1 Ni̱ yaꞌa̱ uni̱ taꞌan kivi̱ꞌ, te̱ ni̱ yoo̱ i̱i̱n ña̱ tundaꞌáꞌ ñu̱u̱ Caná, ña̱ naá nuu̱ꞌ ñu̱ꞌuꞌ Galilea, te̱ naá tu̱ si̱ꞌiꞌ Jesús vi̱koꞌ ja̱a̱nꞌ. 2 Te̱ ni̱ xaꞌa̱n tu̱ Jesús xiinꞌ te̱ nda̱ꞌaꞌ xaꞌa̱ꞌ a̱ i̱kanꞌ, sa̱kanꞌ ña̱ ni̱ ta̱tu̱ ña̱ꞌaꞌ ne̱ yivi̱ꞌ. 3 Te̱ kii̱ꞌ yoo ka̱ vi̱koꞌ ja̱a̱nꞌ ndii, ni̱ ndi̱ꞌi̱ vino, i̱kanꞌ te̱ ni̱ kaꞌa̱n si̱ꞌiꞌ Jesús xiinꞌ a̱ ndii:

―Kö̱o̱ꞌ ka̱ vino xaaꞌ ni̱a̱ ―ni̱ kachi̱ aꞌ.

4 Te̱ ni̱ kaꞌa̱n Jesús xiinꞌ si̱ꞌiꞌ a̱ ndii:

―Nanaa̱, ¿ndichun na kaꞌán u̱nꞌ xiinꞌ yuꞌu̱ xaꞌa̱ꞌ ña̱ ja̱a̱nꞌ? Kuní ka̱ xaa̱ hora ña̱ niaꞌa̱ i̱ nuu̱ꞌ ne̱ yivi̱ꞌ chu̱u̱n ña̱ yoo nuu̱ꞌ i̱ ―ni̱ kachi̱ a̱.

5 Sa̱kanꞌ te̱ ni̱ kaꞌa̱n si̱ꞌiꞌ a̱ ja̱a̱nꞌ xiinꞌ te̱ xaxa̱ꞌ vino ja̱a̱nꞌ ndii:

―Sa̱a̱ ndo̱ꞌ ndee ka̱ ña̱ kaꞌa̱n ra̱ xiinꞌ ndo̱ꞌ, ta̱a̱ ―ni̱ kachi̱ aꞌ.

6 Ni̱ yoo̱ iñu̱ taꞌan tinaja naꞌnuꞌ, ña̱ ni̱ kua̱ꞌa̱ xiinꞌ yuu̱ꞌ i̱kanꞌ, te̱ kuyatinꞌ uni̱ taꞌan yo̱o̱ naꞌnuꞌ ti̱kui ku̱vi̱ ku̱ꞌu̱n ti̱xi̱n i̱ꞌi̱n a̱. Tinaja ja̱a̱nꞌ ndii, ti̱kui teꞌ sandooꞌ xiinꞌ miiꞌ nduꞌu̱, ne̱ judío, nuu̱ꞌ Ndiosí xiñuꞌú ti̱xi̱n a̱. 7 Te̱ ni̱ kaꞌa̱n Jesús xiinꞌ te̱ xaxa̱ꞌ vino ja̱a̱nꞌ ndii:

―Sa̱kutuꞌ ndo̱ꞌ sa̱kuuꞌ tinaja kaa̱ꞌ ti̱kui ―ni̱ kachi̱ a̱.

Te̱ ni̱ sa̱kutuꞌ katiꞌi̱ꞌ ra̱ a̱. 8 Sa̱kanꞌ te̱ ni̱ kaꞌa̱n a̱ xiinꞌ ra̱ ndii:

―Ta̱va̱ꞌ ndo̱ꞌ sie raꞌ vi̱ti̱n, te̱ kundi̱a̱ka̱ ndo̱ꞌ raꞌ nda̱ꞌaꞌ te̱ ndisoꞌ chuunꞌ xaꞌa̱ꞌ vi̱koꞌ ―ni̱ kachi̱ a̱.

Te̱ ni̱ xan ndi̱a̱ka̱ ra̱ raꞌ nda̱ꞌaꞌ te̱ ja̱a̱nꞌ. 9 Te̱ kii̱ꞌ ni̱ xi̱ꞌi̱ te̱ ja̱a̱nꞌ sie ti̱kui, teꞌ ni̱ na̱ndu̱u̱ vino ndii, xïní ra̱ naaꞌ ti̱kui ni̱ nduu̱ raꞌ. Ndisu̱ xiní te̱ xaxa̱ꞌ, te̱ ni̱ ta̱va̱ꞌ raꞌ ja̱a̱nꞌ, ña̱ ti̱kui ni̱ nduu̱ raꞌ. Te̱ ni̱ ka̱na̱ te̱ ndisoꞌ chuunꞌ ja̱a̱nꞌ te̱ tundaꞌáꞌ. 10 Te̱ ni̱ kaꞌa̱n ra̱ xiinꞌ ra̱ ndii:

