Mejəwey-mey Mawiya 2 Piyer 1

Leeter masa

Piyer

ma wuzlala ŋga dey cew

Mey da ray

Leeter masa Piyer ma wuzlala ŋga dey cew

Ara Simaŋw Piyer, ndaw-meslərey ŋga Yesu Kəriste, ma wuzlala saya. A wuzlalatara ŋgada ndəhay ŋga Yesu daa Egəliz hay da bəla tabiya.

A wuzlala leeter e na, maja a səra gweegwe cay a məcey. A wuɗey fa dəɓa aŋga na, ndəhay a sərfadamara meesərkedey aŋga (1.13-14). Daa ŋgene, ndəhay ma təɓa mey ŋga Yesu ŋgeeme ga ta məcam sem, ama kwa Yesu ta vəhwa daa ba araŋ. Da ray ŋgene, ndəhay ga ray ata fa həɓey maja. Asaya, ndəhay maa sərkada ndəhay ta membərzley leŋ ndəhay maaya ba hay ta samawa la a wuzlah ndəhay daa Egəliz. Aa saŋgəram a ray ndəhay ma ka cek ta cəveɗ e.

Daa fasəlawal 1 Piyer a ləvtar ŋga kam gədaŋ ŋga njey daa metəɓey mey ŋga Gazlavay anda Gazlavay ma zəlta. Daa fasəlawal 2 a ləvtar ŋga pam leŋgesl ta ndəhay maa sərkadam mey masa fara fara ba, asaya, ŋga pam leŋgesl ta ndəhay maaya ba hay. Daa fasəlawal 3 a ləvtar ŋga wam vaw fa menjey ata, si a vəldamara ray ata fara fara a Gazlavay maja Yesu fa da vəhwa. Yesu a wuswa vaw fiyaw ba na, maja a wuɗey ndəhay a mbəɗdamara menjey ata, asaya, a wuɗey kwa ndaw pal aa zəɗey ba (3.9, 11).

Daa leeter e keɗe na, mey mekele mekele daha ŋga vəley gədaŋ a ndəhay:

Mey da ray Gazlavay ma vəlndakwar cek hay cəpa ŋga jənndakwar (1.3-4)

Mey da ray ndəhay ma da təram ŋga ndəhay majaratakaya masa ta gədaŋ (1.5-8)

Mey da ray ɗar pal ta mevey pal, ata letek fa Gazlavay (3.8)

Mecey-har

1 Ara yah *Simaŋw *Piyer ma wuzlalakwara leeter keɗe, yah ndaw ma ka sləra ŋga *Yesu *Kəriste, asaya, yah ndaw aŋga meslərey.

Leeter e keɗe ara ŋgada akwar ndəhay ma təɓa mey ŋga Yesu. Daa metəɓey mey a na, akwar ta hətam cek maaya la anda ala. Ya təɓkwa mey ŋga Yesu na, maja Yesu a vəley cəveɗ ŋgada kwa waawa ŋga ləhey, a weley ndaw ta weley ba. Yesu Kəriste na, ara Gazlavay, ndaw ma ləhdandakwar.

2 Anja *Gazlavay ŋga pəskwar mey, ŋga njadakwar daa zazay aŋga ma fəna ma fəna maja akwar ma sərmara Gazlavay ta Bay aləkwa Mahura Yesu maaya maaya cay.

Ndəhay ŋga Gazlavay a da njam na, kwara?

3 Gazlavay ta vəlndakwar cek hay cəpa la ta fa gədaŋ aŋga amba ya njakwa macəmkaya ta aŋga, ya kakwa cek fara fara anda aa ma wuɗey. Ara Gazlavay a ma wuzdandakwara ndaw masa ma zəlndakwar amba ya sərkwa gədaŋ aŋga fara fara, asaya, amba ya hətkwa maaya aŋga. 4 Ara ta fa gədaŋ aŋga leŋ ta fa maaya aŋga ha, aŋga ma vəlndakwar cek hay maaya mahura masa aa ma ləvey a da vəldandakwara dəga zleezle heyey. Cek hay a na, maaya kalah, a fəna cek hay tabiya. A ka anda keɗe na, amba ta fa cek hay a keɗe na, ka ləham fa mewulkey maaya ba ma nəsa ndaw da bəla keɗe. Asaya, a ka anda keɗe amba ka təram ndəhay ta mevel maaya anda aŋga. 5 Maja ŋgene, kam gədaŋ. Daa menjey akwar na, kam cek ta cəveɗ e maja akwar ma pamara Yesu *Kəriste ŋga ndaw akwar fara fara. Da masa akwar fa kamara kəne na, kam gədaŋ saya ŋga sərey Gazlavay ta ŋga sərey cek masa aa ma wuɗey. 6 Da akwar ma sərmara cek hay masa Gazlavay ma wuɗey la na, maaya, ka wam vaw fa ray akwar may. Da akwar ma wam vaw la fa ray akwar na, maaya, ka ɓəsmara banay hay tabiya may. Da akwar ma ɓəsmara banay hay tabiya la na, maaya, ka vəldamara ray akwar fara fara a Gazlavay anda aŋga ma wuɗey may. 7 Da akwar fa vəldamara ray akwar fara fara a Gazlavay na, maaya, ka wuɗam vaw da wuzlah akwar anda məlmaŋ hay may. Da akwar fa wuɗam vaw da wuzlah akwar na, maaya, ka wuɗmata ndəhay mekele hay may. 8 Da akwar fa kamata cek hay a keɗe ma fəna ma fəna na, ŋgene, ka təram ndəhay masa ta gədaŋ ma ka cek maaya la. Anda keɗe, ka sərmara Bay aləkwa Mahura Yesu Kəriste la ma fəna. 9 Ama ndəhay ma kamata cek hay a keɗe ba na, a hətmar dey maaya maaya ba, ata anda wulaf hay. Ndəhay a ŋgene, Bay Gazlavay ta mbəkdatara mebərey ata masa zleezle sem na, a sərfadamara saba daw?

