11
UYookhani uMwozyi akʉbhasonteelezya abhalandati bhaakwe kwa Yeesu
(Luuka 7:18-35)
1 We uYeesu aamala kʉbhalajɨzya abhalandati bhaakwe ishumi na bhabhɨlɨ, akhasogola paala. Akhabhala kʉmanyɨzya na kʉlʉmbɨɨlɨla mʉ nhaaya zya Bhayahuudi.
2 UYookhani uMwozyi we akungiilwe mwɨ jeela, akhɨmvwa zye uKilisiti akhabhombaga. Pe akhabhasonteelezya abhalandati bhaakwe, 3 kʉmʉbhʉzɨɨlɨzya kʉtɨ, “Bhʉlɨ, ɨwe we Kilisiti we abhakuwi bhátɨlɨ akhayɨnza, awe tʉmʉgʉlɨlaje uwunji?” 4 UYeesu akhabhaamʉla akhatɨ, “Bhalaji mʉmʉbhʉʉzye uYookhani zyonti zye mʉkʉzyɨmvwa na kʉzɨlola: 5 bhe bhatalolaga bhakʉlola, bhe bhatajendaga bhakʉjenda, bhe bhalɨ na maketa bhakʉsatʉlwa, bhe bhatɨmvwaga bhakwɨmvwa, abhafwe bhakʉzyʉkha, na bhapɨɨna bhakʉlʉmbɨɨlɨlwa iNtumi iNyinza.*11:5 Bhaazya Yeesaya 26:19; 29:18-19; 35:5-6; 61:1. 6 Asayiilwe umuntu we atakʉlʉlekha ʉlwɨtɨkho kʉnongwa yaanɨ.”
7 We abhalandati bha Yookhani bhasogola, uYeesu akhanda kʉyɨbhʉʉzya ɨmpʉga ya bhantʉ kʉ zya Yookhani akhatɨ, “Mwabhalaga kwenya khooni ku shilozu kuula? Bhʉlɨ, mwabhalaga kwenya umuntu we atalɨ na makha ngatɨ lɨtete lye impepu yikuyinzanya? 8 Ɨnga te shɨ shɨnɨɨsho, mwábhalile kwenya khooni? Mwábhalile kʉmwenya umuntu we akwatile amenda agɨ togo? Yeenya, abhantʉ bhe bhakʉkwata amenda agɨ togo bhakwɨkhala mu nyumba ɨzya shɨmwene. 9 Pe mwabhalaga kwenya khooni? Bhʉlɨ, mwábhalile kʉmwenya umukuwi? Nalyoli uYookhani mʉpɨtɨ kʉshɨla umukuwi. 10 Wʉnʉʉnʉ we wʉ wʉʉla we yisimbiilwe mu Wusimbe uWufinjile kʉtɨ,
‘Yeenya, ɨnhayɨmʉsonteelezya we akʉtwala intumi
mwɨlongolela lyakho,
akhayɨlɨngaanya ɨdala lyakho ɨlya kwɨnzɨla.’†11:10 Bhaazya Malaaki 3:1.”
11 Nalyoli ɨnkʉbhabhʉʉzya kʉtɨ, mʉ bhantʉ bhonti bhe bhapapiilwe na bhantanda, atafumiiye nʉʉmo we mʉpɨtɨ kʉmʉshɨla uYookhani uMwozyi. Ɨleelo, umuntu we munsi nhaani mʉ wʉmwene ʉwa kʉmwanya, we mʉpɨtɨ kʉmʉshɨla ʉweene. 12 Kwandɨla mu nsiku ɨzya Yookhani uMwozyi kufishila akhabhalɨlo akha shiishi, ʉwʉmwene ʉwa kʉmwanya wʉkʉgadɨɨlwa, khabhɨlɨ abhantʉ abha makha bhakʉlɨnga kʉwʉfwʉla kʉ makha. 13 Kwe kʉtɨ abhakuwi bhonti nɨ ndajɨzyo zya Moose bháfumwizye uwukuwi kufishila mʉ khabhalɨlo akha Yookhani. 14 Ɨnga mʉkwɨtɨkha lɨnɨɨlyo, uYookhani we wu Eliya we abhakuwi bhálonjile kʉtɨ akhayɨnza.‡11:14 UEliya we abhakuwi bhálonjile kʉtɨ akhayɨnza ABhayahuudi bhakhasʉbhɨlaga kʉtɨ atɨyɨnze winza umukuwi uEliya, kʉlɨngaanya kwɨnza kwa Kilisiti. Bhaazya Malaaki 4:5-6. 15 Umuntu wowonti ʉla we akwɨmvwa, asimishizyaje nhaani ziniizi zye akʉzyɨmvwa!