―Xiní e̱ꞌ ña̱ sa̱kuuꞌ ne̱ yivi̱ꞌ ndii, xi̱ꞌna̱ ka̱ vino va̱ꞌa̱ xaxa̱ꞌ ni̱a̱, te̱ kii̱ꞌ xa̱ kuni tuxi̱ꞌ raꞌ ne̱ ni̱ ta̱tu̱ ni̱a̱, te̱ xa̱ꞌaꞌ ni̱a̱ xaxa̱ꞌ ni̱a̱ vino ndaꞌvi. Te̱ ndii yoꞌó ndii, ni̱ ta̱xa̱ꞌa̱ u̱nꞌ teꞌ va̱ꞌa̱ ka̱ nde̱e̱ vi̱ti̱n te̱ xaxa̱ꞌ raꞌ ―ni̱ kachi̱ ra̱.

11 Ña̱ ja̱a̱nꞌ nduuꞌ chu̱u̱n kaꞌnuꞌ ña̱ nu̱uꞌ, ña̱ ni̱ xa̱a̱ Jesús. Te̱ ñu̱u̱ Caná, ña̱ kanduꞌu̱ꞌ nuu̱ꞌ ñu̱ꞌuꞌ Galilea ja̱a̱nꞌ, ni̱ xa̱a̱ a̱ ña̱ ja̱a̱nꞌ, te̱ xiinꞌ ña̱ ja̱a̱nꞌ ni̱ niaꞌa̱ a̱ ña̱ ndi̱e̱eꞌ ña̱ kumiꞌ a̱. Te̱ ni̱ i̱ni̱ ka̱ te̱ nda̱ꞌaꞌ xaꞌa̱ꞌ a̱ xini ña̱ꞌaꞌ ra̱.

12 Ni̱ yaꞌa̱ ña̱ ja̱a̱nꞌ, te̱ ni̱ na̱kaa̱ꞌ Jesús ñu̱u̱ Capernaum, ni̱ na̱kaa̱ꞌ si̱ꞌiꞌ a̱, te̱ ni̱ na̱kaa̱ꞌ tu̱ ña̱ni̱ a̱, te̱ ni̱ na̱kaa̱ꞌ tu̱ te̱ nda̱ꞌaꞌ xaꞌa̱ꞌ a̱. Te̱ ni̱ ndoo̱ ni̱a̱ ndiaꞌviꞌ kivi̱ꞌ ñu̱u̱ ja̱a̱nꞌ.

13 Xa̱ kuyatinꞌ vi̱koꞌ pascua, ña̱ xakaꞌnuꞌ ndu̱, ne̱ judío, sa̱kanꞌ na kuiiꞌ ni̱ ka̱a̱ Jesús ñu̱u̱ Jerusalén. 14 Te̱ ni̱ xi̱ni̱ a̱ ndieeꞌ te̱ yivi̱ꞌ xiko̱ꞌ ra̱ toro, xiinꞌ mbe̱e̱, xiinꞌ paloma, nuu̱ꞌ ki̱ꞌe̱ yu̱kunꞌ kaꞌnuꞌ ja̱a̱nꞌ. Te̱ ni̱ xi̱ni̱ tu̱ a̱ ndieeꞌ te̱ namaꞌ xu̱ꞌunꞌ. 15 Te̱ ni̱ chu̱ntaꞌanꞌ a̱ i̱i̱n uvi̱ yo̱ꞌoꞌ, te̱ ni̱ ta̱xiꞌ uꞌvi̱ a̱ sa̱kuuꞌ te̱ ndieeꞌ nuu̱ꞌ ki̱ꞌe̱ ja̱a̱nꞌ, xiinꞌ mbe̱e̱, xiinꞌ toro. Te̱ ni̱ ki̱ku̱ꞌ a̱ xu̱ꞌunꞌ te̱ namaꞌ xu̱ꞌunꞌ ja̱a̱nꞌ, te̱ ni̱ sa̱nduva a̱ mesa ra̱. 16 Te̱ ni̱ kaꞌa̱n a̱ xiinꞌ te̱ xiko̱ꞌ paloma ja̱a̱nꞌ ndii:

―Ta̱va̱ꞌ ndo̱ꞌ sa̱kuuꞌ ña̱ꞌa̱ ndo̱ꞌ kaa̱ꞌ nuu̱ꞌ ki̱ꞌe̱ yu̱kunꞌ yoꞌoꞌ, te̱ ndä̱sa̱ndu̱u̱ ndo̱ꞌ vi̱ꞌe̱ yu̱vaꞌ i̱ nde̱e̱ naa ya̱ꞌvi̱ ―ni̱ kachi̱ a̱.

