Tu̱tu̱ yoꞌoꞌ nduuꞌ ña̱ kuaꞌa̱n nda̱ꞌaꞌ ne̱ judío, ne̱ ndikún i̱chiꞌ Jesús
1
Kaꞌán Ndiosí xiinꞌ e̱ꞌ vi̱ti̱n xiinꞌ nda̱ꞌaꞌ siꞌe̱ a̱
1 Nuu̱ꞌ ni̱ ki̱xi̱n ndii, kuaꞌa̱ꞌ va̱ i̱chiꞌ te̱ kuaꞌa̱ꞌ va̱ tu̱ nuu̱ꞌ ni̱ sa̱kaꞌán Ndiosí te̱ ni̱ kaꞌa̱n tiakú tu̱ꞌu̱n a̱ nuu̱ꞌ ne̱ xii̱ꞌ ya̱taꞌ e̱ꞌ. 2 Ndisu̱ kivi̱ꞌ ña̱ xa̱ kuaꞌa̱n ndiꞌiꞌ i̱i̱n yivi̱ꞌ vi̱ti̱n ndii, xiinꞌ nda̱ꞌaꞌ siꞌe̱ a̱ ni̱ kaꞌa̱n a̱ xiinꞌ e̱ꞌ. Te̱ ña̱ ja̱a̱nꞌ ni̱ nda̱sa̱ndu̱u̱ a̱ ña̱ xiinꞌ ña̱ꞌa̱ sa̱kuuꞌ ña̱ yoo. Te̱ xiinꞌ nda̱ꞌaꞌ ña̱ ja̱a̱nꞌ tu̱ ni̱ xa̱ꞌa̱ Ndiosí i̱i̱n yivi̱ꞌ. 3 Ña̱ ja̱a̱nꞌ nduuꞌ ña̱ niaꞌá ña̱ kaꞌnuꞌ kooꞌ chukuuꞌ Ndiosí. Te̱ su̱vi̱ tu̱ a̱ nduuꞌ ña̱ nakuitá xa̱chiꞌ xiinꞌ Ndiosí ja̱a̱nꞌ. Te̱ su̱vi̱ tu̱ a̱ nduuꞌ ña̱ xitoꞌ sa̱kuuꞌ ña̱ yooꞌ xiinꞌ ndi̱e̱e̱ꞌ tu̱ꞌu̱n yu̱ꞌuꞌ a̱. Te̱ kii̱ꞌ ndi̱ꞌi̱ ni̱ sa̱ndoyoꞌ mi̱iꞌ a̱ kua̱chi̱ e̱ꞌ ndii, ni̱ xi̱ku̱nduꞌu̱ꞌ a̱ ndi̱e̱nu̱ nda̱ꞌaꞌ kua̱ꞌa̱ Ndiosí, ña̱ kaꞌnuꞌ va̱. 4 Sa̱kanꞌ na kuiiꞌ ña̱ kaꞌnuꞌ ka̱ nduuꞌ siꞌe̱ Ndiosí ja̱a̱nꞌ te̱ sa̱kanꞌ ángele, sa̱kanꞌ ña̱ kaꞌnuꞌ ka̱ kivi̱ꞌ ni̱ na̱ti̱i̱n a̱ te̱ sa̱kanꞌ ña̱ ja̱a̱nꞌ.
5 Kua̱chi̱ ndii, kö̱o̱ꞌ kivi̱ꞌ ni̱ kaꞌa̱n Ndiosí xiinꞌ nde̱e̱ i̱i̱n ángele ndii:
Siꞌe̱ i̱ nduuꞌ yoꞌó,
kivi̱ꞌ vi̱ti̱n satuví i̱ ña̱ nduuꞌ i̱ yu̱vaꞌ u̱nꞌ.
Te̱ tu̱ku̱ xaanꞌ ni̱ kaꞌa̱n a̱ ndii:
Yuꞌu̱ ku̱ndu̱u̱ yu̱vaꞌ te̱ ja̱a̱nꞌ,
te̱ te̱ ja̱a̱nꞌ ku̱ndu̱u̱ siꞌe̱ i̱.
Sa̱kanꞌ kachi a̱.
6 Te̱ ni̱ kaꞌa̱n ka̱ tu̱ Ndiosí kii̱ꞌ ni̱ ti̱ꞌviꞌ a̱ siꞌe̱ a̱ ña̱ xkuaꞌa̱ꞌ ja̱a̱nꞌ i̱i̱n yivi̱ꞌ ndii:
Naa sa̱kaꞌnuꞌ ña̱ꞌaꞌ sa̱kuuꞌ ángele,
ña̱ xikaꞌ nuuꞌ nuu̱ꞌ Ndiosí.
