1 Ioar oai koajoandihwa me oang in irair oauwe: ngoah johla pirin alwe ipamwai, pwa ngoah en joah kin kahrehioang kamwai injinjuwed. 2 Pwa ma ngoah pirin kahrehioang kamwai injinjuwed, a inje ma pirin kak kainjenmwahuwihla ngoahi, audi kamwai kan ma ngoah ne kainjinjuwedihla? 3 A ioar kahrpoan oai ne insingkihwehng kamwai: pwa ngoah johpwa nimen alwe apel diarda oai injinjuwed jang ipamwai ma ngoah kin kajkajik en kainjenmwahuwihla ngoahi. Pwa nehn uhdahn oai kidal ma nehn oai kin injenmwahu, kamwai ohroj kin pel injenmwahu. 4 Ioar mehwa ngoah insingkihwehng kamwai nehn kapehd soausoau, pwunod apel injinjuwed koalik, audi pwa ngoahi en kainjinjuwedihla kamwai, a pwa kamwai en poahmda uhwen oai limpoak oang kamwai.

5 Doari, ma emen kainjinjuwedihla emen jaudi ngoahi ma ih kainjinjuwedihla pwa pwen kamwai ohroj. (Pwa ngoah pwahla me pwa ngoah en joah kasoausoauwihla armajjo.) 6 A koaloklok ma ih ne oaloa jang loap koalik in kamwai ne isar oang ih. 7 Apkas kamwai pirin mahkoahng apel jeuwejehda pwa ah injinjuweddo en joah koalikla ken koauwehla ah mour in joauloang. 8 Ngoah poaki ipamwai in ngidngid, kamwai en kajalehioang ih amwai limpoak mehlel. 9 Pwa ioar kahrpoan oai kadarwehng kamwai kijilikoauwo: pwa ngoah nimen woahwoahki mwehu iramwai ma kamwai kin peik anjoau ohroj nehn oai padahk kan. 10 Ma kamwai pirin mahkkihoang emen mehkij; ngoah pirin pel mahkoahng. Pwa nehn oai kin mahkoahng — emen, ma mine kahrpoan oai en mahkoahng — ngoah kin mahkoahng mwohn Christ pwa kamwai, 11 pwa Jehsen en joah kalwehdi kisai; pwa kisai ne kidal doahr ah koajoandi kan.

12 Wih 20:1Nehn oai leldo nehn Troas pwa ngoah en kapahrakki Rongmwehu doahr Christ, ngoah kidalda pwa Koaunno ne risingdahng ngoahi wanihmw mwehu oau pwa ngoah en doadoahk wijahu. 13 A ngoah injinjuwed koalikki oai johpwa kapangda riasai Titus. Ioar mehwa ngoah koamwurmwurki oang armaj kan wijahu apel daudauluhllahng Macedonia.

14 A kisai kapingkalahngannoang Koahs, ma anjoau ohroj kahlwa kisai ma wia armaj lidu en Christ kapar en kalwehdi. Ih doadoahk ki kisai pwa kisai en kaparahla ipen armaj kan maram in Christ, doahroar pwohn le karahdin mwehu pwowoa ma kin koalpijoang wija ohroj. 15 Pwa kisai doahroar mihn kapwohmwehu ma Christ kin meiroangki oang Koahs ma pel lelloang armaj ma ne koamourla apel armaj ma joaloangla: 16 Oang armaj kan ma joaloangla pwa pwo nauna oau ma kin kahrehioang arai mehdi; a oang irai ma koamourla kan, pwo karahdin oau ma kin kahrehda mour. Inje ma kak wia joangoan doadoahk oauwe? 17 Pwa kamai johpwa doahroar armaj dir, ma kin doadoahkki Mahjan in Koahs doahroar dipwjoau siksik dupukoa ma irai kin noaskihla; pwa amai padahk kin injang ipen Koahs, ma kadardo kamai. Kamai kin kapahrak in mehlel mwohn Mijoa doahroar lidu in Christ pwi.