4
UPeeteli nu Yookhani bhakʉtwalwa mwɨ balaaza ɨlya bhasongo
1 We uPeeteli nu Yookhani bhakʉbhalʉmbɨɨlɨla abhantʉ bhaala, nalʉbhɨlo bhʉʉlo bhakhɨnza abhapuutili,*4:1 Abhapuutili bháamɨle bhalongozi bhɨ mbombo zyonti mu Nyumba iMfinjile. Bhaazya abhapuutili mu Wilulanyo ʉwa mazwi amajeni. aBhasadukaayi,†4:1 ABhasadukaayi sháamɨle shɨpʉga sha bhantʉ abha mʉ nsɨ ɨya Isilaeli, bhe bhakhasundililaga kʉlandata ɨndajɨzyo zya Moose zye zyámɨle mu Wusimbe uWufinjile. Khabhɨlɨ bhatakhɨtɨkhaga kʉtɨ kʉlɨɨpo kʉzyʉkha abhafwe. Bhaazya aBhasadukaayi mu Wilulanyo ʉwa mazwi amajeni. peeka nʉ mʉpɨtɨ ʉwa bhalindiilili abhi Nyumba iMfinjile. 2 Abhapɨtɨ bhanaabho bhínzile bhavitiilwe kʉnongwa ye uPeeteli nu Yookhani bhakhamanyɨzyaga abhantʉ na kʉlʉmbɨɨlɨla kʉtɨ kʉzyʉkha uYeesu kʉkʉmanyɨsya kʉtɨ abhafwe bhakhayɨzyʉkha. 3 Zɨnɨɨzyo zɨkhaazya abhapɨtɨ bhanaabho bhabhaleme uPeeteli nu Yookhani, bhakhabhagonekha mwɨ jeela. Kʉnongwa ye kwámɨle shalyabheela, bhakhagʉʉlɨla we kwasha ɨshɨlaabhɨla. 4 Poope shɨnɨɨsho, zɨnɨɨzyo zye uPeeteli nu Yookhani bhábhabhuziizye abhantʉ, abhinji bhaabho bhakhazyɨtɨkha. Uwinji wa bhasakhaala bheene bhe bhámwitishile uYeesu bhakhafikha abhantʉ ielufu zɨsaanʉ (5,000).
5 We kwasha abhapuutili, abhapɨtɨ na bhamanyizyi abhɨ ndajɨzyo‡4:5 Abhapuutili, abhapɨtɨ na bhamanyizyi abhɨ ndajɨzyo bháamɨle bhalongozi bha mwɨ balaaza ɨlya bhasongo abha Bhayahuudi. Bhaazya ɨbalaaza mu Wilulanyo ʉwa mazwi amajeni. bhakhabhʉngaana panaapo pa Yelusaleemu. 6 Mwɨ balaaza lɨnɨɨlyo, mwámɨle nu mupuutili ʉmʉpɨtɨ uAanasi, peeka nʉ Kayaafa, uYookhani uwunji, uAlekizanda, na bhanholo abhanjɨ abha Aanasi. 7 Abhapɨtɨ bhonti bhanaabho bhakhabhaleeta uPeeteli nu Yookhani, bhakhabhɨmɨɨlɨsya pɨlongolela yaabho, bhakhanda kʉbhabhʉzɨɨlɨzya kʉtɨ, “Zɨnɨɨzyo zye mubhombile, mubhombile kʉ makha gooni, awe kʉ waamʉlo wa naanu?”