17 Sa̱kanꞌ te̱ ni̱ na̱ka̱ꞌanꞌ te̱ nda̱ꞌaꞌ xaꞌa̱ꞌ a̱ ña̱ yoso̱ꞌ a̱ nuu̱ꞌ tu̱tu̱ Ndiosí miiꞌ kaꞌán a̱ ndii: “Xa̱ yoo i̱ ku̱vi̱ i̱ xaꞌa̱ꞌ a̱ ña̱ ndoꞌoꞌ i̱ xaꞌa̱ꞌ vi̱ꞌe̱ u̱nꞌ”, kachi a̱.

18 Xaꞌa̱ꞌ a̱ ja̱a̱nꞌ na ni̱ nda̱tuꞌu̱nꞌ i̱i̱n uvi̱ te̱ judío kuuꞌ nu̱uꞌ Jesús ndii:

―¿Ndee chu̱u̱n kaꞌnuꞌ sa̱a̱ u̱nꞌ, te̱ niaꞌa̱ u̱nꞌ ña̱ ndisoꞌ chu̱u̱n u̱nꞌ, te̱ xaaꞌ u̱nꞌ ña̱ ni̱ xa̱a̱ u̱nꞌ kaa̱ꞌ? ―ni̱ kachi̱ ra̱.

19 Te̱ ni̱ na̱kui̱i̱n a̱ nuu̱ꞌ ra̱ ndii:

―Naaꞌ ta̱ni̱ ndo̱ꞌ yu̱kunꞌ kaꞌnuꞌ yoꞌoꞌ ndii, kivi̱ꞌ ña̱ uni̱, te̱ xa̱ ni̱ na̱ka̱ni̱ i̱ tu̱ku̱ a̱ ―ni̱ kachi̱ a̱.

20 Sa̱kanꞌ te̱ ni̱ kaꞌa̱n te̱ judío ja̱a̱nꞌ xiinꞌ a̱ ndii:

―¡Ja̱nꞌ! Uvi̱ xi̱ko̱ iñu̱ taꞌan kuiya̱, te̱ ni̱ xinu̱ yu̱kunꞌ kaꞌnuꞌ yo̱ꞌo̱. Te̱ yoꞌó kaꞌán ña̱ uni̱ taꞌan kivi̱ꞌ kui̱ti̱ꞌ, te̱ nda̱ni̱ꞌi̱ u̱nꞌ tu̱ku̱ a̱ ―ni̱ kachi̱ ra̱.

21 Ndisu̱ yu̱kunꞌ ña̱ ni̱ kaꞌa̱n Jesús ja̱a̱nꞌ xaꞌa̱ꞌ ndii, ñu̱ꞌuꞌ ndeꞌi̱ a̱ nduuꞌ a̱. 22 Sa̱kanꞌ na kuiiꞌ kii̱ꞌ ni̱ xiꞌi̱ a̱, te̱ ni̱ na̱ti̱a̱ku̱ a̱ ndii, ni̱ na̱ka̱ꞌanꞌ te̱ nda̱ꞌaꞌ xaꞌa̱ꞌ a̱ ña̱ ni̱ kaꞌa̱n a̱ ja̱a̱nꞌ. Te̱ ni̱ ka̱ndi̱xaꞌ ra̱ ña̱ yoso̱ꞌ nuu̱ꞌ tu̱tu̱ Ndiosí xaꞌa̱ꞌ a̱ xiinꞌ ña̱ ni̱ kaꞌa̱n mi̱iꞌ Jesús.

23 Kii̱ꞌ yoo Jesús ñu̱u̱ Jerusalén xaꞌa̱ꞌ vi̱koꞌ pascua ja̱a̱nꞌ ndii, kuaꞌa̱ꞌ va̱ ne̱ yivi̱ꞌ ni̱ ka̱ndi̱xaꞌ ña̱ꞌaꞌ xaꞌa̱ꞌ ña̱ ni̱ xi̱ni̱ ni̱a̱ ña̱ kaꞌnuꞌ ña̱ ni̱ xa̱a̱ a̱. 24 Ndisu̱ Jesús ndii, nï̱ i̱ni̱ a̱ xini a̱ ne̱ ja̱a̱nꞌ, sa̱kanꞌ ña̱ xiní a̱ sa̱a̱ iinꞌ nimá sa̱kuuꞌ ne̱ yivi̱ꞌ. 25 Te̱ nï̱ kuni̱ nde̱e̱ i̱i̱n ne̱ yivi̱ꞌ kaꞌa̱n xiinꞌ a̱ xaꞌa̱ꞌ i̱nga̱ ne̱ yivi̱ꞌ, sa̱kanꞌ ña̱ xa̱ xiní mi̱iꞌ a̱ sa̱a̱ iinꞌ nimá sa̱kuuꞌ e̱ꞌ.