16 “Bhʉlɨ, abhantʉ abha khabhalɨlo ɨkha ɨmbakholanye na khooni? Bhakʉkholana na bhaana bhe bhɨkhaaye pa mʉnaalo bhakʉbhabhɨlɨshɨla abhamwabho bhakʉtɨ,
17 ‘Twaabhakhomeeye ɨmfwɨlɨmbo,
ɨleelo mʉtɨmbaga!
Twaabhɨmbɨɨye ɨnyɨmbo ɨzya wuswimiilizu,
ɨleelo mʉtalɨlaga!’
18 Shɨnɨɨsho she nɨɨmwe mʉlɨ, kʉnongwa ye akhabhalɨlo khe uYookhani uMwozyi áyinzile, atakhalyanga awe kʉmwela,§11:18 Atakhalyanga awe kʉmwela Akhabhalɨlo akhatali akhayiimaga kulya kʉnongwa ɨya kumupuuta ʉMʉlʉngʉ. Akhabhombaga shɨnɨɨsho anza bhakuwi abhanjɨ abhɨ maandɨ she bhakhabhombaga kʉnongwa yɨ mbombo ya Mʉlʉngʉ. ɨmwe mʉkhatɨ, ‘Alemiilwe ni pepu ibhiibhi!’ 19 ɄMwana wa Muntu áyinzile, akhalyanga na kʉmwela, abheene bhakhatɨ, ‘Yeenya! Umulyovi ʉnʉ, khabhɨlɨ mumwezi, mumanyani wa bhasonshezya nsonho na bhabhomba mbiibhi!’ Ɨleelo ɨnjeele yɨkʉmanyɨkha kʉtɨ ya nalyoli kʉ mbombo zyakwe.”
UYeesu akʉsokha ɨnhaaya zye zɨkʉkhaana kʉmwɨtɨkha
(Luuka 10:13-15)
20 Pe uYeesu akhanda kʉzɨkhajɨla ɨnhaaya mwe akhabhombaga amayele aminji nhaani kʉnongwa ye abhantʉ abhɨ nhaaya zɨnɨɨzyo bhatálaatile imbiibhi zyabho. 21 Akhatɨ, “Mʉsheleeye mʉbhantʉ abhɨ nhaaya ɨya mu Kolaziini! Mʉsheleeye mʉbhantʉ abhɨ nhaaya ɨya mu Betisayida!*11:21 Kolaziini ni Betisayida zyámɨle nhaaya zya Bhayahuudi. Abhantʉ abhɨ nhaaya ziniizi bhakhayɨlolaga kʉtɨ bhafinjile kʉshɨla abhantʉ abhɨ nhaaya izinji anzɨ zya Tiilo ni Sidooni. Bhakhayɨlolaga shɨnɨɨsho kʉnongwa ɨya kʉtɨ bháamɨle Bhayahuudi, khabhɨlɨ bhantʉ bha Mʉlʉngʉ. Kʉnongwa ye amayele ge nábhombile kukwinyu, ɨnga ɨnhabhombaga mʉ nhaaya ɨya mu Tiilo nɨ ya mu Sidooni, abhantʉ abha mʉ nhaaya zɨnɨɨzyo nhanɨ bhalaatile khalɨ na kʉkwata amafuuku na kʉyɨpakha amalota kʉlolesya kʉlaata imbiibhi zyabho. 22 Ɨleelo, ɨnkʉbhabhʉʉzya isiku ɨlya kʉlongwa, ɨnhaaya yɨnɨɨyo yɨkhayɨlongwa ulufundo ʉlʉpɨtɨ kʉshɨla luula ʉlwɨ nhaaya ɨya mu Tiilo nɨ ya mu Sidooni! 23 Nɨɨmwe mʉbhantʉ abha mʉ nhaaya ɨya mu Kapelenaumu, bhʉlɨ, mʉkʉsɨɨbha kʉtɨ ʉMʉlʉngʉ akhayɨbhazʉvwa paka kʉmwanya? Ndaali! Akhayibhiisya paka kwɨlongo!†11:23 Kwɨlongo Bhaazya mu Wilulanyo ʉwa mazwi amajeni. Kʉnongwa ye ɨnga amayele ge gábhombeshile kʉkwabho, bhanje gakhabhombwaga mʉ nhaaya ɨya mu Sodoomu, ɨnhaaya yɨnɨɨyo nhanɨ yɨlɨɨpo kufishila akhabhalɨlo akha shiishi. 24 Ɨleelo ɨnkʉbhabhʉʉzya isiku ɨlya kʉlongwa, ɨnhaaya yɨnɨɨyo yɨkhayɨlongwa ulufundo ʉlʉpɨtɨ kʉshɨla luula ʉlwɨ nhaaya ɨya mu Sodoomu!”