8 UPeeteli akhalongolwa nu Mupepu uMufinjile, akhabhaamʉla akhatɨ, “Mʉbhapɨtɨ na mʉbhasongo ɨmwe! 9 Ʉmʉsanyʉʉnʉ mʉkʉtʉbhʉzɨɨlɨzya ɨpa kʉnongwa ye tumwavwizye umuntu ʉnʉ we aamɨle nɨ shɨlema, kʉtɨ aponile bhʉlɨɨbhʉlɨ. 10 Pe shɨnɨɨsho, ɨmwe mwenti mʉmanye akhinza, peeka na Bhaisilaeli abhanjɨ bhonti, kʉtɨ umuntu ʉnʉ we ayɨmɨlɨɨye pɨlongolela yiinyu, aapona, abha mwinza kʉ makha gɨ taawa lya Yeesu Kilisiti ʉwa ku Naazaleti. Wʉnʉʉyo we ɨmwe mwámʉkhomeleeye pa shɨkhobhenhanyo, ɨleelo ʉMʉlʉngʉ akhamʉzyʉsya kʉ bhafwe. 11 UYeesu alɨ ngatɨ liwe ɨlya pambalɨ pa nyumba, wʉnʉʉyo we wʉ wʉʉla we yisimbiilwe kwa wʉʉyo kʉtɨ,
‘Iwe lye mwálikhaanile ɨmwe mubhazenji,
lɨnɨɨlyo lye lyabha liwe ɨlya pambalɨ
lye lilemile inyumba yonti.’§4:11 Bhaazya Zabuuli 118:22.
12 Atalɨɨpo uwunji nʉʉmo we tʉngawaaga uwuposhi kʉkwakwe, kwe kʉtɨ paasɨ ɨpa lɨtalɨɨpo ɨtaawa ilinji lye ɨtwe tʉlɨ nalyo lye lɨngakhola kʉtʉtʉʉla mu mbiibhi.”
13 Abhapɨtɨ bhaala bhakhalola kʉtɨ uPeeteli nu Yookhani bhakʉbhaamʉla ku wudandamazu, khabhɨlɨ bháamɨle bhantʉ bhe bhatáshɨlɨɨye mu nsukuulu, pe bhakhaswiga nhaani. Bhakhazyaganya kʉtɨ uPeeteli nu Yookhani bháamɨle peeka nu Yeesu. 14 Abhapɨtɨ bhaala we bhaalola ʉmʉsakhaala ʉla we aponile ayɨmɨlɨɨye panaapo peeka nu Peeteli nu Yookhani, bhakhapootwa amazwi aga kʉlonga. 15 Bhakhabhalajɨzya uPeeteli nu Yookhani kʉtɨ bhafume mwɨ balaaza lyabho liila. Abheene bhakhasyala bhakʉpanzanya, 16 bhakhabhʉzɨlɨzanya bhakhatɨ, “Tʉtɨbhombe anza bhʉlɨɨbhʉlɨ na bhantʉ ɨbha? Yeenya, abhantʉ bhonti bhe bhakwɨkhala panaapa pa Yelusaleemu bhamanyile kʉtɨ bhabhombile ɨshɨlolesyo ɨshɨpɨtɨ, tʉtangakhola kʉshɨkhaana. 17 Ishi tʉbhakhaane kwɨ dala ɨlya kʉbhoogofwa, bhaleshe kʉlonga ɨtaawa lɨnɨɨlyo kʉ bhantʉ, kʉtɨ ziniizi zye bhabhombile zɨtajendeelele kʉsaata nhaani mʉ bhantʉ.”
18 Pe abhapɨtɨ bhaala bhakhabhabhɨlɨshɨla uPeeteli nu Yookhani, bhakhabhakhaana kʉ makha bhakhatɨ, “Mʉtakhasheele kʉlonga intumi zya Yeesu na kʉmanyɨzya kʉ makha gɨ taawa lyakwe. Poope kʉlonga, mʉtakhasheele kʉlɨlonga!” 19 UPeeteli nu Yookhani bhakhatɨ, “Ɨmwe mʉneemwe mufumwe ʉwaamʉlo, ɨnga yɨkʉkhondela pamiiso ga Mʉlʉngʉ kʉtɨ ɨmwe mwe tubhatinikhaje kʉshɨla kumutinikha ʉMʉlʉngʉ wʉʉyo. 20 Kʉnongwa ye zɨnɨɨzyo zyonti zye ɨtwe twázilolile tʉneetwe, na kʉzyɨmvwa, tʉtakhondeeye kʉtɨ tʉleshe kʉzɨlonga.”
21-22 Abhapɨtɨ bhaala bhakhapootwa zye bhatɨbhasɨtaakɨle uPeeteli nu Yookhani. Bhápotiilwe kʉnongwa ye abhantʉ bhonti bhakhamʉpaalaga nhaani ʉMʉlʉngʉ kʉ shɨlolesyo she uPeeteli nu Yookhani bhábhombile kwa muntu ʉla. Umuntu wʉnʉʉyo we bhámuponiizye áamɨle nɨ shɨlema kufuma kʉpaapwa kʉshɨla amanha amashumi gani. Pe bhakhabhoogofwa winza, bhakhabhɨtɨshɨzya kʉtɨ bhasogolaje.
