12
Nlikanihero na mayolima imatta yo vinyu.
Mt 21.33-46; Lk 20.9-19
1 Yesu ahopacera woolumacera ni malikanihero: Ahaawo ntthu aanle imatta yo vinyu, ahopophela nkuco, ahothipa nlitti no waameliya ivinyu ni ahoteka ipwaro. Wahoolo ahaahiyera ananteko arwaka ikwaha awe yoottayi. 2 Ukati woohephiya, ahonruma nrumeyi awe wiira aakhele nuusu no cowiima co mmattani. 3 Ale nanso, yahommara, yahomwaatta nuunturusela uttuli wohiitthu. 4 Ni ahonruma nrumeyi nkina. Ni uyo tho yahompwesa muru ni yahontarawa venci. 5 Ahonruma nkina, ni ule yahomwiiva. Ahaaruma akina enci, na ale yahaatta ni akina weeva. 6 Nahalenle nlelo mwanawe oofentiya, umwisoni ahonruma ule, eeraka: Anaahala unlemeliha mwanaka. 7 Nanso, ananteko yaheerelana ayayoru: Ule phinkokhalana imatta ila! Nrwee, nimwiive, ni imatta inakhala yawihu. 8 Yahommara ni yahomwiiva, nuunrihela nceresere imatta. 9 Mwaneene imatta ile nohala upankani? Nahala uturuwa ni weeva ananteko ayo, ni wahoolo, naahala waavaha imatta ananteko akina. 10 Khansomile cowantikhiya cittakattifu?
Nluku nikhottiye ni mayoteka,
nihothatuwa nluku no wanlothoni nowokolela inupa.
11 Itthu ila inkhuma wa Apwiya,
ni iri yoothamaliya wamiithoni wihu.*Macipo 118.22-23
12 Yaanawavya ummara, nanso yanawoova mphwinko, nlattu yaheeweha ratta, wiira nlikanihero nne naaca yaayo. Yahonhiya ni yahorwaca.
Nsoko wa Sesari.
Mt 22.15-22; Lk 20.19-26
13 Wahoolo yahonrumihela mafarisi ni maherotiyano akina wiira ammare mmoolumoni. 14 Amwaattameryaka yahomwiirela: Mwalimu, nihocuwela wiira uri nlopwana eekhweeli, khaawo nonramelaa, nlattu khumweha makhalelo a ntthu, nanso unawiitthuciha iphiro ya Nluku, toko cinkhalaya yeekhweeli. Unihimerye, iri itthu yooloka atthuna yoohiloka unvaha nsoko Sesari? Ninvahe atthuna nihinvahe? 15 Yesu acuwelaka wototha waya, ahaakhula: Nnokittehacerani? Nkiwiihere nikopiri, koone. 16 Yahomwiihera ni ahaakoha: Yawani ila yocaphariya, ni yowantikhiya ila? Yahaakhula: Ya Sesari. 17 Yesu aheerela: Mumvahe Sesari itthu ya Sesari, ni Nluku itthu ya Nluku. Ni yahotikhinaca venci.
Nlahanya wo wunwelela
Mt 22.23-33; Lk 20.27-40
18 Wahoolo yahowa masatuseu, ale aneera khuwo wunwelela wa atthu ookhwa, yahomwaattamerya, ni yahonkoha Yesu: 19 Mwalimu, Musa honantikhela wiira ntthu ankhwelaka munnawe, pwahiyaka amwaarawe woohikhalana asaana, nhimaawe nolamuliya unthela nthiyana oohinnya wiira ahiye ipyo ya munnawe.*Dt 25.5 20 Vano yahaawo asunna saapa, ni oopacera uyo ahonthela ni ahokhwa woohahiya asaana. 21 Oonayeeli ahonthela nthiyana ahinye, ni uyo ahokhwa woohahiya asaana, ni ooneeraru uyo waheerannyaa ciicammo, 22 ni othene saapa yahokhwa woohahiya asaana. Wiimaleloni waya nthiyana uyo ahokhwa. 23 Vanhala wunweleliya, nthiyana nohala ukhala amwaara awani, nlattu asilopwana saapa ale yahonthela nthiyana ule? 24 Yesu ahaakhula: Nyu nnawithepyaca nlattu woohicuwela cowantikhiya cittakattifu hata ikuru ca Nluku. 25 Phimaana wanhalaya wunwelela mwaatthu ookhwa, khuwo utheliya, mena khuwo uthelana, nanso ammokhala toko ancelo o wirimu. 26 Nanso itthu inaciya mowunwelelani mwaatthu ookhwa, khansomile ikitapu ya Musa, itthu yeeranele ni nikukhu napharela woohivya, toko Nluku caamuulumacenryawe eeraka:
