1 Ni̱yaꞌa i̱ño̱ ki̱vi̱ ta ta̱Jesús na̱ka̱xin ra u̱ni̱ ta̱xíka xíꞌin ra, ta̱Pedro, ta̱Jacobo xíꞌin ta̱Juan ta̱ kúu ñani ta̱Jacobo yóꞌo, ta kua̱ꞌa̱n na xíꞌin ra ñii yuku̱ síkón. 2 Ta kán xi̱ni na na̱sama no̱o̱ ta̱Jesús. Nda̱tán yéꞌe ño̱ꞌo saá náyeꞌe no̱o̱ ra. Ta ndu̱yaa tiko̱to̱ ra. Nda̱tán yóo ñoꞌo̱ ña yéꞌe saá yóo tiko̱to̱ ra. 3 Ta saá ni̱ti̱vi ta̱Moisés xíꞌin ta̱Elías, ndáto̱ꞌon na xíꞌin ta̱Jesús. 4 Ta ni̱ka̱ꞌa̱n ta̱Pedro xíꞌin ta̱Jesús:

―Tata, va̱ꞌa ní ndóo yó yóꞌo. Tá kóni ún, ta kasa va̱ꞌa ndi̱ u̱ni̱ tia̱ꞌva, ñii ña koo mi̱i ún, ñii ña koo ta̱Moisés, ta inka̱ ña koo ta̱Elías ―káchí ta̱Pedro xíꞌin ra.

5 Tá káꞌa̱n ka̱ ta̱Pedro, ta no̱o ñii vi̱ko̱ ña yéꞌe nda̱ no̱o̱ ñíndichi ra xíꞌin nata̱a yóꞌo, ta ni̱saꞌvi ndiꞌi na ti̱xin vi̱ko̱. Ta ti̱xin vi̱ko̱ yóꞌo ki̱xi to̱ꞌon ña ni̱ka̱ꞌa̱n Ndios, káchí ra saá:

―Ta̱yóꞌo kúu Sa̱ꞌya i̱, ta̱ kíꞌvi ní ini i̱ xíni i̱, ta kúsii̱ ní ini i̱ xíni i̱ ra. Ta koni̱ so̱ꞌo va̱ꞌa ndó to̱ꞌon ña káꞌa̱n ra ―káchí Ndios.

6 Tá xi̱ni̱ so̱ꞌo naxíka xíꞌin ta̱Jesús to̱ꞌon yóꞌo, ta xi̱kundee ndiꞌi na no̱o̱ ñoꞌo̱, ta ni̱yi̱ꞌví ní na. 7 Ta ta̱Jesús ki̱xaa̱ ra no̱o̱ na, ta ni̱to̱nda̱a ndaꞌa̱ ra na, ta ni̱ka̱ꞌa̱n ra saá xíꞌin na:

―Ndakoo ndó. Ta o̱n kuyi̱ꞌví ndó.

8 Tá na u̱ni̱ yóꞌo na̱koto ndaa na, ta nda̱ ñii ni̱vi o̱n ko̱ó ka̱ ní‑xini na, nda̱ ñii la̱á kuiti ta̱Jesús ñíndichi no̱o̱ na.

9 Tá va̱xi noo na yuku̱ yóꞌo, ta ta̱Jesús xa̱ꞌnda chiño ra no̱o̱ na, káchí ra saá xíꞌin na:

―O̱n ndato̱ꞌon ndó xíꞌin nda̱ ñii ni̱vi ña sa̱kán xi̱ni ndó. Tá kixaa̱ ki̱vi̱ kivi̱ i̱ ta nataku̱ i̱, saá kivi ndato̱ꞌon ndó xíꞌin ni̱vi ―káchí ra xíꞌin na.

10 Ta naxíka xíꞌin ra ni̱nda̱ka̱ to̱ꞌon na ta̱Jesús, káchí na saá:

―¿Nda̱chun káꞌa̱n na sánáꞌa nda̱yí Ndios ndí siꞌna xíni̱ ñóꞌó kixi ta̱Elías, ta saá kixaa̱ ta̱a ta̱ tiꞌví Ndios saka̱ku ra ni̱vi ñoyívi yóꞌo? ―káchí na.

