1 Anavinre mahuku vakani, ni Yesu naturuwile uKafarnaum wahorumanyaa wiira ri uwaani. 2 Yahothukumana atthu enci, mpaka uphunyana wankhora, ni Yesu aheetthuciha moolumo. 3 Vano yahomwiihera ntthu oowuntakyaa, akusiye na atthu acese. 4 Ukhala wiira khayoorya unkusa mpaka waryawe, nlattu wo mphwinko, yahokhunula nivatho nipuro naryawe Yesu, ni ciicale, anahunle iparo, yahokurusela nrepa naryawe ntthu oowuntakyaa. 5 Wowoona ukupali waya atthu ale, Yesu ahomwiirela ntthu oowuntakyaa: Mwanaka, itaampi caa ciholeveleliya. 6 Wonwo mweeco, yahoonkoma mayowantikha vakani yaakakaka munrimani mwaya: 7 Nlattuni, Ule uulumacaka co? Nakufuru. Noorya tipani ulevelela itaampi, hiri Nluku paahi? 8 Yesu, nanso acuwelaka moopuwelo aya mpaka ahaakoha: Nlattuni muupuwelaka ciicale munrimani mwinyu? 9 Itthu yootepa urika phivi, umwiirela oowuntakyaa, Itaampi caa ciholeveleliya, atthuna umwiirela, Wunwe, ukuse nrepa naa ni weette? 10 Vano paahi; wiira ncuwele wiira Mwanawe Pinattamu haana ikuru vathiva yolevelela itaampi, 11 kinawuulamula amwaacaka ntthu oowuntakyaa ukuse nrepa naa ni urwee uwaanyaa. 12 Ntthu ule ahoonwa, ahokusa nrepa nawe ni ahokhuma ooniyaka na atthu ale othene, mpaka othene wumiya mwaano, ni yaananttottopela Nluku yiiraka: Khaninoona itthu co nikhalakaru.

13 Imaara ikina tho ahokhumela vate mphante wo ipharyaa; ni mphwinko wa atthu othene wahontthara, Ule eetthucihaka. 14 Nanso aviraka uyo ahomoona Levi, mwanawe Alfeu nonkomile inupa yowaakheleliya nsoko, ni ahomwiirela: We, ukitthare Mi. Ni Levi ahonwa anttharaka Yesu. 15 Nari wamoca, itthoko ya Levi, mayoliviha nsoko enci na atthu ookosakosa yahoonkomaca wameeca wamoca ni Yesu ni uwiitthuca awe, nlattu khayaamala urunwa atthu yaantthara. 16 Mayowantikha yanrumelelihana ni mafarisi, amoonaka ulya na atthu ookosakosa ni mayoliviha nsoko, yaheerela uwiitthuca awe: Nlattuni, nalya na atthu ookosakosa? 17 Yesu eewaka cothene ahaakhula: Kahiwena akumi phimmwavya tothoro, nanso, aretta. Mi akiwenle weehana atthu aattakattifu, nanso atthu ookosakosa.

18 Owiitthuca a Yohani ni mafarisi yaantthuka, yahowa unkoha Yesu: Owiitthuca a Yohani ni mafarisi anatthuka ni uwiitthuca aa ahitthukaka isiyani? 19 Yesu ahaakhula: Asimpwana awe mayothela anawoorya utthuka, mayothela nari na ale? Mahuku othene ankhalaya wamoca ni mayothela khanoorya utthuka. 20 Anaahala uphiya mahuku anhalaya waakhiya mayothela, vano phankelaya utthuka. 21 Khaawo neesera icaapha yonaanano ikuwoni yookhalayi, nlattu icaapha yonaanano inatepereriha mphantte wookhalayi, ni nikhwata ninatepa wunnuwa. 22 Ni khaawo nohela ivinyu yonaanano mmapikani ookhalayi, ahelaka vale, ivinyu inaahala upwesa mapika ookhalayi, ni ivinyu inarihakyaa wamoca ni mapika. Nanso ivinyu yonaanano inheliya mmapikani oonaanano.

23 Nihuku nimoca no ntivela Yesu anavira mmamattani na owiitthuca awe. Yeettaka mphironi, owitthuca awe yahoonta ncasi. 24 Mafarisi yahontthara, yiiraka: Nkoona, nlattuni ale apankaka itthu yowatelihiya upanka nihuku no ntivela? 25 Ahaakhula: Khannasoma itthu yapankilyawe Taviti, wammoonlyawe itala, ule na atthu yarinawe? 26 Wakenlyawe inupa ya Nluku, ukati wa mayasataka muulupale Apiyatari, ni walilyawe mikatthe coottakattifihiya coolamuliya ulya mayasataka paahi, ni ahaavaha atthu yarinawe?*1Sm 21.1-6 27 Ni ahopwahera: Ntivela nihopankeliya ntthu, ni kahiwena ntthu phipankeliye ntivela. 28 Mwanawe Pinattamu phi mwaneene ntivela.