1 Mahuku ale, ukhala wiira wahotthukumana tho mphwinko muulupale na atthu khayarina yoolya, Yesu aheehana owiitthuca awe ni ahaahimerya: 2 Ukiiriha ihaaya mphwinko ula. Nna va ahovira mahuku mararu anari ni mi ni kharina yoolya. 3 Kaalaseraka ciicale woohilyetthu, wiira arwe mmwanyaya anaahala ukhwa mahile ni iphiro, kontha akina akhumile uttayi. 4 Owiitthuca awe yahomwaakhula: Nohala woorya cani ntthu waaliha nkatthe, watakhwani va? 5 Nanso ahaakoha: Nrina mikatthe mikavi? Yahaakhula: Mithanu na miili. 6 Aholamula wiira atthu yunkome vathi. Ni, akusaka mikatthe mithanu na miili, ahoreeriha, ahomyaniha ni ahaavaha owiitthuca awe, wiira yakawele na ale yahaakawela atthu. 7 Yahaana tho asihopa vakani. Ahoreeriha ni aholamula wiira yaakawele. 8 Yaholya mpaka urupala, ni ikalakathela cahanle nyo owiitthuca awe yahottottela itthuttu thanu na piili. 9 Atthu ale yaari elufu cese (4000). Wahoolo ahaalasera. 10 Ni awelaka vano nkalawani ni owiitthuca awe, ahorwaa mittetthe co Talmanuta.

11 Yahowa mafarisi yapacenre unyakulihana ni Yesu ni woontteha yahoonlepela ikanyero yo wirimu. 12 Yesu ahihimeryaka ni nrima wothene, aheera: Nlattuni weesiyani nihimo nna ninalepelela ikanyero? Khweeli kinawuhimeryani wiira nihimo nna khaninhala uvahiya ikanyero hata vakani. 13 Ni aahiyaka, ahokela nkalawani, mpaka ulapuwela ikhopela ikina.

14 Owiitthuca yaholiyala uwya mikatthe, ni nkalawani khayaarina tho waari nkatthe mmoca paahi. 15 Yesu aheerela: Moone, nkhale miitho mmwehaka ratta miropo co mafarisi ni miropo ca Heroti. 16 Na ale yahopacera uvanyihana, yoopuwelaka wiira waaciye uhikhalana nkatthe. 17 Yesu nanso, weewilyawe moolumo ale, ahaahimerya: Nlattu isiyani moopelaka mwaha o itthu yohikhalana nkatthe? Nanlelo khannahelelela ni khanneeweha? Nri ni nrima woturumala. 18 Nhaana miitho ni khannoona? Nhana manyaru nanso kanneewa ni khannopuwela.*Isaya 6.9-10 19 Itthuttu kavi coocara ni coohala caattottenlenyu, wamyanihilyaka mikatthe mithanu kaakawelaka atthu elufu thanu? Yahaakhula: Khumi na piili. 20 Ni wamyanihilyaka mikatthe saapa pwaavahaka atthu elufu cese, mwacarihile itthuttu kavi cokalakathela co mikatthe? Yahaakhula: Saapa. 21 Ni anaweerela: Nanlelo khanneewa?

22 Yesu ni owiitthuca awe yahophiya o Petsayita ni yahomwiihera ntthu oohoona, anlepelaka wiira ankwanye. 23 Ahommarela ntata ntthu oohoona ni ahonrweha nceresere itthoko, ahonhela isenye mmithoni mwawe, ahonthatela matata nuunkoha: Unawoonaka itthu? 24 Ule ahoteesa miitho ni aheerela: Kinawoona atthu, yeettaka ankhala toko miri. 25 Ahonthatela tho matata mmiithoni, ni ule ahopacera woona uparapara, ni ahovona, oonaka rattaratta uttayi ni uparapara citthu cothene. 26 Yesu vano ahonlamulela urwaa uwaani, ni ahomwiirela: Uhikele mena umawaani.

27 Yesu ahoonwa na owiitthuca awe, akelaka umawaani co Sesareya wo Filipe. Mphironi ahaakoha owiitthuca awe, eeraka: Atthu ayo aneera wiira Mi kipani? 28 Yahomwiirela: Yohani Mpatisa, akina Eliya, ni akina tho aneera wiira uri mmoca mwa anapiyu. 29 Ni ahaakoha: Ni nyu nneera Mi kipani? Peturu ahaakhula: We uri Kristu.*Yohani 6.68-69 30 Ahaalamulela vano, wiira ahinhimerye ntthu itthu ila.

31 Wahoolo ahopacera weetthuciha wiira Mwanawe Pinattamu naahala uhuva venci ni ukhottiya ni mahumu, ni oolupale a mayasataka, ni mayowantikha, mpaka wiiviya ni wunwelela anavinre mahuku mararu; 32 ni anawahimerya itthu ila wohakhuwa-khuwa. Peturu ahomwiihana Yesu ni ahopacera unkuphula. 33 Yesu nanso arukunuwaka, ni awehaka owiitthuca ahonkuphula Peturu, eeraka: Uthame wiitho aka, Sotwani, kontha khummwacera citthu ca Nluku, nanso paahi citthu ca atthu.

34 Eehanaka mphwinko wa atthu wamoca ni owiitthuca awe, aheerela: Ntthu, atthunaka ukitthara, eerune mwaneene, akuse nsalapa awe ni akitthare.*Mt 10.38; Lk 14.27 35 Nlattu, ntthu nohala uphavela woopola ukumi*Mt 10.39; Lk 17.33; Yohani 12.25 awe unanrihya, ni unhala unrihya nlattu wo miyano, ni nlattu wo Nhupi Wooreera nowowopola. 36 Enhala ukhuma isiyani, ntthu uphwanya ittuniya yothene ni arihaka nnepa awe? 37 Atthuna ntthu nohala uvaha isiyani wo wakakhaniha nnepa awe? 38 Ntthu mweeco nohala wuliya muru nlattu wo Miyano ni nlattu wo moolumo aka wamiithoni wanloko nna nookosakosa nimwalaanne ni Mi, ciicammo, Mwanawe Pinattamu naahala wuliya muru nlattu wa ale aphiyaka o nnemani wa Athumwane wamoca ni Ancelo attakattifu.