1 “Ngoahi padahkihoang kamwai mehpwiai pwa kamwai en joah kerpwihla amwai pwojon. 2 Irai pirin kainoapwihjang kamwai nehn arai jinakoke kan. A anjoau allaluhdo, ma emen ma pirin kojuk kamwai pirin lemlemehioang pwa ih kin papah Koahs. 3 Armaj pirin wiahng kamwai mehpwiai pwa irai jehjoa Jahmmo ke Ngoahi. 4 A Ngoahi ne pwehng kamwai mehpwiai pwa nehn anjoauwo pirin leldo ma irai en wia mehpwiai, kamwai nen lemehda Oai sikesik pwiai.”

“Ngoahi joah padahkihoang kamwai mehpwiai in sapinno, pwa Ngoahi minmine ipamwai. 5 A apkas Ngoahi pirin inlahng ipen Ih ma kadardo Ngoahi; a joh emen kamwai ma idoak Ipoai, ‘Ia wija Koawoa pirin inla?’ 6 A apkas, pwa Oai ne pwehng kamwai, amwai mohngiong ne dirkihla injinjuwed. 7 Ngoahi pwehng kamwai in mehlel: ma mwehuwoang kamwai ma Ngoahi pirin inla jang kamwai, pwa ma Ngoahi joah inla, Jounjauwajjo jehpirin indoahng kamwai. A ma Ngoahi inla, Ngoahi pirin kadardohng Ih kamwai. 8 A nehn Ah pirin indoa, Ih pirin kadehdehioang sohn jampah pwa irai pwen japwung nehn doahroar dihp, nehn doahroar pwung, nehn doahroar kadeik en Koahs. 9 Irai kin japwung in doahroar dihp, pwa irai joah pwojon Ngoahi; 10 irai kin japwung in doahroar dahkij pwung, pwa Ngoahi ne pirin ken inla ipen Jahm a kamwai ne johla pirin kapang Ngoahi. 11 Irai kin japwung in doahroar kadeik, pwa koaun in jampah oauwe ne pwen kadeikda doari.

12 “Pel mine joang dir ma Ngoahi nimen pwehng kamwai, a apkas ne inenin apwal oang kamwai en oaloahda. 13 A nehn Ngenin Mehlello ah pirin indoa, Ih pirin kajalehda mehlel in Koahs, Ih pirin kahlwahng kamwai oang nehn mehlel ohroj. Ih jehpirin padahk ki jang in pein Ah manman, a Ih pirin padahkihoang kamwai da ma Ih kin rongda, apel padahk ki doahroar mehkan ma pirin indoa. 14 Ih pirin kalingihla Ngoahi, pwa Ih pirin padahkihoang kamwai dahkij ma Ih rongjang Ngoahi. 15 Meohroj ma Joamoaiho anki, ioar Oai; kahrehda Ngoahi pwehng kamwai pwa Ngenno pirin oaloa dahkij Ngoahi kioang Ih, a Ih padahkihoang kamwai.”

16 “Mwerin anjoau kij, kamwai johla pirin kapang Ngoahi, apel mwerin anjoau kij, kamwai pirin pel pwuroahng kapang Ngoahi.”

17 Epwi Nah sohnpadahkkok idoak pene nehn pwungarai, “Ia woahwoahn me, ma Ih pwehngkihoang kisai, ‘Mwerin anjoau kij kamwai johla pirin kapang Ngoahi; apel mwerin anjoau kij kamwai pirin pwuroahng kapang Ngoahi?’ A Ih pel pwa, ‘Ngoahi allaluhlahng ipen Joamoaiho.’ 18 Ia woahwoahn lal oauwe, ‘Mwerin anjoau kij?’ Kisai johpwa woahwoahki dahkij Ih siksikoa!”

19 Jesus kidal pwa irai nimen kalelpoak Ipoa, Ih pwehnglahng irai, “Ngoahi pwa, ‘Mwerin anjoau kij kamwai johla pirin kapang Ngoahi, apel mwerin anjoau kij kamwai pirin pwuroahng kapang Ngoahi.’ Ioar mehwa kamwai iddidoak nehn pwungamwaikan? 20 Ngoahi pwehng kamwai in mehlel: kamwai pirin joang apel injinjuwed, a jampah oauwe pirin peren. Kamwai pirin injinjuwed, a amwai injinjuwed pirin wikkoang in peren. 21 Nehn en li men ah pirin koaroannoang en noaisik, ih pirin injinjuwed, pwa ah anjoau in moadoak ne lel. A in anjoau ma jeriho noaisikdi, ih pirin moalkoahla ah moadoak; ih pirin perenda, pwa jeri men ne noaisikdi nehn jampah. 22 Ioar pel doahroar kamwai, anjoau oauwe kamwai injinjuwed, a Ngoahi pirin pwuroahng suhwoang kamwai, a mohngiongimwai kan pirin dirkihla peren, joangoan peren ma joh emen kak kihjang kamwai.

23 “Nehn rehnno pirin leldo, kamwai jehpirin poaki Ipoai mehkij. Ngoahi pwehng kamwai in mehlel: Jahmmo pirin kioang kamwai meohroj ma kamwai pirin poaki Ipoa in Oadoaioa. 24 Leldo anjoau oauwe kamwai kahjikkoar poaki mehkij in Oadoaioa. Poaki a kamwai pirin oaloa, pwa amwai peren en unjekla.”

25 “Ngoahi ne padahkihoang kamwai mehpwiai in karajraj. A anjoau pirin indoa ma Ngoahi johla pirin doadoahkki karajraj, pwa Ngoahi pirin padahkkoang kamwai in janjal doahr Joamoaiho. 26 Nehn rehnno pirin leldo, kamwai pirin pein poaki mehkan ipen Koahs in Oadoaioa; a Ngoahi johpwa pwa Ngoahi pirin poaki ipoa mehkij ki kamwai, 27 pwa pein Jahmmo ipwilki kamwai. Ih ipwilki kamwai pwa kamwai ipwilki Ngoahi apel kamehlele pwa Ngoahi indoa jang ipen Koahs. 28 Ngoahi indoa jang ipen Jahmmo, apel indoahng jampah. Apkas Ngoahi pirin injang jampah inlahng ipen Jahmmo.”

29 Doari, Nah sohnpadahkkok ken pwehng Ih, “Maing, apkas Koawoa sikesik janjal, a johla doadoahkki karajraj. 30 Apkas kamai kidal pwa Koawoa kidal joang ohroj, a Koawoa johpwa anahne emen en kalelpoak mehkij Ipoamw. Me kahrehioang kamai en kamehlele pwa Koawoa indoa jang ipen Koahs.”

31 Jesus japoang irai, “Apkas kamwai ne kamehlele? 32 Anjoauwo pirin indoa, a ne leldo, ma kamwai ohroj pirin mwoarpijoang, emenemen inlahng nehn pein ah wija; Ngoahi pirin kalahpwukla. A Ngoahi johpwa pirin kalahpwukla, pwa Joamoaiho kin pwilpwili Ngoahi. 33 Ngoahi ne padahkihoang kamwai mehpwiai pwa kamwai en anki popohl ki Ngoahi. Jampah pirin koalkoa kamwai, a kamwai en sihkei, pwa Ngoahi ne kalwehdi jampah!”