Mi kiri Nluku a Aprahamu, Nluku a Isaaki, ni Nluku a Yakopu?*Ukhuma 3.6
27 Khankhala Nluku a atthu ookhwa, nanso Nluku a atthu akumi. Nyu khanreere weetta ni ututhi.
Nlamulo nootepa wunuwa.
Mt 22.34-40; Lk 10.25-28
28 Ahomwaattamerya mayowantikha eewile avanyihanaka, ni oonaka wiira Yesu aakhunle ratta, ahonkoha: Phinni nlamulo noopacera o malamuloni othene? 29 Yesu ahaakhula: Noopacera phi nna:
Wiiwe Israel, Apwiya Nluku ihu pha Mwaneene Nluku veekhaya.
30 Wafente Mwaneene Nluku aa,
ni nrima aa wothene,
ni nnepa aa wothene,
na ankhili aa othene,
ni ikuru caa cothene.*Dt 6.5-6
31 Nonayeeli phi nna:
Umfente nkhwaa toko we o mwaneene.*Lv 19.18
Khaniwo nlamulo noopwaha ala. 32 Mayowantikha yahomwiirela: Ureera cinene, Mwalimu, khaawoothile eenryaa wiira Ule ri veekhawe ni khaawo tho nkina noompwaha Ule; 33 nuumfenta ni nrima wothene, ni ankhili othene, ni nnepa wothene ni ikuru cothene, nuumfenta nkhwaa toko mwaneene, iri itthu yootepa woovikana isataka coopahiya ni coovelelihiya cothene. 34 Yesu, oonaka wiira ntthu ule ahaakhula ni nruku, ahomwiirela: Khuri uttayi ni omwene wa Nluku. Ni khariwo tho unkoha itthu.*Lk 10.25-28
Mesiya ni Taviti.
Mt 22.41-46; Lk 20.41-44
35 Eetthucihaka Mpani mwa Nluku, Yesu ahokoha: Mayowantikha ahimyaka cani wiira Mesiya phiri mwanawe Taviti? 36 Taviti mwaneene, athoonyeriyaka ni Nnepa Nttakattifu, heera:
Apwiya yaheerela Apwiya aka:
Wonkome moono aka nlopwana, mpaka
Mi keese eenani aa vathivaya manyaa aa.*Macipo 110.1
37 Taviti mwaneene namwiihana, Apwiya. Nokhalaka cani mwanawe? Ni mphwinko muulupale wanamwiiwa ni utteeliya nrima.
Yesu nawaattikittha aalimu o malamulo
Mt 23.1-7,14; Lk 20.45-47
38 Wowiitthuciha, Yesu anawiira: Nkhale miitho, mwisunke ni mayowantikha unacivela uthoonyera coowara coorekama nuukohiya isalama mmapuwani; 39 wonkoma mapuro uhoolo nnsinakokani ni mapuro anliya isukuhuulu. 40 Anawalyacera anankwele yoothereryaka ni iswali coottaliva. Ala anowowaakhela ihukhumu yootepa.
Yoovaha ya nankhwele oohuva.
Lk 21.1-4
41 Nonkomile nipuro naheliya coovelela yawehaka atthu yahela nsurukhu nkasani mwe. Mathaciri menci yanahela nsurukhu mwinci. 42 Ahowa nthiyana nankwele oothwenya, ahelaka makopiri meli ooyevaca, manaaya nikupatta nonecese. 43 Eehanaka owiitthuca awe, Yesu ahaahimerya: Khweeli kinawuhimeryani wiira nthiyana ula nankhwele oothwenya hohela woopwaha atthu othene ahenle nkasani yo nhakhu. 44 Nlattu, othene yahenle yohalahala muthacirini mwaya, nanso nthiyana oothwenya ahenle yothene yarinawe, ni khahalanne itthu hata yankani.