Ni̱ kachi̱ a̱.
7 Te̱ ndisu̱ xaꞌa̱ꞌ ángele yoso̱ꞌ a̱ nuu̱ꞌ tu̱tu̱ Ndiosí ndii:
Te̱ ángele, ña̱ xikaꞌ nuuꞌ nuu̱ꞌ a̱ ndii,
sananduuꞌ ña̱ꞌaꞌ a̱ nde̱e̱ na tachi̱ꞌ,
uun nde̱e̱ na ñuꞌu̱ ndatin.
8 Ndisu̱ ni̱ kaꞌa̱n Ndiosí xaꞌa̱ꞌ siꞌe̱ a̱ ndii:
Ndiosí, yoꞌó nduuꞌ ña̱ xaꞌndia chuunꞌ nde̱e̱ ndiꞌiꞌ ni̱ kivi̱ꞌ,
te̱ xaꞌndia chuunꞌ nda̱ku tu̱ u̱nꞌ.
9 Te̱ xtani̱ u̱nꞌ ña̱ xachuunꞌ nda̱ku, te̱ ndasiꞌ u̱nꞌ ña̱ ni̱a̱ꞌa.
Xaꞌa̱ꞌ ja̱a̱nꞌ na ni̱ sa̱kuisoꞌ chuunꞌ Ndiosí u̱nꞌ yoꞌó,
te̱ ni̱ ta̱xi̱ a̱ ña̱ sii̱ꞌ ka̱ ku̱ni̱ u̱nꞌ te̱ sa̱kanꞌ sa̱kuuꞌ ndee ka̱ ne̱ taꞌanꞌ u̱nꞌ.
Ni̱ kachi̱ a̱.
10 Te̱ yoso̱ꞌ tu̱ a̱ nuu̱ꞌ tu̱tu̱ Ndiosí ña̱ kaꞌán a̱ xaꞌa̱ꞌ siꞌe̱ a̱ ja̱a̱nꞌ ndii:
Tákuiꞌe, yoꞌó nduuꞌ ña̱ ni̱ xa̱ꞌa̱ ñu̱ꞌuꞌ i̱i̱n yivi̱ꞌ nde̱e̱ ña̱ nu̱uꞌ,
te̱ su̱vi̱ tu̱ u̱nꞌ ni̱ xa̱ꞌa̱ ndi̱viꞌ.
11 Te̱ ña̱ ja̱a̱nꞌ ndii, ndo̱ñuꞌuꞌ a̱, te̱ yoꞌó ndii, yoo naa yoo u̱nꞌ.
Te̱ ku̱ya̱taꞌ sa̱kuuꞌ a̱ nde̱e̱ naa toto̱,
12 te̱ na̱tu̱viꞌ u̱nꞌ ña̱ ja̱a̱nꞌ nde̱e̱ naa i̱i̱n toto̱,
te̱ na̱ma̱ u̱nꞌ nde̱e̱ naa xaaꞌ ne̱ yivi̱ꞌ kii̱ꞌ namaꞌ ni̱a̱ toto̱ ni̱a̱,
sa̱kanꞌ na̱ma̱ u̱nꞌ sa̱kuuꞌ ña̱ ja̱a̱nꞌ.
Ndisu̱ yoꞌó ndii, kö̱o̱ꞌ kivi̱ꞌ nama̱ u̱nꞌ,
te̱ kö̱o̱ꞌ kivi̱ꞌ ndi̱ꞌi̱ tu̱ kivi̱ꞌ ñu̱u̱ u̱nꞌ.
Kachi a̱.
13 Kua̱chi̱ ndii kö̱o̱ꞌ kivi̱ꞌ ni̱ kaꞌa̱n Ndiosí xiinꞌ nde̱e̱ i̱i̱n ángele ndii:
Ku̱nduꞌu̱ꞌ nda̱ꞌaꞌ kua̱ꞌa̱ i̱, te̱ na sa̱ndoó kuiꞌe xa̱chiꞌ i̱ te̱ ndasiꞌ yoꞌó.
Nï̱ kaꞌa̱n a̱ sa̱kanꞌ. 14 Sa̱kanꞌ ña̱ sa̱kuuꞌ ángele ja̱a̱nꞌ ndii, espíritu, ña̱ xikaꞌ nuuꞌ nuu̱ꞌ Ndiosí kui̱ti̱ꞌ nduuꞌ a̱, te̱ tiꞌviꞌ ña̱ꞌaꞌ Ndiosí te̱ chi̱ndi̱e̱eꞌ a̱ yooꞌ, ne̱ na̱ti̱i̱n ña̱ sa̱kakú Ndiosí yooꞌ.