8
Jā ndíso tíñú Cristo sīquī iin contrato jeé
1 Túsaá de tūhun cánuú cā jā ja nī ncāhān ndá nī cúu yáhá: Névāha ó iin sūtū cúñáhnú tá cúu nūū ní ncāhān ni, de ndéē yā lado cuáhá mesa nūū ndácu tiñu maá Yāā jā cúñáhnú jondē andiví.
2 De mitan de cúu yā sūtū jondē andiví, jā cúu lugar īī ndija jā ní nsāhá maá Jētohō ō Yāā Dios, nsūú nchivī. Chi nduú cáá tá cáá vehe īī janahán jā ní nsāhá nchivī.
3 De ndācá sūtū cúñáhnú nī jani Yāā Dios dē jā sōcō dē ndatíñú jíín quiti nūū yā. Túsaá de Jesucristo suni nī jini ñúhún jā sōcō yā jā cúu yā sūtū.
4 De tú ní íyo cā yā inī ñayīví, de ni mā quétáhán jā cúu yā sūtū jíín ndá cā sūtū, chi níní sócō cā ndá dē quiti tá cúu nūū cáhān ley Moisés.
5 De tiñu jā sáhá ndá dē, chi nduú quétáhán jíín jā íyó andiví. Chi cúu iin muestra-ni jā stéhēn sīquī andiví. De cúu tá cúu jā ní ncāhān Yāā Dios jíín Moisés quīvī jā ní nquijéhé dē nī nsāhá dē vehe īī janahán: Coto vāha nú jā sāhá nú ndācá ndatíñú tá cáá ndá jā ní stéhēn ni nūū nū jondē xīnī yucu, ncachī Yāā Dios jíín dē.
6 De mitan de sáhá Cristo tiñu ñáhnú ndasí cā nsūú cā jā sáhá ndá sūtū ñúcuán, chi ndíso tíñú yā sīquī contrato jeé jā vāha ndasí cā, chi ndíso tūhun ñáhnú cā jā ní nquee yuhú Yāā Dios jā sāhá yā.
7 Chi contrato ley xíhna ñúhún, tú ní nsáhá jā quee vāha tiñu nícu, de nduú cā cánuú jā coo contrato ūū.
8 Chi nchivī janahán ñúcuán nduú ní nquéndōo ndāā ji, chi nī ncāhān Yāā Dios jíín ji, cáchī tutū:
Quiji quīvī jā nasāhá nī iin contrato jeé
jíín nchivī Israel jíín nchivī Judá, cáchī Jētohō ō Yāā Dios.
9 De mā cōó tá cúu contrato jā ní nsāhá nī jíín ndá tatā ji janahán,
quīvī jā ní ntiin nī ndahá ndá ji,
de nī ntavā ni ji inī nación Egipto.
Chi nduú ní squíncuu vāha ndá ji jíín contrato ley ni.
Jā ñúcuán nduú cā ní ntánuú nī ji, cáchī Yāā Dios.
10 Túsaá de suha coo contrato jā nasāhá nī jíín nchivī Israel,
jondē tá quiji quīvī ñúcuán, cáchī Jētohō ō Yāā Dios:
Sāhá nī jā jīcūhun ley ni nūū jāá ntúnī ji,
de saá-ni inī ánō ji tee nī tūhun ley ni.
De cuu nī Yāā Dios ndá ji,
de maá ji cuu nchivī maá nī.
11 De nduú cā jíni ñúhún stéhēn ji nūū táhán ji nūū ñanī ji,
tácua cunī ji nāsa Yāā cúu Jētohō ji.
Chi ndihi ji cunī nāsa Yāā cúu nī,
jondē nchivī núu cā jíín jondē nchivī cúñáhnú cā.
12 Chi cune cáhnú inī ni nūū ji jā ní nsāhá ji tiñu néhén,
de ni mā núcūhun cā inī ni cuāchi jā ní nsāhá ji.
Ncachī Yāā Dios.
13 De jā ní ncāhān yā jā cuāha yā iin contrato jeé cúu jā ní ncachī yā jāá nduú cā cuetíñú contrato xíhna ñúhún. De iin jā ní ncutúhú jāá nduú cā jétíñú, chi jínī ō jā ja ñatin naā.