Upatakulhelhiya
waapatakulhelhiye aya Nayohana
Malhove o uholhelha
Ikitabu yo upatakulhelhiya waapatalulhelhiye aya Nayohana phi ikitabu yo umalhihera mu Malhehano o Naanano. Ni iyo yaalhepiye ni akarumiya Nayohana vaamalhelha iyaakha yo 95 baada yo uyaria wa Kuristo (nlhako wo 1:1). Yayo phi ayo tho yaalhempe ikitabu yo Malhove Orera a Yesu Kuristo alhepiye ni Nayohana ni iwarakha taaru, iwarakha yo upacha i Nayohana ni iwarakha yo nayelhi i Nayohana ni iwarakha yo neraru i Nayohana. Nayohana tho phi ayo aachuwanelhe ukhalha “karumiya aattuniye ni Yesu” (nlhako wo 13:23). Aalhempe ikitabu yo upatakulhelhiya ilha ikatema vaari aya u ichirumba yo Patmo, ulhetoni waattukiye aya wo nlhatu wo uhimiacha Malhove Orera a Yesu Kuristo (nlhako wo 1:9).
Ittu yaalhakenlhe aya Nayohana vaalhepa aya ikitabu yo Upatakulhelhiya yaari waahelha nrima attu anohalha ushoma ayo wiira ahalhe anrumelhelhaka Yesu Kuristo ni waavaha nrima wo ukhulhuvelha ukhalhawaya ikatema yo uhokolhia wa Yesu ihaatameria (nlhako wo 1:3, 22:7). Aalhempe wiira irwee wa attu anrumelhenlhe Yesu onkhaye ni wo milhoko saba cha attu anrumelhenlhe Yesu, nlhoko mmoka mmoka (Milhako cho 2-3). Nayohana anowiihimiacha anene wiira ari karumiya (nlhako wo 1:3) ni uhimiacha chittu chonkhaye chonne aya vaapatakulhelhiye aya. Ikitabu yo upatakulhelhiya inolhikaanacha ni chittu chiri nhina Malhehano o Khalhayi, hasa ikitabu i Nazakariya (nlhako wo 6:1-8). Tho, mapalhapata saba ni inyipo saba anlhikaana ni mariro aarumme awe Nlhuku Umisri (Uthama nlhako wo 7-9). Ikitabu yo upatakulhelhiya tho inoohimiacha mwaha wo umalha ikatema ni uhimiacha wiira Yesu phi nowa ukottolha ni uhimia wiira attu onkhaye anonkhulhuvelha anoowa yaapatta ukumi wo uhimalha nhina mwawe. Paahi etu ikitabu yo upatakulhelhiya ilha iwaamukekeni ni uhelhani nrima wo ukhulhuvelha wiira Yesu noohokolhia chitema.
Chiri nhina
Nayohana anochokholha wo wiihiamiacha ni chenre aya wo upochera upatakulhelhiya wo unamilhohi (nlhako wo 1:1-20).
Anoohimiacha nttenga aya wo uhikokhova thoko chihimiye aya ukhuma wa Yesu urwaa wo milhoko saba cha attu anrumelhenlhe Yesu (nlhako wo 1:1-3:22).
Anoothepiha wo uhimiacha mwaha wo mihuri saba ni mapalhapata saba (nlhako wo 4:1-8:5).
Baada yo vavawo Nayohana anoohimiacha ikhoto yo mwaana mwanlhopwana ni mwannama mulhupalhe o miuru saba (nlhako wo 12:1-14:20).
Tho anoolhepa mwaha wo inyipo saba cho mariro (nlhako wo 15:1-16:8).
Thothoni tho, Nayohana anootangacha Nlhuku chinaakottolha awe amalhaponi awe wiirimu (nlhako wo 17:1-20:15).
Wo umalhihera, anoohimiacha mwaha wo irimu yo naanano ni ilhapo yo naanano chinohalha uwa ikatema yo umalhelha (nlhako wo 21:1-22:21).
1
1 Wu phi upatakulhelhiya unonhimiechesha Yesu Kuristo, Nlhuku wanvahilhe awe wiira oonihe anamitheko awe malhove anohalha ukhumelhelha phiyaru. Kuristo ahonruma nnepa wo wiirimu awe anhimerie namitheko awe Yohana yayo malhove ayo. 2 Ni ayo Nayohana ahohimiechesha onkhaye yoonilhe aya yaachaka nttenga wa Nlhuku ni ikeekhene yaapatakulhiye ni Yesu Kuristo. 3 Horeeriya ulhe ntu noshoma ilha ikitabu irii ni malhove o nttenga wo unamilhohi ilha, ahoreeriya ni alhe aneewa ni uvarechesha malhove alhepiye mu, ukhalhawaya ikatema yo upangia alha malhove alha ihaatameria.
