Mejəwey-mey Mawiya Cek ma wuzar a Jaŋ 4

Mehəsley-ray ŋgada Bay Gazlavay da vaɗ

1 Fa dəɓa ha, yah, *Jaŋ, ya hətey cek mekele saya. Ya hətey na, mey-slam da vaɗ mawurkaya. Ya cənda ɗay ŋga ndaw maa guzlya ŋgeeme heyey. Ɗay a, a cənwa ŋga gədaŋ anda taalam ma fey, a ləvya: «Təpwa feɗe a vaɗ amba ya wuzdakawa cek masa ma da key ŋgada fa mey.»

2 Menjey nekəɗey na, *Mesəfney ŋga Gazlavay ta’, a sawa a ray aɗaw. Feteɗe da gazlavay da vaɗ, ya da nəkey dey na, a ray slam-menjey ŋga bay. Ndaw manjakaya da ray a. 3 Ndaw aha a mbey kalah anda aŋgwa hay maaya ma waɗam pəlŋgeɗ pəlŋgeɗ daa pas. Slam-menjey a mazlərkaya ta kwalay. Kwalay a, a weɗey kalah may anda aŋgwa maaya ma weɗey pəlŋgeɗ pəlŋgeɗ mezəley «emerat».

4 Slam-menjey hay mekele kwakwar cew a ray a məfaɗ a zlərmar ray ŋga slam-menjey heyey. *Bay-ray hay kwakwar cew a ray a məfaɗ * manjatakaya da ray slam-menjey hay a ŋgene. Ndəhay a, ata ta zana mabara fa vaw. Jikwew hay ŋga bay-gula mapatakaya da ray. Jikwew hay a ŋgene makatakaya ta ɓərey magaza ma weɗey.

5 Var a zəmey wəɗ-weɗ, wəɗ-weɗ daa slam-menjey da wuzlah heyey. Asaya, var aa bəcey ta gədaŋ təzlaw! təzlaw! daa slam-menjey a. Daa slam a ŋgene, awaw hay maasala fa gəɗam ŋgəler ŋgəler. Awaw hay maasala hay a ara mesəfney hay maasala ŋga Gazlavay heyey. 6 Asaya, cek anda dəhwa fa mey ŋga slam-menjey a daha, fa weɗey pəlŋgeɗ pəlŋgeɗ anda baŋgəra, dey a hətey gurgwar a wurza.

Asaya, cek hay mekele daha məfaɗ ta dey, fa zlərmar ray ŋga slam-menjey da wuzlah heyey. Vaw ata cəpa na, dey hay wurcacak-cak. 7 Ray ŋga cek ŋgeeme, a nəkey anda ray ŋga mabar. Ŋga cek ŋga dey cew e na, a nəkey anda ray ŋga bəz-sla. Ŋga cek ŋga dey maakar a, a nəkey anda ray ŋga ndaw. Asaya, ŋga cek ŋga dey məfaɗ a, a nəkey anda ray ŋga bərgaday mahura masa fa jəvey. 8 Cek hay məfaɗ a, ata ta kərpasl maakwaw maakwaw. Vaw ata cəpa na, dey wurcacak-cak gway, kwa dasi kərpasl may. Cek hay a fa zlam walay taa vaɗ, taa pas, a gəram ba, a ləvam:

Kah pal, Bay Gazlavay.

Ahaw, kah pal, Bay Gazlavay.

Fara fara, kah, Bay Gazlavay,

ndaw ta gədaŋ ma fənta cek hay cəpa.

Kah na, kah daha dəga bəla ta ləmey daa ba araŋ,

haa kasl wure keɗe,

kah daha.

Asaya, ka sawa la a bəla.

9 Anda keɗe, cek hay məfaɗ ta dey heyey fa zlamar walay ŋgada Bay Gazlavay manjakaya daa slam-menjey aŋga heyey, ara aŋga ndaw masa ta dey ŋga sərmataw. A zlamar walay kəne na, ŋga həslmar ray, ŋga həlmamara, ta ŋga kamar suse. 10 Daa masa fa kamara kəne na, *bay-ray hay kwakwar cew a ray a məfaɗ heyey fa ragadam fa mey ŋga Gazlavay, ndaw masa ta dey ŋga sərmataw, masa manjakaya daa slam-menjey aŋga heyey. Bay-ray hay a ŋgene fa həlmamara Gazlavay na, a pəkwmata jikwew ata hay heyey, a pamata fa mey ŋga slam-menjey ŋga Bay Gazlavay heyey, a ləvam:

11 Bay ala Gazlavay, gədaŋ tabiya a sawa ta fa kah.

Kah təɗe amba ndəhay a həlmamaka, a həslmaka ray,

asaya kah təɗe ŋga wey da ray cek hay tabiya

maja kah ma katərwa cek hay tabiya.

Cek hay tabiya da bəla daha

ara maja kah ma wuɗey ŋga katərwa.

4:2 4.2-3 5.7; Ps 11.4; 103.19

4:3 4.3 Ez 1.26-28

*4:4 4.4 Bay-ray hay kwakwar cew a ray a məfaɗ: Ndəhay a wulkam a wuɗey ŋgaa guzley da ray səkway ŋga Israyel hay kuraw a ray a cew leŋ da ray ndəhay meslərey ŋga Yesu kuraw a ray a cew. Anda keɗe, bay-ray hay kwakwar cew a ray a məfaɗ keɗe na, mapatakaya anda ndəhay masa Gazlavay ma ləhdata daa mebərey maja mejəwey-mey ŋga Gazlavay magurma ta mawiya.

4:4 4.4 Bay-ray hay: 5.5, 8, 10; 7.11, 13; 11.16; 14.3; 19.4; Iz 24.23; mabara: 6.11

4:5 4.5 8.5; 11.19; 16.18; 17.9; Mab 9.24; 19.16; Ez 1.13-14

4:6 4.6 15.2; Ez 1.22; cek hay məfaɗ: 5.6, 8, 11; 6.1; 7.11; 14.3; 15.7; 19.4; Ez 1.5-12; 10.14

4:8 4.8 1.17; 11.17; Iz 6.2-3; Ez 1.18; 10.12

4:11 4.11 MC 1.1, 31; CWJ 5.9, 12; 11.15, 17; 12.10; 15.3-4; 19.6