A̠d̠ire Wa̠ Apo̠l Age̠ Agi̠o̠m
A̠nwunom E̠fi̠so̠s
Bho̠
Otighom
Apo̠l age̠ ma̠ a̠d̠ire onon ma̠ igiel bho̠ i̠na aro̠ d̠a̠ ikoli d̠a̠ A̠rom, sa̠ i̠na aru̠ru̠an agu̠o̠ ola̠ a̠d̠ire bho̠ ta̠ a̠misi d̠a̠ a̠d̠izo raso̠si̠. Onon bo̠ ma̠ agu̠o̠ ipa̠n ra̠d̠ire ya̠ Apo̠l age̠ bho̠. A̠d̠ire wa̠ i̠na age̠ agi̠o̠m ogbo E̠fi̠so̠s bho̠ na̠ o̠gba d̠o̠ a̠gboloma̠ ma̠ e̠kal ali̠gam a̠ruzu, bo̠d̠o̠ atu̠ghu̠me̠ni̠ igunugha̠ d̠a̠ aso̠si̠ bho̠. I̠na afi̠ri̠ma ma̠ Atai̠si̠ko̠s ma̠ agu̠o̠ ola̠ ta̠ akparame̠ni̠ sa̠ ta̠ akpo̠me̠ni̠ ma̠ raso̠si̠ ya̠ od̠i d̠a̠ esele obha̠ bho̠. Apo̠l ake̠ ma̠ a̠duom d̠o̠yo̠ sekina̠ na̠ okpon od̠ighom d̠a̠ i̠di̠ar ya̠ igboloma̠ ma̠ ogir ta̠ A̠zib̠a̠ d̠a̠ obhel ola̠ na̠ a̠ten, ola̠ A̠zib̠a̠ a̠gir a̠mutiom i̠to̠to̠gi̠ d̠o̠yo̠ ya̠ igboloma̠ ma̠ e̠mara̠nwunom bho̠. Sa̠ Apo̠l a̠ru d̠a̠ amu̠m onon, wa̠ A̠zib̠a̠ na̠ a̠tenemeni sa̠ na̠ a̠nwe ale̠m ogbo ya̠ ima̠ra̠ ma̠ Akrai̠st bho̠. I̠na a̠kunugiom agba onon na̠ aghi̠m wa̠ d̠a̠ ed̠ia̠ na̠ a̠ru bho̠, d̠a̠ obhel bho̠ Witenemeni bho̠ ta̠ ane̠gi̠me̠ni̠ ma̠ eb̠la̠ i̠karabh bho̠. Apo̠l agba a̠mutiom i̠se̠n ma̠a̠, i̠yar ko o̠we̠le̠ d̠o̠ ma̠ onwuna̠ asu̠su̠ghu̠d̠i̠an, ezin bho̠ e̠gham d̠i̠yar ola̠ owia̠n a̠limon i̠karabh. I̠na agba a̠mutiom i̠di̠ar ilologia̠n ya̠ i̠yar na̠ o̠te̠i̠ d̠a̠ o̠wo̠l oten Akrai̠st, sa̠ agba ma̠a̠ aso̠si̠ bho̠ ma̠ od̠i ma̠ agu̠o̠ ozu o̠nyi̠o̠mo̠ro̠ni̠, na̠ otu a̠siseiny, na̠ ani̠ erogh, na̠ o̠ni̠ e̠gham. Eb̠la̠ i̠nye̠n na̠ eleriom ezin od̠igh onin, sa̠ na̠ eleriom ko̠ni̠ko̠ni̠ ma̠ agba ola̠ i̠na ta̠ a̠d̠igh na̠ eb̠la̠ ragba iyed̠i a̠gir gha̠n. D̠a̠ a̠ghud̠um ane̠gi̠me̠ni̠ d̠i̠yar, i̠yar owia̠n o̠si̠ghe̠ ma̠ eb̠la̠ omula̠ u̠man, o̠gho̠r i̠gho̠r, a̠fugh i̠te̠i̠, egbogbo ologi, i̠gam, na̠ igurumia̠n ologi. Ezin bho̠, i̠nye̠n o̠kpo̠ ya̠ na̠ ekigima̠ ma̠ od̠igh onin d̠a̠ aso̠si̠ bho̠. Apo̠l a̠kunugiom a̠d̠ire bho̠ na̠ a̠d̠ien agu̠o̠ ola̠ obhin orugh a̠ma̠rugh ogbo ya̠ na̠ ema̠ra̠ ma̠ Akrai̠st, ya̠ igboloma̠ ma̠ a̠ma̠rugh eghun otu, na̠ ogir, na̠ a̠d̠ien agu̠o̠ obhin o̠mara o̠kparame̠ni̠ d̠a̠ ologi ima̠ra̠ bho̠.
