1 Sa̱kanꞌ te̱ ni̱ xi̱ni̱ i̱ i̱nga̱ ángele ndi̱e̱eꞌ va̱ ña̱ kua̱xi̱ nu̱u̱ a̱ nde̱e̱ ndi̱viꞌ. Te̱ ángele ja̱a̱nꞌ ndii, iinꞌ suku̱ꞌ a̱ i̱i̱n viko̱ꞌ. Te̱ nduꞌu̱ꞌ tu̱ koo̱ꞌ yankiꞌ xíniꞌ a̱. Te̱ yiꞌé nuu̱ꞌ a̱ nde̱e̱ naa ñu̱ꞌu̱. Te̱ xaꞌa̱ꞌ a̱ ndii, nde̱e̱ naa iinꞌ ñuꞌu̱ ndichi iinꞌ a̱. 2 Te̱ tiinꞌ a̱ i̱i̱n tu̱tu̱ lulu tunꞌ yoo̱ꞌ ña̱ nuniaꞌ. Te̱ ni̱ xa̱ni̱ a̱ xaꞌa̱ꞌ kua̱ꞌa̱ a̱ nuu̱ꞌ mi̱ni̱ kaꞌnuꞌ. Te̱ xaꞌa̱ꞌ i̱ti̱n a̱ ni̱ xa̱ni̱ a̱ nuu̱ꞌ ñu̱ꞌuꞌ. 3 Te̱ ni̱ ndeꞌi̱ tiꞌeꞌ a̱ nde̱e̱ naa ndeꞌí i̱i̱n león. Te̱ kii̱ꞌ ndi̱ꞌi̱ ni̱ ndeꞌi̱ a̱ ndii, ni̱ na̱kui̱i̱n uxa̱ sa̱aꞌ ña̱ ndeꞌí savi̱ꞌ. 4 Te̱ kii̱ꞌ ni̱ kaꞌa̱n ña̱ ndeꞌí savi̱ꞌ ja̱a̱nꞌ, te̱ xa̱ xitoꞌ ke̱ꞌi̱ i̱ ña̱ ni̱ kaꞌa̱n a̱ ndii, ni̱ xi̱ni̱ so̱ꞌo̱ i̱ i̱i̱n tachi̱ꞌ yu̱ꞌuꞌ ña̱ ketaꞌ ndi̱viꞌ, ña̱ kaꞌán ndii:

―Ta̱xa̱ꞌa̱ si̱ꞌe u̱nꞌ ña̱ ni̱ xi̱ni̱ so̱ꞌo̱ u̱nꞌ ja̱a̱nꞌ. Kë̱ꞌi̱ u̱nꞌ ña̱ ni̱ kaꞌa̱n uxa̱ sa̱aꞌ ña̱ ndeꞌí savi̱ꞌ kaa̱ꞌ ―ni̱ kachi̱ tachi̱ꞌ yu̱ꞌuꞌ ja̱a̱nꞌ xiinꞌ i̱.

5 Sa̱kanꞌ te̱ ángele, ña̱ ni̱ xi̱ni̱ i̱ iinꞌ nuu̱ꞌ mi̱ni̱ kaꞌnuꞌ xiinꞌ nuu̱ꞌ ñu̱ꞌuꞌ ja̱a̱nꞌ ndii, ni̱ nda̱ni̱ꞌi̱ a̱ nda̱ꞌaꞌ a̱ ndi̱viꞌ. 6 Te̱ ni̱ kaꞌa̱n a̱ ndii:

