Wa̠leghemeni I̠wal A̠d̠ire Wa̠ Apo̠l Age̠ Agi̠o̠m
A̠nwunom Ate̠salonia̠̠
Bho̠
Otighom
A̠d̠izo a̠nwunom d̠a̠ aso̠si̠ bho̠ na̠ e̠su̠su̠ghu̠d̠i̠an na̠ egboloma̠ ma̠ omula̠ oru ta̠ Akrai̠st. D̠a̠ ebula̠ eb̠um egbika̠ a̠ponoma̠, awa i̠ru̠ru̠an ma̠a̠ A̠d̠a̠ma̠ ta̠ Wa̠nwuna̠ bho̠ ta̠ aro̠ ma̠ i̠se̠n i̠se̠n, sa̠ awa i̠gba ma̠ o̠pu̠r a̠duom ta̠ Apo̠l i̠pi̠e̠ ma̠a̠, wa̠leghemeni i̠wal eruoma̠ ta̠ Akrai̠st ta̠ aro̠ ma̠ obhel ola̠ o̠ni̠ ologhom d̠o̠. D̠a̠ asu̠su̠ghu̠d̠i̠an onon, a̠d̠izo awa i̠ro̠ ma̠ o̠ku̠a erugh ado̠l i̠te̠i̠, na̠ eb̠ologiom ma̠a̠ awa na̠ eb̠a̠ra̠ ma̠ omula̠ oru ta̠ Akrai̠st.
Onon a̠duom a̠nimeta̠n o̠gi̠o̠m i̠pu̠r a̠nwunom Ate̠saloni̠ka. Apo̠l age̠ ma̠ a̠duom onon ma̠ omutiom amu̠gho̠nyan d̠a̠ asu̠su̠ghu̠d̠i̠an ya̠ igboloma̠ ma̠ wa̠leghemeni i̠wal omula̠ oru ta̠ Akrai̠st bho̠. D̠a̠ a̠duom onon, Apo̠l a̠leriom a̠d̠izo i̠di̠ar ya̠ ta̠ ed̠ia̠ emite kisa̠ Akrai̠st ta̠ a̠mula̠ a̠ru, sa̠ na̠ a̠leriom ma̠a̠ Akrai̠st ta̠ a̠mula̠ a̠ru, ma̠a̠ i̠karabh na̠ ado̠l i̠basi̠ ta̠ eb̠uiy emuzo d̠a̠ obhel irileghom ta̠ odi o̠ni̠ ola̠ ko orue d̠o̠ o̠mu̠gho̠nyan ola̠ ubhelegi ma̠a̠ “O̠karabh O̠ni̠ bho̠” (2:3), wa̠ ta̠ amara adamaghan Akrai̠st bho̠.
O̠ni̠ ogir ta̠ A̠zib̠a̠ bho̠ amar agba a̠mutiom ezin wa̠ a̠bhon ogbo ya̠ na̠ e̠mu̠gho̠n i̠na bho̠ ma̠ o̠ro̠ ti̠to̠i̠ny d̠a̠ ima̠ra̠ ologi d̠awa d̠a̠ obhel ali̠gam a̠ruzu na̠ egbika̠. Awa egir ekponom a̠ruzu d̠awa ma̠ agu̠o̠ Apo̠l na̠ ogbogir d̠o̠yo̠ igir bho̠, na̠ ebhiroma̠ od̠ighi ib̠eb̠i.
Aru̠mu̠ i̠di̠ar ya̠ u̠ge̠ bho̠
Ogba o̠kparame̠ni̠ omula̠ oru ta̠ Akrai̠st (1:1-12)
I̠di̠ar ya̠ ta̠ emite kisa̠ Akrai̠st ta̠ a̠mula̠ a̠ru (2:1-12)
Ipa̠n a̠kikiom na̠ o̠nu̠o̠kpe̠ o̠kparame̠ni̠ ima̠ra̠ ologi (2:13—3:5)
A̠ma̠rugh a̠nwunom ya̠ na̠ ema̠ra̠ ma̠ Akrai̠st na̠ ibheleguma̠ ekunuguma̠ (3:6-18)
1
Ibheleguma̠
1 Ami̠ Apo̠l, na̠ Asai̠las, na̠ A̠timoti, na̠ o̠ge̠ na̠ oruom inyin ogbo ya̠ na̠ e̠gi̠ ma̠ aso̠si̠ d̠a̠ Ate̠salonia̠ bho̠, ya̠ i̠ro̠ ma̠ a̠nwunom ta̠ A̠zib̠a̠ O̠we̠de̠ bho̠ na̠ Wa̠nwuna̠ A̠zizo̠s Akrai̠st ma̠a̠: 2 E̠no̠gho̠man na̠ ekima̠ ta̠ A̠zib̠a̠ O̠we̠de̠ bho̠, na̠ Wa̠nwuna̠ A̠zizo̠s Akrai̠st e̠ro̠ na̠ inyin.