Aru̠mu̠ i̠di̠ar ya̠ u̠ge̠ bho̠
I̠to̠to̠gi̠ ta̠ A̠zib̠a̠ na̠ itenemeni ogbo ya̠ ima̠ra̠ bho̠ (1:2-21)
E̠wo̠gi̠na Ib̠eb̠i Asu̠gbagba bho̠ (3:1-21)
A̠ma̠rugh ogbo ya̠ ima̠ra̠ ma̠ Akrai̠st d̠a̠ e̠mara̠nwunom (4:1—5:20)
A̠ghisia̠n ogbo ya̠ ima̠ra̠ ma̠ Akrai̠st bho̠ (5:21; 6:9)
E̠gham ogbo ya̠ ima̠ra̠ ma̠ Akrai̠st bho̠ na̠ i̠karabh (6:10-24)
1
Ipeleguma̠
1 Ami̠ Apo̠l, wa̠ ad̠u̠a d̠a̠ i̠to̠ ta̠ A̠zib̠a̠, sa̠ a̠ten o̠ni̠ogir ta̠ A̠zizo̠s Akrai̠st bho̠, na̠ age̠ na̠ a̠ruom a̠nwunom ta̠ A̠zib̠a̠ ya̠ od̠i d̠a̠ E̠fi̠so̠s, na̠ ogbo id̠umom ta̠ Akrai̠st A̠zizo̠s.
2 E̠no̠gho̠man na̠ ekima̠ ta̠ A̠zib̠a̠ O̠we̠de̠ d̠i̠yar na̠ Wa̠nwuna̠ A̠zizo̠s Akrai̠st e̠ro̠ na̠ inyin.
Itutumeni ya̠ od̠i d̠a̠ Akrai̠st
3 Itutumeni e̠ro̠ enigha̠ ma̠ A̠zib̠a̠ O̠we̠de̠ ta̠ Wa̠nwuna̠ i̠yar A̠zizo̠s Akrai̠st, wa̠ na̠ a̠bhin eb̠la̠ itutumeni d̠a̠ e̠mu̠gh d̠a̠ ote̠nai̠ny a̠doni i̠yar d̠a̠ Akrai̠st. 4 Ezin bho̠ i̠na aso̠n i̠yar d̠a̠ Akrai̠st kisa̠ i̠na ale̠m e̠mara̠nwunom bho̠, ma̠ agu̠o̠ ola̠ i̠yar ta̠ o̠ro̠ ma̠ a̠nwunom e̠b̠ab̠ala, orugh a̠ma̠rugh ola̠ abar ola̠ o̠li̠o̠m i̠yar ko o̠ro̠ d̠o̠ d̠a̠ a̠misigh d̠o̠yo̠. 5 D̠a̠ etula̠n d̠o̠yo̠, sa̠ i̠na ato̠ a̠guri ma̠ agu̠o̠ ola̠ ta̠ o̠wo̠l d̠a̠ A̠zizo̠s Akrai̠st obhin i̠yar ma̠ agu̠o̠ anwi̠i̠ny d̠o̠yo̠, d̠a̠ ebula̠ ib̠eb̠i i̠to̠ d̠o̠yo̠, 6 ma̠ agu̠o̠ ola̠ i̠yar ta̠ otutumeni i̠na d̠a̠ ibom e̠ne̠ghe̠ d̠o̠yo̠, wa̠ ibom e̠no̠gho̠man na̠ e̠wo̠l d̠a̠ Wetula̠n bho̠ na̠ e̠te̠i̠ i̠yar bho̠. 7 D̠a̠ ebula̠ Akrai̠st sa̠ i̠yar u̠te̠i̠ itenemeni wa̠ ad̠u̠a d̠a̠ alu̠kpe̠ omugh d̠o̠yo̠ a̠ru bho̠, sa̠ u̠we̠le̠man i̠karabh d̠i̠yar, d̠a̠ ebula̠ ibom e̠no̠gho̠man d̠o̠yo̠, 8 ya̠ i̠na a̠nigha̠ i̠yar a̠muzoghod̠i d̠a̠ a̠d̠ien kerekere eloghom abar na̠ amu̠gho̠nyan, 9 ma̠ i̠yar ologhom e̠wo̠gi̠na i̠to̠ d̠o̠yo̠, ya̠ isora̠n na̠ ib̠eb̠i i̠walama d̠o̠yo̠, wa̠ i̠na ato̠ d̠a̠ Akrai̠st bho̠, 10 ma̠ agu̠o̠ ola̠ ta̠ omuzoghod̠iom i̠walama d̠o̠yo̠ d̠a̠ ekunuguma̠ obhel bho̠, ma̠ otulugi eb̠la̠ i̠di̠ar d̠a̠ Akrai̠st, d̠a̠ ote̠nai̠ny na̠ d̠a̠ a̠de onon.
