1 Unavinre ukati vakani, Nluku ahonlawiha Aparahamu, amwiirelaka: Aparahamu. Uyo ahaakhula: Phi mi va. 2 Vano Nluku aheera: Unkuse mwanaa, mwanaa mmoca yooyo, Isaki nonfentesaa uyo, ni urwee nttetthe wo Muriyaa. Wakipankele yooyo wonwo isataka yoopahiya wamwaakoni unhalaaka wuthoonyera.

3 Wasilyaya vale, Aparahamu ahonwa ni ahontthenkemaniha puuru awe, ahaatthukana nloko amirawo awe eeli wamoca ni Isaki mwamwanawe, ahopharula ikhuni cosataka, ahopwaha arwaaka nipuro nahimeriyawe ni Nluku. 4 Nihuku noneeraru, Aparahamu ahowusa miittho awe ni ahoona nipuro nno nari uttayi. 5 Ule aheerela amirawo awe: Nhalaceke va ni puuru ula. Mi ni mmirawo ola ninrwaa uswali nwe ninawuphwanyacani.

6 Aparahamu ahokusa ikhuni nnye coorwa upaha isataka ni ahonrya Isaki, ni uyo ahokusa makhala o mooro ni mwaalo. Ni yeettacaka wamoca. 7 Isaki aheerela athumwane: Paapa! Aparahamu ahaakhula: Phi mi va, mwanaka. Isaki ahaakoha: Makhala o mooro ni ikhuni phi nnya, vano iri vayi ikhontwaa yotthuvo yoopahiya. 8 Aparahamu ahaakhula: Mwanaka, Nluku nanivaha ikhontwaa yotthuvo yoopahiya. Ni yahopwahaca yeettacaka wamoca.

9 Waphilyaya nipuro nathoonyeriyawe ni Nluku, Aparahamu ahoteka ikhilompi yoopaha isataka ni ahotataanihaca ikhuni vaavale. Ahontthuka Isaki, phumweesaka waculu ikhuni vale. 10 Vano ahaawula ntata nakusilyawe mwalo ule wiira anhitte mwanawe. 11 Nanso Ncelo a Mwaneene Nluku ahomwiihana eeraka: Aparahamu! Aparahamu! Ule ahaakhula: Phi mi va. 12 Vano Ncelo ule aheera: Uhinhonone mmirawo uyo. Uhimpanke itthu. Vano kihocuwela wiira we unamoova Nluku, kontha khukithuwile mwanaa, mwanaa yooyo rinaa mmoca paahi.

13 Aparahamu ahowusa miitho awe ni ahoona ikhontwaa inaphanre inyaka caya nnyo wataparikhwani. Ahorwaa ukusa ni ahovaherera itthuvo yoopahiya nipuro no mwanawe. 14 Aparahamu ahovaha nenno nipuro nno ncina na Mwaneene Nluku Naavaha.*i.e. Yehova-Yire Phimaana mpaka ilelo waneereliyaya: Mmwaakoni mwa Mwaneene Nluku naavaha.

15 Ikwaha yonayeeli Ncelo a Mwaneene Nluku ahomwiihana Aparahamu 16 eeraka: Mwaneene Nluku heera: Kinalupela, mwanlattu wa yeela itthu ipankilyaa, uhikithuwaka mwanaa, mwanaa mmoca yooyo urinaa, 17 waamini wiira kinawureeriha ni nloko naa kinapanka ninci toko itthoottwa co wirimu ni toko nhava wo mpharyaa. Nloko naa nimmotthema isittatti ceenani aya, 18 ni nhina mwa nenno nloko nno, ilapo cothene cimmoreerihiya, kontha we uhokiiwelela.

19 Vano ahohokoleela Aparahamu waariaya amirawo awe ni othene wamoca yahoturuwela uPereseepa wakhalawe.

20 Unavinre ukati vakani, ahohimerya Aparahamu wiira Milka ahaayara asaana ni Nahori, munnaawe Aparahamu. 21 Ussi ari oontthara, Pussi munnaawe, Kemuweli, athumwane Arani, 22 Kesette, Haso, Piltasi, Yitlafi ni Petuweli, 23 athumwane Repeka. Ala asaana athanu na araru yaayanryawe Milka ni Nahori, munnaawe Aparahamu.

24 Ni mwaarawe oohitteliheraninya, neehaninya Reuma, ahaayara asaana ala: Tevaa, Kahami, Tahasi ni Maaka.