Kwa Yeesu kʉlɨ ʉwʉtʉʉzyo
(Luuka 10:21-22)
25 Akhabhalɨlo khanaakho uYeesu akhajendeelela kʉlonga akhatɨ, “Inkukusalifwa we Taata, wʉMwene ʉwa kʉmwanya na paasɨ, kʉnongwa ye ubhafisile abhantʉ abhɨ njeele na bhabhaazye ɨnongwa ziniizi, ɨleelo uzibhiishile apazelu kʉ bhaana abhansi. 26 Nalyoli we Taata, shɨnɨɨsho she wáyiganile.
27 “ɄTaata waanɨ ampiiye ivintu vwonti. Atalɨɨpo umuntu we amumanyile ʉMwana, lyoli ʉTaata waanɨ mwene. Khabhɨlɨ atalɨɨpo umuntu we amumanyile ʉTaata, lyoli ʉMwana mwene, nu muntu wowonti we ʉMwana ayiganile kʉmʉlanga.
28 “Nzaagaji kʉkwanɨ ɨmwe mwenti mwe mʉkʉyɨmba na kʉmwamɨlwa na mazigo, nɨɨne ɨntɨɨbhape ʉwʉtʉʉzyo. 29 Mʉkwataje iniila‡11:29 Iniila kwe kʉtɨ ɨshɨbaabho ishimwamu, she shigoloshile she abhantʉ bhakʉkwatɨzya ɨnhambakʉ mu nsingo we zɨkʉlɨma awe we zɨkʉkwesa amazigo. Mʉkwataje iniila yaanɨ kwe kʉtɨ kumushindikha uYeesu na kʉmʉlandata. yaanɨ, mʉmanyɨlaje kʉkwanɨ kʉnongwa ye ɨne ne mutonsu, khabhɨlɨ ɨne inkuyiisya mʉ mwoyo, nɨɨmwe mʉtɨtʉʉzye mʉ mooyo giinyu. 30 Kʉnongwa ye iniila yaanɨ nkulumusu, khabhɨlɨ umuzigo waanɨ mupupuusu.”
*11:5 11:5 Bhaazya Yeesaya 26:19; 29:18-19; 35:5-6; 61:1.
†11:10 11:10 Bhaazya Malaaki 3:1.
‡11:14 11:14 UEliya we abhakuwi bhálonjile kʉtɨ akhayɨnza ABhayahuudi bhakhasʉbhɨlaga kʉtɨ atɨyɨnze winza umukuwi uEliya, kʉlɨngaanya kwɨnza kwa Kilisiti. Bhaazya Malaaki 4:5-6.
§11:18 11:18 Atakhalyanga awe kʉmwela Akhabhalɨlo akhatali akhayiimaga kulya kʉnongwa ɨya kumupuuta ʉMʉlʉngʉ. Akhabhombaga shɨnɨɨsho anza bhakuwi abhanjɨ abhɨ maandɨ she bhakhabhombaga kʉnongwa yɨ mbombo ya Mʉlʉngʉ.
*11:21 11:21 Kolaziini ni Betisayida zyámɨle nhaaya zya Bhayahuudi. Abhantʉ abhɨ nhaaya ziniizi bhakhayɨlolaga kʉtɨ bhafinjile kʉshɨla abhantʉ abhɨ nhaaya izinji anzɨ zya Tiilo ni Sidooni. Bhakhayɨlolaga shɨnɨɨsho kʉnongwa ɨya kʉtɨ bháamɨle Bhayahuudi, khabhɨlɨ bhantʉ bha Mʉlʉngʉ.
†11:23 11:23 Kwɨlongo Bhaazya mu Wilulanyo ʉwa mazwi amajeni.
‡11:29 11:29 Iniila kwe kʉtɨ ɨshɨbaabho ishimwamu, she shigoloshile she abhantʉ bhakʉkwatɨzya ɨnhambakʉ mu nsingo we zɨkʉlɨma awe we zɨkʉkwesa amazigo. Mʉkwataje iniila yaanɨ kwe kʉtɨ kumushindikha uYeesu na kʉmʉlandata.