11 Ta nda̱kuii̱n ta̱Jesús:

―Ndixa ta̱Elías siꞌna xíni̱ ñóꞌó kixaa̱ ra, ta ndasa va̱ꞌa ndiꞌi ra ña̱ꞌa. 12 Ta yi̱ꞌi̱ káꞌa̱n i̱ xíꞌin ndó, xa ki̱xi ta̱Elías, ta o̱n vása ní‑nakoni ni̱vi ra, ta ke̱ꞌé na xíꞌin ra ndiꞌi ña o̱n váꞌa káchí ini mi̱i na. Ñii ki̱ꞌva sa̱xo̱ꞌvi̱ na ta̱yóꞌo, saá saxo̱ꞌvi̱ na yi̱ꞌi̱, ta̱a ta̱ ki̱xi no̱o̱ Ndios ―káchí ta̱Jesús xíꞌin na.

13 Ta saá ku̱nda̱a̱ ini naxíka xíꞌin ra ndí ta̱Jesús káꞌa̱n ra xa̱ꞌa̱ ta̱Juan, ta̱ sa̱kuchu ni̱vi.

14 Ta ki̱xaa̱ ta̱Jesús xíꞌin naxíka xíꞌin ra no̱o̱ nákutáꞌan kua̱ꞌa̱ ní ni̱vi, ta ñii ta̱a ki̱xaa̱ yatin ra no̱o̱ ta̱Jesús, ta xi̱kuxítí ra no̱o̱ ra. 15 Ta ni̱ka̱ꞌa̱n ra, káchí ra saá xíꞌin ra:

―Tata, kundáꞌví ini ún koni ún ta̱loꞌo sa̱ꞌya i̱. Saá chi ta̱ xíꞌi̱ yi̱ꞌí kúu ra, ta ndeé ní kini xóꞌvi̱ ra. Kua̱ꞌa̱ ní yichi̱ nákava ra no̱o̱ xíxi̱ ñoꞌo̱, ta kua̱ꞌa̱ ní yichi̱ nákava ra ini takuií. 16 Ni̱xa̱ꞌa̱n ra xíꞌin i̱ no̱o̱ naxíka xíꞌin ún, ta o̱n vása ní‑kuchiño na sandaꞌa na ra ―káchí ra.

17 Ta nda̱kuii̱n ta̱Jesús, ni̱ka̱ꞌa̱n ra xíꞌin ni̱vi:

―¡Ni̱vi na toon ní ini kúu ndóꞌó, ta o̱n xi̱in ndó kandixa ndó Ndios! ¿Ndasaá ka̱ ki̱vi̱ xíni̱ ñóꞌó kutaku̱ i̱ xíꞌin ndó? ¿Nda̱ ama kundeé ini i̱ xíꞌin ndó? Ta vitin, va̱ꞌa taxi ndó ná kixi ta̱loꞌo yóꞌo no̱o̱ i̱ ―káchí ra.

18 Ta ki̱xaa̱ ta̱loꞌo ta ta̱Jesús xa̱ꞌnda chiño ra no̱o̱ níma̱ ndiva̱ꞌa ña kee ña. Ta ñaníma̱ ndiva̱ꞌa yóꞌo ke̱e ña, ta xa̱ndi̱ko̱n ndu̱va̱ꞌa ta̱loꞌo.

19 Ta ki̱xaa̱ naxíka xíꞌin ta̱Jesús no̱o̱ ra, ta ni̱nda̱ka̱ to̱ꞌon seꞌé na ra:

―¿Nda̱chun o̱n vása ní‑kuchiño ndi̱ tava ndi̱ níma̱ ndiva̱ꞌa yóꞌo?