―Ndiosí, ña̱ yoo nde̱e̱ ndiꞌiꞌ ni̱ kivi̱ꞌ, ña̱ ni̱ xa̱ꞌa̱ ndi̱viꞌ xiinꞌ sa̱kuuꞌ ña̱ yooꞌ ti̱xi̱n a̱, xiinꞌ i̱i̱n yivi̱ꞌ xiinꞌ sa̱kuuꞌ ña̱ yooꞌ nuu̱ꞌ a̱, xiinꞌ mi̱ni̱ kaꞌnuꞌ xiinꞌ sa̱kuuꞌ ña̱ ñuꞌuꞌ ti̱xi̱n a̱, nduuꞌ ña̱ xiní ña̱ nä̱ꞌaꞌ ka̱ te̱ ndi̱ꞌi̱ i̱i̱n yivi̱ꞌ. 7 Süu̱ꞌ ja̱a̱nꞌ ndii kii̱ꞌ xaa̱ kivi̱ꞌ ña̱ ti̱vi̱ ángele ña̱ uxa̱ nda̱chuunꞌ a̱ ndii, sa̱xinú a̱ ña̱ ni̱ chi̱tuní si̱ꞌe a̱, ña̱ ni̱ kaꞌa̱n a̱ xiinꞌ ne̱ xikaꞌ nuuꞌ nu̱uꞌ a̱, ne̱ ni̱ kaꞌa̱n tiakú tu̱ꞌu̱n a̱ ―ni̱ kachi̱ ángele ja̱a̱nꞌ.

8 Sa̱kanꞌ te̱ ni̱ kaꞌa̱n ni̱ tu̱ku̱u̱ tachi̱ꞌ yu̱ꞌuꞌ ña̱ ni̱ xi̱ni̱ so̱ꞌo̱ i̱ ni̱ ke̱ta̱ ndi̱viꞌ ja̱a̱nꞌ xi̱i̱nꞌ i̱ ndii:

―Kuaꞌan te̱ na̱ꞌi̱n u̱nꞌ tu̱tu̱ lulu tunꞌ yoo̱ꞌ ña̱ nuniaꞌ, ña̱ niꞌiꞌ ángele, ña̱ iinꞌ nuu̱ꞌ mi̱ni̱ kaꞌnuꞌ xiinꞌ nuu̱ꞌ ñu̱ꞌuꞌ ja̱a̱nꞌ ―ni̱ kachi̱ a̱.

9 Te̱ ni̱ xaꞌa̱n i̱ nuu̱ꞌ ángele ja̱a̱nꞌ, te̱ ni̱ xika̱n i̱ tu̱tu̱ lulu ja̱a̱nꞌ nuu̱ꞌ a̱. Te̱ ni̱ kaꞌa̱n a̱ xiinꞌ i̱ ndii:

―Na̱ꞌi̱n a̱, te̱ ka̱xi̱ꞌ u̱nꞌ. Ku̱u̱ uva̱ a̱ ti̱xi̱n u̱nꞌ, ndisu̱ ku̱u̱ vixi̱ a̱ nde̱e̱ naa ñuñu̱ꞌ yu̱ꞌuꞌ u̱nꞌ ―ni̱ kachi̱ ángele ja̱a̱nꞌ xiinꞌ i̱.

10 Te̱ ni̱ na̱ꞌi̱n i̱ tu̱tu̱ lulu ja̱a̱nꞌ nda̱ꞌaꞌ a̱, te̱ ni̱ xa̱xi̱ꞌ i̱ a̱. Te̱ ni̱ xi̱ni̱ i̱ ña̱ vixi̱ a̱ yu̱ꞌuꞌ i̱, ndisu̱ ni̱ ku̱u̱ uva̱ a̱ ti̱xi̱n i̱.

11 Sa̱kanꞌ te̱ ni̱ kaꞌa̱n ka̱ a̱ xiinꞌ i̱ ndii:

―Kuní a̱ ña̱ kaꞌa̱n tiakú tu̱ku̱u̱ u̱nꞌ xaꞌa̱ꞌ ña̱ ku̱ndo̱ꞌo̱ ne̱ ndieeꞌ ñu̱u̱ kaꞌnuꞌ xiinꞌ nda̱ꞌaꞌ a̱, xiinꞌ xaꞌa̱ꞌ ña̱ ku̱ndo̱ꞌo̱ kuaꞌa̱ꞌ nuu̱ꞌ ne̱ yivi̱ꞌ, xiinꞌ xaꞌa̱ꞌ ne̱ yoo tu̱ꞌu̱n mi̱iꞌ, xiinꞌ xaꞌa̱ꞌ ne̱ xaꞌndia chuunꞌ kuuꞌ nu̱uꞌ ―ni̱ kachi̱ a̱.