16
Uyarya wa Sumayili
Vano, Sarayi, amwaarawe Aparamu khaayanre. Kamana ahaana ipottha awe yo mwanthiyana o Wiciipitu, eehaninya Hakari. Sarayi ahomwiirela Aparamu: Kamana Mwaneene Nluku hokateliha uyara, nkuseke ipottha aka. Pooti kinapanka nloko nhina mo yeeyo. Aparamu aheewelela yahimilyawe Sarayi. Wakhumelenlyaya ukati wapiihenryaya Aparamu awaanyawe myakha khumi akhalaka uKanaa. Wari yooyo ukati uyo, Sarayi wanvahile awe Aparamu ipottha awe yo Wiciipitu yiihaniyaka Hakari. Uyo ahonthukumanana Hakari ni ahorupala. Woonyaya irukulu, Hakari ahopacera waweha nseru athiyana a akunya awe.
Vano Sarayi ahomwiirela Aparamu: Wumorele yo weva ula uruttu ula ukihuviha waa. Kihoovaha ipottha aka mmatatani mwaa, vano woonyaya wiira ihorupala, inakitarawa. Mwaneene Nluku akhale mayohukhumu; ni mayonihukhumu mi ni we. Aparamu ahomwaakhula Sarayi: Ipottha aa iri mmatatani mwaa. Upanke inhala wucivela. Vano Sarayi ahonhuviha Hakari mpaka ule utthawa.
Ncelo aApwiya ahomphwanya Hakari vakhiviru ni ilusi muthakoni, ni iphiro inrwaa uSuri, ni ahonkoha: Hakari, ipottha ya Sarayi, unkhuma vayi? Unkela vayi? Ule ahaakhula eeraka: Kinontthawa Sarayi, nkunya aka. Ncelo a Mwaneene Nluku ahomwiirela: Uturuwele wa nkunya aa ni weevaherere wa yooyo. 10 Ncelo aheera tho: Kimmowuncerera nloko naa ni khaawo nohala woorya waalikela. 11 Aheereliya tho ni Ncelo a Mwaneene Nluku:
We uhorupala ni unamphwanya mwana
ni urwaa ummaha ncina na Sumayili,
kontha Mwaneene Nluku homwiiwa muhuvani mwaa.
12 Uyo nohala ukhala toko mwaapuru oontakhwani.
Ntata nawe ninhala ukhala no waanana othene
ni matata a atthu othene anhala ukhala umwanana uyo,
ni makhalelo awe anhala ukhala uwaana na asunnawe.
 
13 Nna phi ncina nanvahilyawe Mwaneene Nluku amuulumannyawe: We El Royi, kontha eenre: Kihomoona ule nokoona? 14 Phimaana ilusi iri iriyariru o Kattes ni Perete, wiihaninye Iluusi yo Lahayi-Royi.
15 Hakari ahonnyara mwana a Aparamu ni ule ahommaha ncina na Sumayili. 16 Aparamu aarina myakha thamanini na siita (86) ceyarelo ukati wannyanryawe Hakari Sumayili.