5
Cha ni savaha ra cuu sava ta cua iin mbee
1 Ndehi ti chi ndaha cuaha ra ndaa nu tayu can naan ra iin libru. Ndiso chi letra iti tichi chi, ta ndiso tahan chi letra iti chata chi, ta iyo ucha tahan cha chasi nihin chi chi. 2 Ndehi ti iyo iin ra tatun Ndioo, ta nihin xaan iyo ra suhva, ta nihin xaan nducu tuhun ra ti:
―¿Yoo cuu iin rai cahnu ndicha, ta cua cuu cani ra cha chasi libru ya? ¿Yoo cua nuna libru ya? ―cati ra.
3 Tacan cuu, ta yoni cuu nuna libru can, ta ndehe ñi iti tichi chi. Yoni ni iin ñivi iyo nini cahnu nu ñuhun ñuñivi ya cha cuu nuna chi chi. Yoni ni iin ñivi iyo iti siqui andivi cha cuu. 4 Chacu xain, vati yoni iyo, ta cua cuu nuna ñi chi chi, ta cua ndehe ñi tichi chi. 5 Tacan cuu, ta quechaha cahan iin ra chanihin chihin yu, ta cati ra ti:
―Ña cuacun. Iyo iin ra cuu xini cuenda ñivi ra Judá. Ñivi ra David chi ra, ta cha ni sacanaan maan ra. Chacan cuu cha cua cuu ndachi cha chasi libru can, ta cua nuna ra chi chi ―cati ra.
6 Ndehi ti mahñu nu iyo tayu cahnu can mahñu nu iyo ri quiti cuhu can nu iyo ra chanihin can―mahñu tican inda iin ra cha cuu sava ni ta cua iin mbee, vati caa ra cuhva caa ri mbee. Iyo ra cuhva cha ni chahni ñivi chi ra. Ndaa ucha tahan ndiquin xini ra, ta iyo ucha tahan titi nuun ra cha cuu ucha Tati Ndioo cha quee nini cahnu nu ñuhun ñuñivi. 7 Tacan cuu, ta cuahan ra, ta quihin ra tutu naan ra ndaa nu tayu can. 8 Nu ni quihin ra tutu can, ta chahnu chiti ndihi cumi ri quiti cuhu can chi ndihi ra chanihin can. Chahnu chiti ra ta ra iti nuun ra cuu ta iin ri mbee can. Iin iin ra chanihin naan ra iin yaa, ta naan tahan ra ta ra coho xuhun cuaan. Cutu ñuhun coho can, ta cuu chi sava ni ta cua cha ni cahan ndahvi ndihi ñivi Ndioo chi ra. 9 Tacan cuu, ta quechaha chita ra ta ra iin yaa. Yaa chaa chita ra, ta cati ra ti:
Cahnu xaan rai cuu cun.
Chacan cuu cha cua cuu cani cun cha chasi libru can,
ta cua nuna cun chi chi.
Cua cuu,
vati cha ni chahni ñivi chihun.
Chati cun niñi cun,
ta tiso vahun tiñu cuenda ra Ndioo.
Chacan cuu cha cua quichi ñivi quee nini cahnu nu ñuhun ñuñivi.
Tucu tucu ñuun quee ñi ta ñi.
Tucu tucu tuhun cahan ñi ta ñi.
Tucu tucu ñivi cuu ñi ta ñi.
10 Chi ñican cua cuhva cun ndatu,
ta cua cuu ñi sava ni ta cua iin rey.
Cua cuu ñi sava ni ta cua iin sutu,
ta cua cundaca ñahan ñi nu ñuhun ñuñivi ya,
cati ra.
11 Tacan cuu, ta ndehe ndico tuqui nu iyo tayu cahnu can nu iyo ri quiti cuhu can nu iyo ra chanihin can, ta iyo cuiti tahan ra tatun Ndioo. Tuvi xaan tuvi xaan ra ta ra nducuiti, ta chini yu cuhva cati ra, 12 vati nihin xaan cati ra ti:
Cahnu xaan rai cuu ra cuu mbee ya,
vati ni chihi ra cuenda cuati ñivi.
Chacan cuu cha iyo xaan tu ndee ini chi ra.
Iyo xaan cha chini tuni chi ra,
ta iyo xaan ndatu chi ra.
Nditi xaan xini ra,
ta cahnu xaan rai cuu ra,
cati ra tatun Ndioo can.
13 Chini tahin ti cha cahan ndihi ñivi. Cahan ndihi ri quiti cuhu. Cahan ndihi cha ni savaha ra Ndioo. Cahan ñi cha iyo iti siqui andivi, ta cahan tahan ñi cha iyo iti nu ñuhun ñuñivi, ta cati ñi ti:
Cahnu xaan rai cuu ra ndaa nu tayu ya,
ta cahnu xaan rai cuu ra cuu mbee ya.
Chi maan ra iyo tu ndee ini,
ta chi maan ra iyo ndatu.
Na cua cuu chi tacan ni ndihi ni quivi ndihi ni tiempu,
cati ñi.
14 Tacan cuu, ta quechaha cati ndihi cumi ri quiti cuhu ti:
―¡Ta na cua cuu chi tacan ni! ―cati ri.
Tacan cuu, ta chahnu chiti ndihi oco cumi ra chanihin iti nuun ra ta ra, ta sacahnu ra ta ra chi ra.