20 Ta nda̱kuii̱n ta̱Jesús, káchí ra xíꞌin na:

―O̱n vása ní‑kuchiño ndó chi xíni̱ ñóꞌó kandixa ka̱ ndó Ndios. Ndixa káꞌa̱n i̱ xíꞌin ndó, tá kandixa ndó Ndios vará nda̱ loꞌo kuiti, nda̱tán yóo ndiki̱n mostaza loꞌo ní ña, ta xa̱ꞌa̱ ña loꞌo kuiti kandixa ndó, ñayóꞌo taxi ña kukomí ndó ndee̱ ña ka̱ꞌa̱n ndó xíꞌin yuku̱ káꞌno ñíndichi yóꞌo: “Kutaꞌa ún yóꞌo ta kua̱ꞌa̱n ún inka̱ xiiña kaa̱”, kachí ndó, ta yuku̱ káꞌno ñíndichi yóꞌo kutaꞌa ña. Saá chi tá kándixa loꞌo ndó Ndios, ta kuchiño ndó kasa ndivi ndó ndiꞌi ña̱ꞌa. 21 Ta ñaníma̱ ndiva̱ꞌa táꞌan ña xi̱komí ta̱loꞌo yóꞌo, xíni̱ ñóꞌó koo soꞌon ndó ta ka̱ꞌa̱n ní ndó xíꞌin Ndios, saá kuchiño tava ndó ña ―káchí ta̱Jesús.

22 Ta yóo ta̱Jesús xíꞌin naxíka xíꞌin ra estado Galilea, ta ni̱ka̱ꞌa̱n ra xíꞌin na:

―Ñii ki̱vi̱ ña va̱xi ñii ta̱a nataxi ra yi̱ꞌi̱, ta̱ kúu ta̱a ta̱ ki̱xi no̱o̱ Ndios, ndaꞌa̱ ni̱vi. 23 Ta nayóꞌo kaꞌni na yi̱ꞌi̱, ta to̱nda̱a ki̱vi̱ u̱ni̱ nataku̱ i̱, kasa Ndios ―káchí ra xíꞌin na.

Ta kúchuchú ní ini naxíka xíꞌin ra xi̱ni̱ so̱ꞌo na to̱ꞌon yóꞌo.

24 Tá ni̱xaa̱ ta̱Jesús xíꞌin naxíka xíꞌin ra ñoo Capernaum, ta na káya si̱ꞌún na̱ní dracma xa̱ꞌa̱ veꞌe ño̱ꞌo káꞌno ki̱xaa̱ na no̱o̱ ta̱Pedro, ta ni̱nda̱ka̱ to̱ꞌon ñaꞌá na:

―¿Án o̱n vása cháꞌvi ta̱Maestro si̱ꞌún xa̱ꞌa̱ veꞌe ño̱ꞌo káꞌno?

25 Ta nda̱kuii̱n ta̱Pedro, káchí ra saá:

―Cháꞌvi va ra ña ―káchí ra.

Ta saá ta̱Pedro ni̱ki̱ꞌvi ra veꞌe, ta siꞌna ni̱ka̱ꞌa̱n ta̱Jesús xíꞌin ra, káchí ra saá:

―¿Yukía̱ xáni ini ún, Simón? Narey ñoyívi yóꞌo, ¿yo no̱o̱ ni̱vi ndúkú na si̱ꞌún? ¿Án ndúkú na si̱ꞌún no̱o̱ nañoo mi̱i na, án ndúkú na si̱ꞌún no̱o̱ ni̱vi na inka̱ ñoo?

26 Ta nda̱kuii̱n ta̱Pedro:

―Ndúkú na ña no̱o̱ ni̱vi na inka̱ ñoo.

Ta ni̱ka̱ꞌa̱n ta̱Jesús:

―Ta nañoo mi̱i narey o̱n vása cháꞌvi na. 27 Ta saá ni, xa̱ꞌa̱ ña o̱n sasaa̱ yó na, va̱ꞌa ka̱ kua̱ꞌa̱n ún mi̱ni, ta sakana ún ini takuií yiꞌva̱ ña kómí ka̱a chikíꞌí no̱o̱ ña satiin yuꞌu̱ títia̱ká, ta títia̱ká tíno̱ó tiin ún nakuiná ún yuꞌu̱ rí, ta naníꞌi ún ñii si̱ꞌún, ta ko̱ꞌo̱n ún veꞌe ño̱ꞌo káꞌno, ta chaꞌvi ún xa̱ꞌa̱ yi̱ꞌi̱ xíꞌin xa̱ꞌa̱ mi̱i ún ―káchí ta̱Jesús xíꞌin ta̱Pedro.