Abhantʉ bhe bhamwitishile uYeesu bhakʉmʉlaabha ʉMʉlʉngʉ abhagomwe
23 UPeeteli nu Yookhani, we bhasatʉlwa, bhakhagalʉkha kwe abhamwabho bháamɨle. Bhakhabhapanjɨla amazwi ganaago gonti ge abhapɨtɨ abha bhapuutili, peeka na bhasongo abha Bhayahuudi bhábhabhuziizye. 24 We abhamwabho bhaala bhɨmvwa ɨzya mazwi ganaago, bhonti bhakhɨtɨnhana peeka kʉmʉlaabha ʉMʉlʉngʉ bhakhatɨ, “Ɨwe Mwene, we Mʉpɨtɨ wa vwonti. We wápelile kʉmwanya, na paasɨ, ʉsʉmbɨ, na vwonti vwe vɨlɨ mʉmwo. 25 We wálonjile kwi lomu lya maama wɨɨtʉ uDaudi, umubhombi waakho, kʉshɨlɨla kwa Mupepu uMufinjile kʉtɨ,
‘Khooni khe abhantʉ abhɨ nsɨ izinji bhakuviitwa,
khabhɨlɨ ɨvɨkholo ɨvwa Bhaisilaeli
vɨkʉsɨɨbha ʉwaamʉlo ʉwa khasa bhʉʉlo?
26 Abhamwene abhɨ nsɨ bhayilinganyiinye,
khabhɨlɨ abhapɨtɨ bhabhungaanile peeka,
kʉtɨ bhamʉkhaane ʉMwene nu Kilisiti waakwe
we amʉsabhʉʉye.’*4:25-26 Bhaazya Zabuuli 2:1-2.
27 Yɨkʉlolekha apazelu kʉtɨ ʉmwene uHeloodi†4:27 Ʉmwene uHeloodi Ɨtaawa ɨlyamwabho bhakhatɨnjɨ uHeloodi Antipa. Akhatabhaalaga ɨnsɨ ɨya Galɨlaaya nɨ ya Peleeya. Ʉmʉpɨtɨ waakwe áamɨle wu Kaisaali, ʉmwene ʉmʉpɨtɨ ʉwa ku Luumi. Bhaazya uHeloodi mu Wilulanyo ʉwa mazwi amajeni. nu Pontiyo Pɨlaato‡4:27 UPontiyo Pɨlaato akhatabhaalaga ɨnsɨ ɨya Yudeeya nɨ ya Samaliya. Ʉmʉpɨtɨ waakwe áamɨle wu Kaisaali, ʉmwene ʉmʉpɨtɨ ʉwa ku Luumi. bhoope bhábhungaanile mʉ nhaaya yɨnɨɨnɨ ɨya mu Yelusaleemu, peeka na Bhaisilaeli na bhantʉ abhɨ nsɨ zyonti, bhamʉkhaane uYeesu umubhombi waakho umufinjile, we wámʉsabhʉʉye kʉtɨ abhe wʉ Mwene. 28 Zɨnɨɨzyo zye bhábhombile bhanaabho zye ɨwe ʉkhasɨbhɨlɨlaga kufuma ɨmaandɨ kʉtɨ zɨbhombeshe, mʉ makha gaakho na kʉ shɨgane shaakho. 29 Ishi ɨwe Mwene, yeenya she bhatwogofwa! Ʉtwavwe, ɨtwe tubhabhombi bhaakho, ɨnga tʉlʉmbɨlɨlaje izwi lyakho ku wudandamazu nhaani. 30 Ɨwe ʉlolesye amakha gaakho aga kʉbhaponɨa abhantʉ, ʉtwavwe kʉtɨ tʉbhombaje amayele aga vɨkholo ivwinji kʉshɨlɨla kwɨ taawa lya Yeesu, umubhombi waakho umufinjile.”
