga, ammaniza asay fa biittasinne wol gancce pettay pettayis yez adetithar oothod bazinnee kaha baggar medhinttiza oyichchitay bagga paaddii odiza.
Oroome kiitay aykkeez qofita
Gelo 1:1-15
Oroome kiita kustte qofa 1:16-17
As na7as atotithii koshshiza baz 1:18—3:20
Xoossii as ashshiza oge 3:21—4:25
Kiristtoosar benttiz orothi de7o 5:1—8:39
Isreeles Xooss qofa 9:1—11:36
Ammaniza as yessi 12:1—15:13
Kuste qofannee sarotho 15:14—16:27
1
1 Yesuus Kiristtoosa aylle maaqqeez, hawaare maaqqadayis xeegintteezayppennee Xoossa Wonggile sabbakod garkk shaakintteez Phawuloosa kiitteez kiita.
2 Xoossay gaame wodepp tiina fa nabitay baggar immada geez Xooss Wonggilay geeshsha Maxaafitayid xaafintteeza. 3 Ye Wonggilay ashor Dawute sheeshapp yelintteez, Xooss Na7a, nu Goda Yesuus Kiristtoosa bagga odiza. 4 Ma E fa geeshsha Ayyanar yhayiqopp denddii, Xooss Na7a maaqqizana damma wolqqar beezeeza. 5 E baggar Ayihude baazitay ubbitay, ammanii kiitinttod garkk Kiristtoosa sunthay gishos Xoossay aadho keehatithar hawaaretithi mawute nuus inggeeza. 6 Yesuus Kiristtoosas maaqqad garkk xeegintteezitaypp baggitay yinttana.
7 Oroome gancce yez, Xoossay qaadhizitayssinnee e geeshsh woya maaqqad garkk maraxeezitayis.
Xoossa nu Adayppennee Goda Yesuus Kiristtoosapp aadho keehetithinnee sarotithay yinttis maaqqo.
Phawuloosa Oroome asa be7adayis amotithii yeza
8 Ubbapp tiinatii, yi ammanay biitta ubbayil sintteez gishos Yesuus Kiristtoos baggar yi gishos ta Xoossa galatiza. 9 Taanii e Na7ay wonggilay bagga kunth wozinar odiza Xoossay, taanii ta woosayid ubba wode yinttan qoppizayis E markka. 10 Wurssithal, Xooss shene maaqqiko, taanii yinttiko yhammadayis ogay taasi ushachod garkk ubba wode woossiza. 11 Taanii yinttis Ayyana imotithi shagodayssinnee yinttan be7adayis laamotiza. 12 Yeykka, taanii yi ammanayir, ma yi ta ammanayir miinggoday garkk.
13 Ta ishuntho, taanii Ayihude baa asaypp aafe denggeezay garkk, yinttapekka aafe denggodayis yinttiko yhammadayis qoppeeza, zin tana kayeeza.Haw. O. 19:21 14 Girike asayisnnee tamaarekka asayis ma ecitayisnnee boozitayis taas aco yeza.
15 Yey gishos, Oroome gancce yez yinttiskka Wonggile ododayis ta amottiza.
Wonggile wolqqa
16 Wonggilayir yeelataam, tiinatii Ayihudita, ezaypp Grike asayis ammanizita ubba ashshodayis Wonggilay Xooss wolqqa.Mar. 8:38 17 Xillo ammanor de7o yezoda ginttinttii xaafintteeza. Xooss xillotithay bentteeza; tiinapp aykkii wurssith hellodayis asii xillizay ammanora.Ibr. 2:4
Iitatithi
18 Tumay erinttaam garkk fa iita oosor kayiza asal afannee nagara ubbayil afa, Xooss seera salopp wodhdhiza. 19 Xoossay unttis benttodayis beeziza baz qoncciseez gishos unttii Xoossibaz eriza. 20 Alame medhintteezaypp aykkii, asis benttowa Xooss hanota, yeykka e medhina wolqqannee Xoossatithay e medhetithayir benttii yeza gishos asay fa iitatithis salambodibaz baaya.
21 Unttii Xoossa erttar, eza bonchchekayannee galatekkaya. U qofay maaddoowa baz maaqqeeza; u akaakowa wozinay dhumeeza.Efi. 4:17-18 22 Unttii fana ecita giza, zin boozita. 23 Dhaboowa Xoossa goynnodana ashshii, yhayqqiz as medhettithar, kafitay medhettithar, do7itay medhettitharannee ulor goochinttiza bazita aazisii ootheez misilita goynneeza.Nam7i. 4:16-18
24 Yey gishos, unttii pettay pettayir borsso baz oothii, fa galla toochchod garkk Xoossay unttan u wozinay amottiz tuna oosos aathii inggeeza. 25 Yey haneezay unttii Xooss turotitha worddor laammeez gishonnee medhdheez Xoossa ashshii, medhetithii goynneez gishshos. Xoossay medhinas galatintteezaya. Amin7e.
26 Yey gishos, Xoossay unttan u borsso amottithayis aathii inggeeza. U maachchitay paas beeziza dhiirathar aqoda ashshii, beezoowa baz hanii maachchii maachchar wolla aqeeza. 27 Yey garkk, dhiirathitay paasi beeziza maachchar aqiza ashii, dhiirathi dhiirathar wola aqeeza. Dhiirathi pettay pettayir amotithar xuuginttii, borsso baz ootheeza. Fa ootheez buutayis beeziza pirdde ekkeeza.
28 Unttii Xoossa erodayis ixxeez gishos beezoowa baz oothod garkk Xoossay u kaha pathaam qofas aathii inggeeza. 29 Unttar zhucatithii, iitatithii, uuzatithii, gene, qinaate, shemppo wodho, palama, dooshanne iita amo kumeeza. Unttii zigirizita, 30 as sunth iissizita, Xooss ixxizita, cazhizita, utirttizita, ceeqinttizita, iita baz oothodayis koyizitannee fa indisnnee fa adess kiitinttoozita, 31 akaakozita, caaqo menthizita, siiqo baazita, qadhe baazita. 32 Yeyititay garkk oothizitayis yhayiqo beeziza giz Xoossa higge erittar, yhayitita oothiza. U paasi ooso aadda baazin oothiza yhankkitakka sabbiza.