Isalamu chi Nayohana wo milhoko saba cha attu anrumelhenlhe Kuristo
4 Mii Yohana kinoolhepa iwarakha irwee wo milhoko saba cha attu anrumelhenlhe Kuristo arii ilhapo yo Uasiya. Kinowulhapelhelhani nnema ni mpuha ukhuma wa Nlhuku, aariwo, riwo ni nowa. Ni ukhuma wo iphumu saba chiri mmiholho ihiche awe yo nthimicho, 5 ni ukhuma wa Yesu Kuristo, o uhimiechesha nokhulhuvelhiya, nttara, o upacha uhihimushiya nnookhwani, rii nholhelhi naatawara mamwene o velhaponi. Yoyo noonittuna, ni wo iphome awe honittukulha malhuto aattukiye ihu wo nlhatu wo uwonya wihu, 6 nkaanipanga hiyaano ukhalha umwene wa attu o upochera ishaani, nivare mitheko cha Nlhuku, Athumwanawe. Wa Yesu Kuristo ukhalhe nthimicho ni mpuha mahuku o uhimalha ni uhimalha. Aye.
7 Mmweheke! Nowa ni mahute.
Kila ntu nowa umwoona, ata ni alhe anhomilhe nivaka alhe.
Makosho onkhaye velhaponi anowa umunlhelha.
Eiyo, phi nohalha aya ukhalha. Aye.
8 Athithi Nlhuku O machiri onkhaye, yaariwo, ariwo ni anowa aneera, “Miyaano phi Alfa ni Omega.”
Itora i Nayohana yaamwonne aya Kuristo
9 Mii Yohana, munninyu, kinokavihana vamoka ni inyu mwaati ntwarusho ni umwene awe ni uvilhelha wo nlhatu wo unttwara Yesu Kuristo. Mii kahorweehiya uuttukiyani ichirumba yo Patimo wo nlhatu wo uhimiacha nlhove na Nlhuku ni uhimiechesha ikeekhene yaamwacha Yesu. 10 Paahi, mu nihuku na Athithi, kahokelhiya Iphumu ya Nlhuku, nkakeewa vatulhi waka nlhove nulhupalhe thoko nipalhapata. 11 Ninno nkaneera, “Nlhepeke nkitaabuni mu alhe anoona inyu, nrweeheke wo milhoko saba cha attu anrumelhenlhe Kuristo alha, Uefeso, Usimirna, Upergamoni, Uthiatira, Usarde, Ufiladefiya ni Ulaodikiya.”
12 Paahi, nkakaarukunuwa wiira kimwone uyo olhumacha ni mii uyo, nkakoona ikiango saba cho idhahabu cho uthomeiya ikhandiri, 13 ni variyari ikiango saba cho idhahabu chiyo, kahomwoona mmoka thoko Mwaana a Ntu, nawanre ikanzu yo urekama neettunke nchako wo idhahabu wanrukureria vakhakaachani. 14 Ikharari chawe chaari cho uteelha ttuuu mmuruni thoko nttoche noteelha ama thoko itheluji. Ni miitho awe yaapharelha thoko mooro, 15 inyaa chawe chaari twetwetwe thoko ishaba ikuttiye chinene vamooroni vachiparani, nlhove nawe naari thoko namalhove o maashi menchi anvira mmwoolhokoni. 16 Wiimonono aari navarenlhe ittotwa saba, umalhakuni wawe waakhuma uphanga wo wiithia velhi uno ni uno. Ikhove awe yaatheka thoko nchuwa no machiri no uthana.
17 Paahi, kamwoonekeru, kahowulhuwa makukhu vamietoni vawe thoko ntu o ukhwa. Nansho uyo nkaakesha moono awe wo wiimonono vachulhu, nkeera, “Nhoove. Mii phi O upacha o chittu chonkhaye ni o Umalhelha o kila ittu. 18 Mii phi uyo rii nkumi. Kaari kinakhwilhe, nansho mwooneke, vano ki nkumi mahuku o uhimalha ni uhimalha. Mii phiri ni mittukulho cho unookhwani ni cho unaminepa. 19 Paahi etu, vano nlhepeke malhove alha anoona inyu alha, malhove anoolhumelhelha ikatema yo vano ni malhove anohalha ukhumelhelha kaanyuma. 20 Nlhove ninaacha ittotwa saba choonilhe inyu moono aka wo wiimonono chilhe ni nlhove nivithiye ninaacha ikiango saba cho idhahabu cha ikhandiri chilhe phi ilha, ittotwa saba phi minepa o wiirimu cho milhoko cha attu anrumelhenlhe Kuristo saba ayo ni ikiango saba cho idhahabu cha ikhandiri chilhe phi milhoko saba cha attu anrumelhenlhe Kuristo.”