Ali̠se̠bh
3 A̠rumor na̠ aru̠marani̠, akpe̠ i̠yar o̠se̠bh A̠zib̠a̠ eb̠la̠ kigiel ebula̠ agu̠o̠ ologi ima̠ra̠ d̠inyin na̠ a̠bhobh bho̠, sa̠ etula̠n wa̠ od̠i d̠a̠ esa̠d̠io d̠inyin na̠ abu̠gh e̠mi̠ bho̠. 4 Obha̠ bha̠ ezin wa̠ i̠yar na̠ obhin inyin na̠ obo d̠a̠ raso̠si̠ ta̠ A̠zib̠a̠ bho̠. I̠yar na̠ obo d̠a̠ a̠ma̠ne d̠inyin, na̠ ologi ima̠ra̠ d̠inyin, na̠ agu̠o̠ inyin na̠ osibhom a̠ruzu d̠a̠ esa̠d̠io i̠damaghan na̠ egbika̠ ya̠ na̠ e̠te̠i̠ inyin bho̠.
O̠kpo̠me̠ni̠ ologi d̠a̠ obhel ad̠agi̠an
5 I̠nye̠n na̠ eleriom ma̠a̠, A̠zib̠a̠ na̠ a̠sobh ase̠ igielake̠, sa̠ na̠ e̠gba na̠ emutiom ma̠a̠ inyin o̠kpe̠ ma̠ od̠igh d̠a̠ irileghom d̠o̠yo̠, ma̠ agu̠o̠ inyin na̠ one ma̠ ali̠gam a̠ruzu ya̠ na̠ e̠te̠i̠ inyin bho̠. 6 Agu̠o̠ A̠zib̠a̠ aro̠ ma̠ ola̠ igielake̠ bho̠, i̠na ta̠ a̠nigha̠ ma̠ ali̠gam a̠ruzu ma̠ ogbo ya̠ na̠ enigha̠ inyin ali̠gam a̠ruzu bho̠, 7 sa̠ i̠na ta̠ a̠tenemeni inyin d̠a̠ ali̠gam a̠ruzu ya̠ na̠ e̠te̠i̠ inyin bho̠, sa̠ ta̠ ab̠aram na̠ i̠yar a̠tenemeni. I̠na ta̠ a̠gir o̠ku̠a ma̠ igiel Wa̠nwuna̠ A̠zizo̠s ta̠ ad̠u̠a d̠a̠ ote̠nai̠ny a̠mite a̠ru na̠ imoma̠na̠n itileduom ta̠ A̠zib̠a̠, 8 na̠ e̠ba anya ola̠ na̠ a̠mumor belembelem na̠ a̠rubhula̠, ma̠ obhin o̠kpe̠ ogbo ya̠ ologhom d̠o̠ ma̠ A̠zib̠a̠, sa̠ i̠b̠agh e̠mu̠ igboloma̠ ma̠ Ib̠eb̠i O̠nu̠o̠kpe̠ ta̠ Wa̠nwuna̠ d̠i̠yar A̠zizo̠s bho̠. 9 Ta̠ ogbikimeni awa ma̠ egbika̠ kid̠ud̠ul, sa̠ ta̠ o̠bagi̠o̠n awa o̠si̠ghe̠ d̠a̠ a̠misigh ta̠ Wa̠nwuna̠ bho̠ na̠ a̠limon isosorogia̠n d̠o̠yo̠. 10 Igiel i̠na ta̠ a̠mula̠ a̠ru, eb̠la̠ a̠nwunom ya̠ ima̠ra̠ i̠na bho̠ ta̠ e̠bu̠ghu̠me̠ni̠ i̠na, sa̠ ta̠ a̠d̠igh awa ma̠ ilologia̠n. Inyin od̠i ani̠ d̠a̠ o̠lo̠gh d̠awa, ezin bho̠ inyin oma̠ra̠ ma̠ i̠di̠ar ya̠ i̠yar u̠gba unigha̠ inyin bho̠. 11 Ebula̠ o̠ku̠a sa̠ i̠yar na̠ osiseiny na̠ onigha̠ inyin kigiel kigiel, ma̠ agu̠o̠ ola̠ A̠zib̠a̠ ta̠ alo̠gh agu̠o̠ a̠nigha̠ inyin ma̠ o̠ro̠ agu̠o̠ a̠nwunom ya̠ ta̠ erugh ado̠l wa̠ akpe̠ ma̠ agu̠o̠ ogbo ya̠ i̠na na̠ aso̠n bho̠ ma̠ orugh. I̠na a̠bhin a̠limon d̠o̠yo̠ a̠muzoghod̠iom eb̠la̠ ib̠eb̠i i̠walama d̠inyin, na̠ rogir ya̠ ologi ima̠ra̠ d̠inyin na̠ enuom inyin ogir bho̠. 12 I̠yar na̠ osiseiny o̠ku̠a b̠o̠ka̠ otutumeni ma̠ a̠d̠ien ta̠ Wa̠nwuna̠ A̠zizo̠s ma̠ ebula̠ inyin, sa̠ i̠na ta̠ a̠tutumeni inyin nyen, d̠a̠ e̠ne̠ghe̠ ta̠ A̠zib̠a̠ d̠i̠yar na̠ Wa̠nwuna̠ A̠zizo̠s Akrai̠st.