Nihn Paul Kijilikoau oang Mwomwohdjohn
Ephesus
Oarlap in Kijilikoau oauwe
Nihn Paul Kijilikoau oang Mwomwohdjohn Ephesus pidda mwohn me ohroj, kupwuren Koahs, “en kihpene kapikpik ohroj, joang ohroj nehnloannge apel jampah, a Christ ioar moange” (1:10). Ih pel insingehdi pwa nihn Koahs armaj kan en mourki koajoandi ke kupwur kajampwal oauwe, pwa armaj ohroj en wiahla oau nehn ahr kin oauwoang Christ.
Nehn iroa keiouin Kijilikoau oang Mihn Ephesus, Paul kawoahwoahda irair in minmin oauwe nehn ah kajalehda doahr en Koahs Jahm ah kin pilda nah armaj kan, doahr ahr kin oaloa lapwapen diparai kan apel jaldek jang nehn diparai kan ki nihn Koahs Iehroj Jesus Christ, apel doahr en Ngen Joarwi Ah wia mihn kadehdehn pwoaidahn en Koahs inoau lap. Nehn iroa kariau, Paul kasihkeiki joauloang in Ephesus kan pwa ahr mour in oauwoang Christ pirin uhdahn janjal nehn ahr kin miniminpene nehn pwungarai.
Paul doadoahkki karajraj pwi pwa en kajalehda minmin in joauloang kan ipen Christ: ma doahroar, en mwomwohdjo doahroar palwar oau, ma Christ ioar wia moange; ke doahroar Umw Joarwi oau, ma sakain pwukoakoaimw, ioar Christ; ke doahroar li kamwohd men, ma pahioa woal kamwohddo, ioar Christ. Kijilikoau kije audohdkihda lal koalik; doar Paul ken kin kalap doadoahkki lal in koaul apel koaul ling kan nehn anjoau ma lamlam in kalahngan en Koahs ipen Christ kin kamwkamwoakid nehn kapehdin. Me ohroj kin wiawi jang in limpoak en Christ, Ah meiroang, mahk, kupwurkalahngan apel mwakelkel.
Audoapoa in Oarlap
Sapin Kijilikoau 1:1-2
Christ apel Mwomwohdjo 1:3—3:21
Mour kapw ipen Christ 4:1—6:20
Koarjoahklahn Rahnmwahu 6:21-24
1
1 ACT 18:19-21; 19:1Jang Paul, wahnpoaroan in Christ Jesus jang in kupwuren Koahs —
Oang nihn Koahs joauloang in Ephesus kan ohroj, ma poadidi nehn arai mour in oauwoang Christ Jesus:
2 Kalahngan apel popohl jang Jamasai Koahs apel asai Koaun Jesus Christ oang kamwai.
Kapai kan en Christ
3 Kisai en kajpahl kalahngan oang Koahs, Jemen asai Koaun Jesus Christ! Jangin in asai oauwoang Christ, Ih ne kapaida kisai nehn Ah kihdoa joangoan kapai ohroj jang Ngenno nehn loannge. 4 Jang mwohn jampah wiawihda, Koahs ne pwen pilda kisai en wia Nah jangin in asai oauoang Christ, pwa kisai en joarwi apel mwakelkel mwohn Koahs.
Jangin Ah limpoak, 5 apel jangin Jesus Christ, Koahs ne koajoanehdi pwa kisai en wiahla Nah jeri, ma ioar Ah kupwur peren apel Ah koajoandi. 6 Kisai kapnga Koahs ki lingin Ah kalahngan, apel Ah kihdoa kijakij oau, ma joh dopdop, ioar Nah Iehroj kajampwallo! 7 Col 1:14Pwa jangin insahn Christ, kisai ne jaldekla; ma woahwoahki pwa kisai ne oaloa mahk in dipasai kan. Joangoan koalikin en Koahs kalahngan oauwe, 8 ma Ih ne kihdoahng kisai inenin koalik.
Ki Ah erpis apel kupwurkoang ohroj 9 Ih kin kajale oang kisai dahkij Ih kin neknekid nehn kupwuroa, ioar kupwur rir ma pid Christ, ma Ih ne koajoanehdi jang in sapdahu — 10 kupwuroa ma Ih pirin kapwaihahda nehn anjoau ma koanoahng. Doari, ioar kupwuroa wa me, en kihpene kapikpik ohroj, joang ohroj nehnloannge apel jampah, a Christ ioar moange.
11 Joang ohroj ne wiawi jangin koajoandi apel kupwuren Koahs. Koahs ne pilda kisai en wia Nah armaj ma en oauwoang Christ pwa ioar pein Ah koajoandi, koajoandihoau ma Ih ne wiahda jang in sapin kawa. 12 Doari kisai, ma ioar sapin koapwoarpwoarkihla Christ, kapnga klorihn Koahs.
13 A kamwai ne pel wiahla nihn Koahs armaj anjoauwo kamwai rongda rong mehlello, Rongmwehuwo ma koamoaurla kamwai. Kamwai kamehlelehla Christ, a Koahs kioang Ah kilel pohn kamwai pwa Ih ne nainkihla kamwai nehn Ah kadardo Ngen Joarwi ma Ih inoaukihda. 14 Ngenno ioar kadehdehpen asai pirin johjohki joang ohroj ma Koahs ne inoaukihoang Nah kan; kadehde oauwe kioang kisai koapwoarpwoar pwa Koahs pirin kihdoa jaldek unjek oang irai Nah kan. Kisai en kapnga Ah klori!
En Paul Kapkap
15 Me ioar kahrehda, jang in oai rongda doahr amwai kin pwojon Koaun Jesus apel doahr amwai kin limpoak oang nihn Koahs joauloang kan ohroj. 16 Ngoahi johkin uhdi jang kapkaping kalahngan oang Koahs ki kamwai. Ngoahi samsaman kamwai nehn oai kapkap kan, 17 apel kin poaki ipen Koahs in asai Koaun Jesus Christ, Jahm ling, en kioang kamwai Ngenno, ma pirin wia kamwai en loalkoang apel kajalehioang kamwai Koahs, pwa kamwai en kidal Ih. 18 Ngoahi poaki pwa amwai lamlam en risda pwa kamwai en kak kapang maram in Koahs, pwa kamwai en kidal ia koapwoarpwoar ma Ih panginki kamwai, ia uhwen mwehu in kapai ling kan Ih inoaukihoang Nah armaj, 19 apel ia uhwen koalik in Ah manman kin doadoahk nehn kisai ma kamehlele. Manman oauwe doadoahk nehn kisai pwen doahroar manman koalikko 20 Psa 110:1ma Ih doadoahkki anjoauwo ma Ih kaiejda Christ jang mehdi apel koajoanehdi Christ loap moaunin Ih nehnloannge. 21 Christ koaun nehnloannge pohnangin ohroj irai koaun kan, irai laplap kan, irai manman kan, apel irai joumaj kan nehnloannge; Ah mwar koalik jang en laplap ohroj nehn mwei oauwe apel mweiho mwuhr. 22 Psa 8:6Col 1:18Koahs kioang meohroj pehn Christ apel kioang Christ mwomwohdjo pwa Ih en wia Koaun pohn meohroj. 23 Mwomwohdjo ioar palwoaroan Christ, ma ioar kaunjekpen Ih ma pein Ih kaunjekla meohroj wija ohroj.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.