11 D̠a̠ ebula̠ Akrai̠st nyen, sa̠ u̠so̠n i̠yar ma̠ id̠e ma̠ ad̠i̠a, ma̠ agu̠o̠ na̠ od̠ia̠ o̠to̠ oguri bho̠ d̠a̠ ebula̠ agu̠o̠ eb̠la̠ i̠di̠ar od̠i ma̠ agu̠o̠ a̠sora̠n d̠a̠ i̠to̠ d̠o̠yo̠ bho̠, 12 ma̠ agu̠o̠ ola̠ i̠yar ya̠ u̠ro̠ ma̠ i̠pu̠r ogbo ya̠ na̠ eb̠em ologi d̠a̠ Akrai̠st bho̠ ta̠ o̠ro̠ ma̠ iya̠ itutumeni isosorogia̠n d̠o̠yo̠. 13 D̠a̠ ebula̠ o̠yo̠ sa̠ inyin u̠mu̠gho̠n nyen a̠ga̠i O̠nu̠o̠kpe̠ oten d̠inyin, wa̠ inyin ud̠umom sa̠ u̠tu̠n o̠ku̠a unigha̠ inyin E̠mu̠gh E̠tu̠tu̠ bho̠ ma̠ o̠ro̠ elegh, ma̠ agu̠o̠ ugua̠n bho̠, 14 wa̠ na̠ akparame̠ni̠ ma̠ ogua̠n bho̠ ma̠a̠, i̠yar ta̠ od̠e ma̠ ad̠i̠a d̠i̠yar bho̠, tu̠tu̠n i̠na ta̠ tenemeni ma̠ a̠nwunom d̠o̠yo̠ aman, ma̠ agu̠o̠ ola̠ onigha̠ o̠yo̠ ma̠ itutumeni d̠a̠ isosorogia̠n d̠o̠yo̠.
A̠siseiny ta̠ Apo̠l
15 D̠a̠ ebul abar onon, na̠ o̠gba nyen onigha̠ ami̠ ma̠ ologi ima̠ra̠ wa̠ inyin unwuna̠ ugboloma̠ ma̠ Wa̠nwuna̠ A̠zizo̠s, na̠ etula̠n wa̠ inyin unwuna̠ igboloma̠ ma̠ a̠nwunom ta̠ A̠zib̠a̠ bho̠. 16 O̠ku̠a sa̠ ami̠ ko o̠we̠le̠ d̠o̠ ma̠ o̠tu̠n ebula̠ inyin onigha̠ gha̠n ali̠se̠bh ma̠ igiel ami̠ i̠ru̠ru̠an igboloma̠ inyin d̠a̠ a̠siseiny d̠ami̠, 17 ma̠ agu̠o̠ ola̠ A̠zib̠a̠ ta̠ Wa̠nwuna̠ d̠i̠yar A̠zizo̠s Akrai̠st, O̠we̠de̠ isosorogia̠n bho̠, ta̠ a̠nigha̠ inyin E̠mu̠gh eloghom abar na̠ aghi̠m ya̠ o̠mar ologhom o̠yo̠, 18 na̠ okperon ologi d̠inyin ma̠ agu̠o̠ ola̠ inyin ta̠ o̠mu̠gho̠nyan abar wa̠ i̠na atu̠n a̠bhelegi inyin bho̠, na̠ a̠b̠utu e̠li̠la ya̠ i̠na na̠ a̠gua̠n anwi̠i̠ny d̠o̠yo̠ bho̠, 19 sekina̠ ibom a̠limon d̠o̠yo̠ wa̠ abar ola̠ obhin o̠tu̠o̠m o̠ro̠ d̠o̠ bho̠, ya̠ i̠ro̠ inigha̠ ma̠ ogbo ya̠ id̠umom bho̠, d̠a̠ agu̠o̠ od̠i d̠a̠ e̠mi̠ a̠limon ogir agu̠o̠ d̠o̠yo̠ bho̠, 20 wa̠ i̠na a̠gir d̠a̠ ob̠eton Akrai̠st d̠a̠ omugh bho̠, sa̠ ari̠lo̠me̠ni̠ i̠na ma̠ a̠dila̠de d̠a̠ od̠iom agu̠o̠ d̠o̠yo̠ d̠a̠ ote̠nai̠ny, 21 a̠peleni ma̠ eb̠la̠ ra̠ a̠dila̠de na̠ a̠limon na̠ i̠to̠, sekina̠ kerekere a̠d̠ien ola̠ uloghom, i̠se̠n d̠a̠ amu̠m onon sekina̠ wa̠ na̠ a̠ru bho̠, nyen. 22 A̠zib̠a̠ na̠ a̠bhin kabar kabar a̠guri d̠a̠ ekpukpu ta̠ Akrai̠st, sa̠ ato̠ ma̠a̠ i̠na we̠mu̠ eb̠la̠ i̠d̠i̠ar d̠a̠ ebula̠ aso̠si̠ bho̠, 23 wa̠ aro̠ ma̠ ozu d̠o̠yo̠ bho̠, wa̠ a̠muzo na̠ i̠na bho̠, wa̠ a̠muzo ma̠ eb̠la̠ i̠d̠i̠ar bho̠.