10 Məlma aɗaw hay, Gazlavay ta zəlkwar sem, ta walakwar sem. Maja ŋgene, kam gədaŋ ma fəna saya amba ka njam maaya maaya anda Gazlavay ma zəlkwar, ta aa ma walakwar ŋgene. Da akwar fa kam cek hay anda ŋgene na, ka zlaŋgaɗam daa cəveɗ ŋga Gazlavay daa ba. 11 Anda keɗe, Gazlavay a vəlkwar cəveɗ la ta meesəmey amba ka mbəzam aa mewey ŋga Yesu Kəriste ma da njey ŋga sərmataw. Yesu Kəriste na, Bay aləkwa Mahura, ndaw ma ləhdandakwar.

12 Ara maja ŋgene, kwa ka sərmata cek hay a, asaya, kwa akwar fa təɓmara mey fara fara masa akwar maa sərkadamara cay maaya maaya na, ya fa sərfadakwara cek hay a cəŋga. 13 Anda keɗe, daa masa yah daha ta dey da bəla keɗe na, maaya na, ya sərfadakwara cek hay a saya amba kaa zəɗdamara daa ray ba. 14 Ya fa səra mamba cay ya məcey anda Bay aləkwa Mahura Yesu Kəriste ma wuzdiwa. 15 Anda keɗe, ya kəɗey vaw la ta gədaŋ aɗaw cəpa amba kwa daa masa yah daa saba na, ka gwamara ŋga sərfadamara cek hay a mandaw mandaw.

Mey da ray meweɗey ma sawa a ray Yesu

16 Ahaw, zleezle, ala ta kadamakwara mey da ray masawa ŋga Yesu *Kəriste Bay aləkwa Mahura la, ndaw masa ta gədaŋ. Ya kadamakwara ha na, anda ndəhay ma kam mamba saw kəne ba, ama ala ta dey ala, ya ta hətmar gədaŋ aŋga la, gədaŋ a, aa mahura. 17 Fara fara, Gazlavay Papaŋ ta həslar ray la, ta slərwa meweɗey la a ray a daa masa ɗay ŋga Gazlavay Mawaca-waca ma cənwa, ma ləvey: «Keɗe he, ara Bəzey aɗaw masa yah ma wuɗa kalah, ya faa səmey ga da ray a.» 18 Daa masa ala bama ta ata Yesu a daa ray ŋga aŋgwa ŋga Gazlavay na, ɗay a ma cənwa da gazlavay da vaɗ la, ala ma cəndamara la ta sləmay ala.

19 Ala ma cəndamara ɗay a ŋgene na, ta vəlndar gədaŋ la saya ŋga təɓey mey ŋga ndəhay ma təla mey ŋga Gazlavay ma kadamara zleezle. Maaya na, ka pam leŋgesl fa mey ata ha maja mey a na, aŋga anda petərla ma weɗey daa slam-ləvaŋ haa slam ma wurey, haa batay * ma bawa. Fa dəɓa ha, ka da hətmatar cek hay tabiya maaya maaya. 20 Ya fa ləvkwar, mey ŋga ndəhay ma təla mey daa ɗerewel ŋga Gazlavay zleezle na, kwa ndaw pal ma gwa ŋga wuzda ta gədaŋ aŋga daada na, daa ba. Keɗe ara mey mahura ŋga sərey teeseɗ ɗagay. 21 Mey ŋga ndəhay ma təla mey ŋga Gazlavay daa ɗerewel e na, ara mewulkey ŋga ndaw-magədaŋ ba, ama ara *Mesəfney ŋga Gazlavay ma vəltar gədaŋ ŋga wuzda mey ma sawa ta fa Gazlavay.

1:2 1.2 Jud 2

1:3 1.3 1.16-17; Ef 1.3

1:4 1.4 Rm 5.2; Jak 1.14-15

1:5 1.5-6 Tit 2.11-12

1:6 1.6 Gal 5.22-23

1:7 1.7 Gal 6.10

1:11 1.11 2Tm 4.18; ndaw ma ləhdandakwar: 2.20; 3.18; Tit 3.6

1:12 1.12 Jud 5

1:14 1.14 2Kwr 5.1; 2Tm 4.6; Jaŋ 21.18-19

1:16 1.16-18 Mt 17.1-8

*1:19 1.19 batay: Ara «wurzla-baŋgay» ta mey Məkaŋ. A wuɗey ŋga ləvey Kəriste. Nəka daa CWJ 22.16.Aa guzley da ray mavəhwa ŋga Yesu a bəla, da daa ba, da ray pas masa ndaw ma təɓa Yesu aa mevel aŋga.

1:19 1.19 Ps 119.105; Rm 1.2; 13.12; 1Pi 1.10-11

1:21 1.21 2Tm 3.15-16