31 Abhantʉ bhanaabho we bhaamala kʉlaabha kwa Mʉlʉngʉ, nalʉbhɨlo paala pe bhábhungaanile pakhayingaana. UMupepu uMufinjile akhabhalongozya bhonti, bhakhanda kʉlʉmbɨɨlɨla intumi zya Mʉlʉngʉ ku wudandamazu.
Ʉwʉpeeka wa bhantʉ bhe bhamwitishile uYeesu
32 Bhonti bhe bhámwitishile uYeesu bhakhabha nʉ mwoyo weeka, nɨ nsɨɨbho zyabho zyámɨle peeka. Atálɨɨpo umuntu we akhalongaga kʉtɨ ivintu vwe alɨ navwo vwakwe mwene, kʉnongwa ye ivintu vwabho vwonti bhakhasanganɨlaga. 33 Abhasundikwa bha Yeesu bhakhafumwaga uwukeeti ku wudandamazu nhaani, kʉtɨ ʉMwene uYeesu azyushile mʉ bhafwe, ʉMʉlʉngʉ akhabhasayaga nhaani bhonti. 34 Atálɨɨpo umuntu mʉ shɨpʉga shaabho we ábhuliliilwe na khantʉ, kʉnongwa ye bhe bháamɨle ni vwizi awe inyumba, bhakhavɨkazyaga. 35 Ɨnhela zye bhakhaposheelaga, bhakhabhapanga abhasundikwa bha Yeesu. Zɨnɨɨzyo ɨnhela bhakhagabhaga, anza she umuntu weeka weeka ábhuliliilwe.
36 Kwámɨle nu Mulaawi ʉmo ɨtaawa lyakwe bhakhatɨnjɨ uYoosefu, áamɨle mʉkhaaya ʉwa mʉ nsɨ ɨya mu Kipulo. Abhasundikwa bha Yeesu bhámupiiye ɨtaawa ɨlya Balɨnaaba, kwe kʉtɨ, “Ʉwa kʉtɨlɨzya ʉmwoyo.” 37 ɄBalɨnaaba woope akhakazya ishiizi shaakwe, ɨnhela zye áposheleeye, akhazɨtwala ku bhasundikwa.
*4:1 4:1 Abhapuutili bháamɨle bhalongozi bhɨ mbombo zyonti mu Nyumba iMfinjile. Bhaazya abhapuutili mu Wilulanyo ʉwa mazwi amajeni.
†4:1 4:1 ABhasadukaayi sháamɨle shɨpʉga sha bhantʉ abha mʉ nsɨ ɨya Isilaeli, bhe bhakhasundililaga kʉlandata ɨndajɨzyo zya Moose zye zyámɨle mu Wusimbe uWufinjile. Khabhɨlɨ bhatakhɨtɨkhaga kʉtɨ kʉlɨɨpo kʉzyʉkha abhafwe. Bhaazya aBhasadukaayi mu Wilulanyo ʉwa mazwi amajeni.
‡4:5 4:5 Abhapuutili, abhapɨtɨ na bhamanyizyi abhɨ ndajɨzyo bháamɨle bhalongozi bha mwɨ balaaza ɨlya bhasongo abha Bhayahuudi. Bhaazya ɨbalaaza mu Wilulanyo ʉwa mazwi amajeni.
§4:11 4:11 Bhaazya Zabuuli 118:22.
*4:26 4:25-26 Bhaazya Zabuuli 2:1-2.
†4:27 4:27 Ʉmwene uHeloodi Ɨtaawa ɨlyamwabho bhakhatɨnjɨ uHeloodi Antipa. Akhatabhaalaga ɨnsɨ ɨya Galɨlaaya nɨ ya Peleeya. Ʉmʉpɨtɨ waakwe áamɨle wu Kaisaali, ʉmwene ʉmʉpɨtɨ ʉwa ku Luumi. Bhaazya uHeloodi mu Wilulanyo ʉwa mazwi amajeni.
‡4:27 4:27 UPontiyo Pɨlaato akhatabhaalaga ɨnsɨ ɨya Yudeeya nɨ ya Samaliya. Ʉmʉpɨtɨ waakwe áamɨle wu Kaisaali, ʉmwene ʉmʉpɨtɨ ʉwa ku Luumi.